Gherdeina y l standard scrit
scrit ai 24 November 2006 da les 18:14:44 da noeles |
|
La tema de Gherdeina envers l standard scrit
La vejinanza con i tiroleisc y chela con les valedes ladines
I fatours che determineia la posizion gonot negativa te Gherdeina envers l ladin standard: l prum é n fatour a valch maniera "ogetif" y reverda la gran desferenza linguistica, souraldut lessicala y de trac fonetics de evoluzion moderna, anter l ladin de Gherdeina y i autri idioms; emplù à i gherdeines n sentiment sterch de liam emotif con sie idiom y donca na sort de tema. Gebietsobfrau Baur: "Ladin Standard ist eine Kunstsprache"
Tema de perde sia spezifizité tl cajo de adozion de n lingaz ladin unifiché, tema nia reala sce l ladin dolomitan vegn adoré sciche grafia unitara per scrive duc i idioms ladins y nia sciche sest idiom. N ultim fatour é de sort economica y soziopolitica. Na bona pert di gherdeines é tiroleisc y ladins, ma nia ladins tout court: metus dant a la chestion de sia vejinanza con tiroleisc de lingaz todesch o con ladins de la provinzia de Trent o de Belun, se sent i gherdeines dessegur plu vejins ai tiroleisc che ai autri ladins. I dac dla enrescida Survey ladins l dij clermenter. A la domanda: aldò de vosta minonga, cie livel de vejinanza él pa anter la jent de chestes comunités: sudtiroleisc de rejoneda todescia, ampezans, chi dla Val dl Isarch, fascians? (Mostra sun n indesc da 0=deguna vejinanza a 1= aut), veiden che i gherdeines se sent scialdi vejins ai tiroleisc de rejoneda todescia en general (0,7), mesanamenter vejins a la jent dla Val Isarch (indesc anter 0,5 y 0,6), n puech manco vejins ai fascians (anter 0,4 y 0,5) y bendebot dalonc dai ampezans (0,3).
An mess dapò conscidré la forza economica de Gherdeina y sia volonté, gaujeda ence da rejons storiches, de se mete dant sciche cef dl grup ladin: donca scemai messessa na grafia unificheda se basé esplizitamenter sun l gherdeina (dijon "esplizitamenter" percieche l ladin standard, enscì coche al é encuei, é dessegur, de fat y nia esplizitamenter, plu somiant al gherdeina che ai autri idioms.
Tl medem temp dal pont de veduda politich ti fej na grafia standard che met adum dutes les popolazions ladines che al sibe chesta la raprejentazion linguistica de na nazion ladina unitara o la imagina moderna dl vedl Tirol mitteleuropean, multicultural, multietnich y plurilingh: todesch, talian y ladin, poura al establishment politich dl Sudtirol. Ala fossa na sort de pericul sezescionist che podessa mete en dube la gran autonomia che la provinzia autonoma de Bulsan à derzé ca dal stat talian te trueps agn de batalies politiches.
Per la Südtiroler Volkspartei, partit de maioranza nia demé tla provinzia ma ence tles valedes ladines de Bulsan y dantadut te Gherdeina, podessa la doura di idioms sciche uniches formes per scrive ladin mantegnì i ladins spartis te cinch grups. Al podessa ben ti asseguré la lealté de Gherdeina y dla Val Badia a Sudtirol y lascé fora la jent dles autres trei valedes, mascima fodoms y ampezans, vedus sciche portadours de talianité. Da la Survey ladins, Vittorio Dell'Aquila.
- Comentar: Vosta creta y analisa dla situazion de Gherdeina é propi n pue massa grana. I gherdeines gherdeines é jent normala, da fé saurì, valenta y che laoura. Anter chisc él ence de gran capazités che se dà ju con sie laour zenza fé l show man y zenza se ficé ite tla politica. Spo él i gherdeines che viv tres l partit Svp, i tiroleisc piec di tiroleisc todesc y chisc é per na gran pert fanatics, che ne n'à fat deguna batalia storica, ma che ti à tres sourandé sie destin ai todesc, ti dan la ousc y petlan. La potenza economica de Gherdeina ne é nience plu sciche ala fova n iade. Oramai ti é badioc y fascians souracef. Perchel la vertola de volei avei sie idiom prum "inter pares" per sia potenza economica y sia tradizion ne à deguna fondamenta. L establishment de Sudtirol con Durnwalder ne à nia chisc problems. El fossa a una.(uc)
|
