benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Teater Ladin: consciderazions de Valentina Kastlunger
scrit ai 20 November 2006 da les 19:11:51 da noeles

Cultura

 

Devers n teater nuef y critich?

N valgunes consciderazions de Valentina Kastlunger - L teater tles valedes ladines é dutaorela deplen tles mans dles unions amatoriales

I volesse  fé referiment al articul "N teater zenza critiches" vegnù fora sun chesta plata dant da 15 dis. Al vegn trat dant che l teater ladin se prova souraldut de fé rí lascian da na pert la critica envers la sozieté y la politica encer nos via. L teater é na forma d'ert che pò mantegnì na gran independenza y liberté da les logiches dla sozieté y dla politica che domineia. Al é n sté adum de gran efet che muda empruma de dut chi che fej chesta pratica y chest n'é dessegur nia puech. Y spo él ence na moda per raprejenté l mond ti portan n messaje. Fondamentalmenter sonsi a una con l contegnù dl articul ence sce ie veide che sun chest argoment él ciamò truep sotissoura.


 



Al me pèr ch'al sie vegnù fat ti ultims temps ence valch spetacui "critics". Bonamenter se tràtela de na mendranza, ma na mendranza che é dant man. I ne son nia tant recordenta per i conté  su duc canc, ma i me recorde, p.ej., di spetacui desche "Danterite" dl Teater da La Val che tratova de tematiches soziales plu sentides dal paisc te chel moment - o dl spetacul  "L Foresto" dl Teater de la Pli de Mareo che rejonova dles dificultés de azeté cie che é autramenter. Chisc spetacui ne branciova nia ite nost establishment politich, ma "ester critics" ne pò nia y ne dess nia demé volei dí ataché la politica. Al é n grumon aspec de nosta sozieté che al é emportant da rejoné.
I me recorde ence de na osservazion de raprejentant dles unions teatrales de Gherdeina entratant l forum sun l teater ai 28 de otober: al se baudiova che al vegn fat demeztroi na desferenzia anter teater "da rí" zenza contegnus y teater "serious", plen de contegnus critics, desferenzia che el ne azeteia nia. I son a una con el. "Fé rí" n'é dessegur nia en contradizion con l messaje sterch ch'an vuel dè. Al basta pensé che tla Talia vegn encuei n valgunes critiches plu stersces a la sozieté rodunt da comics. L problem é bonamenter chel che per na pert de nosc joblers y ciamò deplù per na pert dl publich, pèrel che al paie demé la mueia de porté dant comedies popolares tradizionales, olàche al vegn dant dagnora i medems juesc y les pertes che dà segureza. Ales ne permet nia na discuscion. Ma la dramaturgia é ence plena de de beles comedies de contegnus critics. N valgunes de chestes é dret adatedes a nosta realté. Ala se trata de tesc' che lascia antervedei n stil nuef, dutaorela ciamò nia conesciù y perchel plu rie da entene y da azeté.
La medema persona dova ence da entene che chi che fej teater te nostes valedes l fej dandadut per l plajei de l fé y perchel vuelei ei lité liberamenter cie che ai porta dant. Chesta é na afermazion la dij fora clera. L teater ladin é chel dles unions amatoriales. Tl laour amatorial deventa la orela curta y la spontaneité de chi che l fej, fondamental. Sce chisc elemenc va mancia, spo morìssel fora un di aspec plu vitai de nost teater. Olàche al esisteia n teater "istituzional", p.ej. "Die Vereinigten  Bühnen" o l "Teatro Stabile" de Bulsan, ti végnel damané de fé na politica culturala revardenta la critica soziala, ti lascian al teater amatorial la liberté de esprescion aladò ch'al miena. L teater ladin n'à nia ciamò n teater istituzional ofizial y perchel auda les unions amatoriales de fé indiretamenter y en pert zenza volonté chela pert de funzion che é ambivalenta: da una na pert reclameieles la spontaneité de sie laour y perchel ence l dert a la maiour liberté de lita, da l'autra se sentéles d'ester les raprejentantes y les portadoures de n toch de cultura ladina dassen emportant. N ejempl concret: per promueve la dramaturgia contemporana tl teater profescional talian ti à l minister a la istruzion aloghé finanziamenc a les compagnies che porta dant demé tesc' de autours joegn talians. Pòles pa fé l medem nostes unions amatoriales? Pòn pa les sburlé a lascé audí demé tesc' de n autour ladin ence sce l test n'é nia de sie plajei y stil? O desséles rejoné de critica soziala? Pòn poester les sforzé a traté tems che ne azica nia sia spontaneité? I me l damani propi. Ciamò n'ài deguna resposta. Les respostes vegnirà da la cualité dl laour, dai tesc' y da les idees a l'auteza de entusiasmé nosc atours.
Benvegnus pro la discuscion.

Valentina Kastlunger

 
  Liams y navigazion aslum

 

 
 Teater tles valedes ladines
 Union dl Teater da San Martin

 Prejentazion dl toch de teater en ocajion di 100 agn dla Union Ladina

 Die Rechtfertigung, n teater per todesch de Iaco Rigo
 Lizé scientifich La Ila: na tragedia greca per scluje ju l ann de scola
 Union Teater La Val: satirica de Ephraim Kishon
 Colaborazion teatrala anter Selva y La Val
 Erehwon prejenteia n teater nuef
 L spetacul teatral

 


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 2.33
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc