benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Colfosch: reunion generala dl Moviment Politich Ladins
scrit ai 13 November 2006 da les 22:24:09 da noeles

Politica

 

Ti dé flé nuef al moviment "Ladins"

L MPL complesc 15 agn - Fé conesce l'am autonom - La lege litala dl 1998 fova vegnuda anuleda

Anter i tems che vegnirà tratés en sabeda, 18 de november, a Colfosch dal Moviment Politich Ladins saràl ence la situazion politica ladina atuala. Sun chest argoment rejonarà Carlo Willeit che dij: "L problem zentral é la raprejentanza politica.
Adi DemetzL Moviment Politich Ladins (MPL) à endò cherdé ite la reunion generala per tegnì daverta la discuscion sun i problems ladins. La enconteda sarà en sabeda, 18 de november a Colfosch, tla Ciasa dles Unions Tita Alton, da les 15.00 inant. Chest desmostra che al ne é nia rassegnazion, na gran vueia de jí inant. Les dificoltés é truepes, ma nia tant granes da descorajé l empegn per la esistenza dl moviment.
Adi Demetz, president dl MPL.
 
 


Degugn ne pò plu dì nia, dut depen dai ombolc deberieda con Mussner. Ai se rata i soui raprejentanc di ladins. La pert aministrativa miena de podei comané ence deplen tla politica, zenza ne avei no dlaorela y no la legitimazion aladò. La dreta soluzion politica pèr demé de ester la sia. Les consuegenzes é cleres: la sconanza, cis chela culturala, dla comunité ladina s'en va do ega fora, la cultura va tres plu endò, tres manco la sconanza dl lingaz sibe te scola che tla aministrazion, net degun vare inant per cie che reverda l ladin te scola, proibì de rejoné de lingaz unifiché scrit per na valorisazion dla Ladinia, tres plu ria la comunicazion con les autres valedes, al vegn plulere rejoné de scluje i joufs empede de i daurì deplù. Da chilò enfora veiden l debujegn de na raprejentanza politica plu lergia y daverta."
      Ne se bate nia plu essa desche conclujion clera che de ne ester nia plu, avisa cie che la maioranza se aoda, che fej dles dutes per tegnì ju la oposizion, per ne ti lascé nia lerch. Ma la realté é na autra: propi la prejenza dl Moviment dla Lista Ladins ti à dé na sburla al partì de maioranza, l'à oblié da se paré, a vegnì fora da la endormia, a conscidré ence l fé politica diretamenter y nia demé de ti sourandé dut ai todesc. Truepes propostes portedes dant dal MPL é vegnudes reconesciudes ence dal partí de maioranza che à enscì messù vedei ite de ester ruvé tert a pretene certes autonomies y dantaldut certes prejenzes tles comiscions provinziales y regionales. L MPL é garaté na sort de tremoloz per la maioranza che ti à daurí i uedli. La funzion de sburla déssela tegnì inant, ence sce les dificoltés cresc demeztroi. Les lites provinziales dl 2008 é n tema zentral ence bele pro chesta senteda dl MPL. An ti ciala dantaldut a la lista di candidac che enfin a sen mancia dutaorela, candidé pro la lista Ladins vuel dí en pratica azeté la persecuzion da pert dl partí de maioranza, ma rodunt per chestes ingiustizies él gran ora de avei l coraje de sté sun lista y se bate per n tratament a la per. Dessegur él candidac enjignés y a la auteza dl dovier. Ma ai à tema y condizionamenc, de vegnì tormentés te si enteresc profescionai y familiars. An mess ouje la situazion. Ence l laour de oposizion deventa critich, ajache al mancia i mesi finanziars per i reclams, entratant che l auter partì a dinés da sterne. Al basta pensé a les poscibeltés economich-finanziares dl assessour Florian Mussner che comana un di assessorac plu rics, chel di laours publics. Al pò tres sia enciaria condizioné i comuns, les categories profescionales, les dites diretamenter enteressedes ai laours y en plu àl ence a disposizion i contribuc a la cultura ladina per se compré les oujes de n grumon de unions folcloristiches ladines. En plu podessa l partí de maioranza - ence contra i detams dla sentenza costituzionala - mudé endò ju la lege litala provinziala y avei na brancia ciamò plu sterscia sun la comunité ladina, la sclujan fora per dagnora da la scena politica ativa con n bel enciamp lital desche al à bele volù fé dl 1998. La Lista Ladins fossa oblieda de se lié con n auter partì che al ne é dessegur nia saurí giaté. An messessa pié via con na plura giuridica. 

      La Lista Ladins ova fat recurs dl 1998 y la Court Costituzionala ti à dé te dut rejon (sent. 356/98). La lege anti-ladina tla provinzia de Bulsan é vegnuda anuleda. Ala se trata de tó coscienza dla situazion reala y prové de sclarì cie che an pò fé deberieda. Chest é souradut l fin dla senteda da en sabeda a Colfosch. Se damané co fé da ne zede nia, da ne dé nia do, ence sce dut pèr laoré decontra. An pò devenje les dificoltés, sce an tegn dant ai uedli l enteres dla Ladinia desche unité, organ vif che ciala a sia autonomia y liberté de azion. L gran pericul é propi i enteresc privac che tol demez vigni idea de valch plu de gran, de plu alaut: na Ladinia di ladins y nia de fanc y de fanceles di todesc. Dessoura pòn lieje l envit a tó pert a la enconteda per vegnì al savei ciunes che é les dificoltés che desdruj n puech a la outa la comunité ladina. Al é emportant tó pert, ajache al va debujegn de n aier nuef. Al vuel ester ossigen a la vitalité ladina. Tl 2008 complesc l MPL 15 agn, nasciù con de gran sacrifizes y bries, descedan su entusiasm y fajan conescie miec ai vejins l'am autonom di ladins. (ui)
 
 
 
 
 
 Simpose dl Moviment Politich Ladins: les rejons de na politica autonoma
 Lista Ladins: coliament anter les valedes zenza messei paié n daz
 Ressoluzion dl MP LADINS a revert n daz o la scluta di joufs
 Moviment Politich Ladins: reunion generala 2005 a Selva
 Reunion generala di LADINS 2004 a Colfosch
 La lista LADINS se organiseia danuef

 

 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.42
Oujes: 7


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.422 seconc