benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Val Badia: finalmenter internet a banda lergia
scrit ai 10 November 2006 da les 17:11:35 da noeles

Val Badia

 

Internet a banda lergia ruva finalmenter ence tla Val Badia

La LINKEM spa instaleia i ultims implanc - Con jené 2007 pòn se lié ite a internet debota te dut Mareo y te dut l comun de Badia, defata dedò ence tl comun de San Martin de Tor - les tecniches doredes: hiperlan y wi-fi zenza fils, ma con antenes

Dr. Klaus WinklerN computer zenza internet a banda lergia é encuei prest desche avei n auto zenza rodes. Tant dejavantajés se sentìven ti paisc a la mont. Internet a banda lergia arjonj plan, plan ence i paisc plu da na pert fora. Al ne é nia la Telecom che meina inant chesta inovazion, ma la provinzia de Bulsan, assessorat al artejanat y industria, che ti à sourandé de fauré dl 2006 a na dita de Milan, la Linkem Spa, l laour de enjigné ca i implanc de trasmiscion a banda lergia per corì l teritore de 14 comuns a la mont dla provinzia. Anter chisc él ence l comun de Mareo y l comun Badia.

Intervista a dr. Klaus Winkler, espert de informatica pro l Studio Verginer P., Al Plan de Mareo.



Depierpul che i raions de Gherdeina, de Fascia y de na pert dl'Alta Badia (enfin a La Ila) vegn servis da la rei "adsl" dla Telecom, é i comuns dla bassa valeda restés enfin a encuei taiés fora, ence l zenter turistich de Al Plan de Mareo. "La speta à empò paié la mueia", cie che al ti vegn pité da la Linkem con l meteman de jené 2007 é miec y miour marcé che ofertes de d'autri oferenc de conescions a internet.

L espert informatich Klaus Winkler laora pro l Studio Verginer Pasquale a Al Plan de Mareo y al ti é sté do a la evoluzion dl projet. Chest studio ova metù en pe na sia rei privata (www.wirelesscom.it) che ofriva internet a banda lergia a Al Plan, ma l costiment fova bendebot aut. Sen ésen dassen contenc de podei se lié ite a la rei internet dla Linkem, ajache ala pieta de gran capazités y sarà cotant manco ciaradousa. Laoré con internet, navighé, telefoné tres internet y dantadut la trasmiscion de dac jirà dal 2007 inant cotant plu debota.

Cie laour fej pa la dita Linkem?
Klaus Winkler:
La dita Linkem de Milan à davagné de fauré dl 2006 la escrizion dla provinzia de Bulsan y se à oblié contratualmenter de ti pité internet a banda lergia al 92% dles ciases abitedes y al 96% dles dites con plu de 3 laoranc te 14 comuns de Sudtirol, anter chisc l teritore di comuns de Mareo y de Badia con meteman da jené 2007 inant.

Ciuna é pa la tecnica?
Klaus Winkler: Al vegn laoré con i standards tecnologics "hiperlan" y "wi-fi" che é standards "wireless" amplamenter testés y utilisés. Ai permet de se lié ite a internet zenza cabel. Trasmetù végnel tres implanc loghés tles postazions dles antenes dla RAS de radio y de televijion bele esistentes, p.ej. sun Piz de Plaies y sun Plan de Corones. I implanc emetours y rezetours é conzepis per trasmete almanco 4MBit al secont sibe da ciarié su sun internet che da desciarié ju da internet, 24 ores sun 24 ores, zenza degun limit.

Ciun sarà pa l priesc per chest servisc y cie vàl pa debujegn?
Klaus Winkler: Te ciasa méssen samben avei na antena per pié su l segnal y per trasmete. Chest implant te ciasa vegn metù a desposizion da la Linkem pro la instalazion. L cost de ativazion de na linia scempla se la roda sun i 70 euro y l cost de abonament sun 20 euro al meis, IVA scluta ite. Linia scempla vuel dí: 4 MBit al secont, 24 ores sun 24 zenza degun limit de dac trasmetus y desciariés. Al é samben ence d'autres tipologies de contrat, con na banda ciamò plu ampla, a n majer cost. 

Perduj pa la dita de tegnì ite l termin de jené 2007?
Klaus Winkler: L implant de antenes é completé al 90%. Al podessa suzede che i prums clienc a Al Plan de Mareo vegne bele tachés ite encer Nadel. Ofizialmenter y do contrat fajaràn les ativazions da jené 2007 inant.

Olà méssen pa jí per se lascé taché ite?
Klaus Winkler: An pò jí sun l sit dla Linkem o ence tó su contat con n partner dl post, p.ej. pro l Studio Verginer Pasquale a Al Plan de Mareo, per avei informazions (Tel. 0474 501399).

Resta pa San Martin y La Val inant "al scur"?
Klaus Winkler: La dita à empermetù che ala tolarà su, pernanche ala à ruvé con les ativazions y les instalazions ti comuns de Badia y de Mareo, ence clienc de chisc paisc. Chi da San Martin pò dessegur bele se lié ite a la rei internet debota da d'aisciuda dl 2007. Per cie che reverda La Val messessa l comun se fé inant pro la Linkem.
 
Dilan dles respostes



 

 
Liams emparentés
· Deplú sun l tema Val Badia
· Chier te noeles


L articul plu liet te chest tema Val Badia:
Mareo per i maroi: na Talsprache nueva


Valutazion dl articul
Cumpeida mesana de oujes: 3.5
Oujes: 6


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.448 seconc