Cent mile persones rejona rumanc tla Svizra

Aladò dla minonga de Gion-Giachen Furer portarà pro  la lege nueva sun i lingac, aproveda nia die ca dal Consei di Grijons, a poura nia a varenté la situazion dl lingaz rumanc y de chel talian, ence sce l todesch restarà inant dominent. Chest descrimineia da 200 agn encà l rumanc y l talian tl Cianton. Chesta descriminazion é la gauja prinzipala che l rumanc va plulere endò n pue dlonch.

Lege sun i lingac vuel ence dì che les scrites publiches à da ester scrites per rumanc. Chilò p.ej. pro na stazion dal benzin dla BP nia dalonc da St. Moritz/San Murezzan, demé per rumanc, enceben che l raion é completamenter turistich.

Slariament te % dl rumanc: dl 2003 aladò dl sondaje de Radio y Televijion Rumancia y dl 2000 aladò dla cumpeida federala (popolazion soura 15 agn)

	Capesc	Rejona	Liej	Scriv	Lingaz-oma	Lingaz rejoné regolarmenter te familia	Lingaz rejoné miour	Dé dant almanco un n iade pro la cumpeida (popolazion totala)
Grijon rumanc y todesch	43	35	32	26	24	21	15	---
Raion tradizional rumanc	71	64	60	53	47	42	32	46
Raion dl sursilvan (Surselva)	96	94	91	87	81	74	65	78
Surselva zenza Glion (n iade na ijola todescia)	99	97	95	93	88	78	70	83
Glion	85	80	75	59	50	47	32	51
Plaun (raion dant Cuera)	48	33	29	21	22	21	15	8
Raion dl sutsilvan (Sutselva)	33	28	25	23	21	15	8	15
Raion dl surmiran (Surmeir)	82	72	62	54	53	38	30	44
Raion dl putér (Engiadina Auta)	69	58	54	45	29	22	13	30
Raion dl putér zenza St. Moritz/San Murezzan	78	66	63	57	36	28	16	38
Raion dl vallàder (Engiadina Bassa y Val Müstair)	97	92	92	81	71	73	61	79
Grijon todesch zenza Cuera	20	14	11	7	7	4	2	4
Cuera (Coira)	31	24	21	18	15	10	8	10

 Les osservazions che i volesse porté dant reverda dantaldut n pont avisa: prové de limité i danns. La lege nueva dess empruma definì i teritores linguistics di Grijons y limité les poscibeltés che i comuns, un dlongia l auter tl teritore rumanc, mete sun na pert sie lingaz tres na dezijion individuala, poester cajuala, zenza tegnì cont di derc de sie lingaz per l davegnì. Per definì chisc teritores dess la lege nueva samben se basé dantaldut sun dac statistics segurs. N paisc deplen rumanc desche Tarasp tla Engiadina pò parei todesch demé per gauja dla prejenza de na scola privata con internat todesch.

      Emportanta é samben la formulazion dla domanda che an ti fej a la jent. Sce an vuel se basé sun l rejoné efetif dl rumanc per determiné sie teritore esclusif te n raion bilingh, o te chel con restogns ciamò rumanc, spo él da fé na cumpeida dla jent ciantonala con pueces domandes cleres, per ejempl: “Rejoneise Vos rumanc? y nia “Capieise Vos rumanc?”. Na tel cumpeida fossa bonamenter zenza riscs y ala respidlassa concretamenter la desfanteda dl lingaz rumanc, talian o todesch. L pont flevoul (debel) dla lege: an se damana ben dac spezifics, ma spo se acontenteien de tré ca l material dles cumpeides federales, zenza tegnì cont che chestes cumpeides ne gnirà nia plu fates a la maniera vedla y bonamenter ne daràles nia plu informazions sun les chestions di lingac.

      Les vedles domandes ne é dutaorela nia ciamò vegnudes adatedes a la lege nueva di lingac di Grijons. L prum projet vedova dantfora de se tegnì ai resultac dés a la domanda: “Ciun é pa per Vos l lingaz che i conesceis miec?” per determiné l teritore dl lingaz. Y an sa pu che al é l todesch che domineia: mesa la pert dl teritore rumanc reconesc l todesch desche lingaz ofizial, ma nia desche lingaz de paisc o dla scola. Enfinamai la scola sostegn aluesc l todesch. I dac revardenc la domanda: “Ciun é pa per Vos l lingaz conesciù miec?” ne dà nia les dretes informazions sun l endebliment dl lingaz.

Rumantsch Grischun te scola sen realté   La Quotidiana, l sfuei da vignidì ti Grijons   L Pledari Grond da puec dis te internet   Radio Rumanc: coche l radio amplieia sie repertore musical   N canal nuef per la tv rumancia   MS Office empara Rumanc Grijon   Televijion Rumancia: mudeda d'orar y ampliament   Dai Grijons: na scola paritetica   Dal 2005 inant vegn l rumanc standard ensegné tles scoles · deplù -->

Les protestes contra les domandes fates tles cumpeides da denant à fat vedei ite che per avei na idea plu clera méssen tó en consciderazion l maiour numer complet de dac che la cumpeida nes ofresc. Tl 1990 y tl 2000 àn demé damané ciun che é l lingaz miour conesciù y chel che vegn doré deplù pro la comunicazion familiara y pro l laour. Rodunt olàche l rumanc vegn rejoné deplù àn la maiour desferenzia anter les zifres di doi resultac: da 12% a 34%, da 8% a 25%. I rumanc che rejona miour l todesch ne rejona rumanc no te familia, no sun l laour. Al é plu saurí vedei imigrés rejonan rumanc con i vejins, tles comiscions, ti cors... che chi che rata l todesch sie lingaz miour conesciù.

     Per fortuna é la situazion mioura de chela che an veid da les cumpeides. Sce n comun mostra su n 50% de chi che rejona rumanc, spo pòn zenzauter raté che la zifra ruva sun 70%-80% y chi che capesc l rumanc sun l 75%-90%. Chest pòn dì aladò dla enrescida fata da radio-tv. N bon 40% dla populazion grijona capesc l rumanc y almanco 100.000 persones te duta la Svizra rejona rumanc.

Gion Giachen Furer