benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Lege 482/99: al cioda l manarin dl sparagn
scrit ai 06 November 2006 da les 06:50:43 da noeles

Politica

 

Les ativités culturales dl Istitut "Cesa de Jan" metudes al pericul

Sce al ne vegn nia fat comedures pro l decret "Bersani" tres la lege finanziara - Enfin a ciamò nia de segur

de Lorenzo Soratroi

L manarin dla lege finanziara dl govern Prodi é enjigné a taié ju bendebot de sondla ence pro les alogazions finanziares a les mendranzes. La ousc é defat tl famous y contesté "decret Bersani" (publiché sun la gaseta ofiziala n.135 dl 4 de messel 2006). Tl articul 25 végnel determiné avisa les reduzions da porté ite tles previjions de bilanz  trienal dal 2007 al 2009. La scurteda preveduda é de 1.813.273 euro per l ann 2007, de 1.929.359 euro per l ann 2008 y de ben 4.387.405 euro per l 2009.

Dr. Domenico Morelli, president dla Confemili, é fident che valch se lasce ciamò storje al miour.



      Al trata de n tai a la lege 482/99 che reconesc y sostegn per l prum iade tla Talia les mendranzes storiches (tredesc endut ), ti metan a desposizion vigni ann plu o manco 10 milions de euro. Les previjions dl govern é de arbassé chesta alogazion de plu dl 50% te trei agn. Plu che tré n pue l ciol se tràtel chilò de suié su dut y de paralisé gran pert dles ativités culturales y de les fé morí ciamò dant che ales peie raijes, p.ej. i prums projec de introduje l ladin tles scoles publiches che la lege 482/99 à empermetù ence tla provinzia de Belun. Piec: al vegnissa metù a rise l’esistenza di doi istituc ladins (chel de Col y chel de Borcia de Ciadoura) nascius propi per merit dla lege 482/99 y che peia do tres chesta i finanziamenc (endut valch plu de 200 mile euro al ann) per paié l personal, i cursc de ladin, les publicazions de libri, per envié via portines ladines ti ofizes publics y archirides. Les assoziazions culturales che raprejenteia les mendranzes se à samben atira fat audí pro l govern Prodi: desche pruma anter dutes l "Comité 482" che abina adum plu de 30 assoziazions ladines y slovenes dl Friul. "Plu de 50 agn a la longia" scriv l comité te na letra maneda ai capigrups tl consei regional, ai parlamentars dl Friul y ai aministradours locai, "ne ti à i governs che à avisé la Republica Taliana mai dé atuazion al articul 6 dla costituzion: "La Republica straverda tres normes aposta les mendranzes linguistiches". Al á volù ester agn de batalies y de sacrifizes per ruvé a la lege statala 482/99, che ne vegn dutaorela nia aplicheda te doi setours fondamentai: chel dla istruzion y chel di media. Sen, ciariejia sun la tourta, volessa l govern talian enchinamai arbassé de truep ence chestes alogazions "da la meseria" prevedudes da la  482/99, bele dassen rers per corì les speises de aplicazion dla lege medema."

      Da Roma, végnel splighé dal dr. Domenico Morelli, president dla Confemili (l moviment confederatif dles mendranzes ) cie che al é suzedù. "L govern ne à fat nia auter che tó ca dutes les speises di agn passés, dezidan de les taié dutes cantes, zenza deguna descriminazion, dl 20%. Ma les alogazions prevedudes pro la lege 482/99 é bele l minim per ti permete a les mendranzes de souravive. Al é n budget che an ne pò nia aziché, zenza rísien de mete en dube enfinamai i derc zivics y l medem sens dla lege." Morelli é endere fident y dij: "I é bele enconté l sotsecreter a les mendranzes on. Ettore Rosato y l aconsiadour dl Minister Linda Lanzillotta y trami me à empermetù che an pò comedé." N emendament en plu pro i milesc y milesc bele prejentés a chesta finanziara che descontenteia duc.

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.535 seconc