La Ladinia y i films, 4 seires a Bulsan
4 films: "Tanz der Vampire", "Ci co cunta", "Metropolis", "Flucht in die Dolomiten" y "Aquanitis" dai 8 ai 29 de november, vigni mercui
En mercui, ai 8 de november métel man “Ladiniafilm”, la lingia de films, che la Consulta ladina dla Zité de Bulsan met a jì deberieda con l Filmclub tla Streitergasse a Bulsan y che mostrarà vigni mercui de november films che à da en fé a valch maniera con les valedes ladines. I films é vegnus realisés tles valedes ladines o da autours ladins o à l contegnù che à da en fé con l lingaz ladin o la cultura ladina. Obietif dla lingia de films é chel de cherdé a la atenzion dl publich da Bulsan la prejenza ladina tla produzion cinematografica internazionala y da chilò. I films vegn mostrés tl lingaz todesch o talian o con les scrites sotcà per todesch o per talian.
"Tanz der Vampire" (1967), na pert dl film é gnuda touta su te Gherdeina.
L prum di films é l classich „Tanz der Vampire“, de Polanski dl 1967 che é en pert vegnù realisé te Gherdëina. L’introduzion a chest film vegn fata da la documentazion de Matthias Höglinger che ti é jù do, coche regist y mut di patrons dl hotel te chel che la troupe de Polanski stajova, ai laours de realisazion dl film. Prejent sarà ence l autour enstes Matthias Höglinger.
La lingia va inant ai 15 de november con trei films curc de registes locales. Tla fiction ”Ći co cunta” porta Valentina Kastlunger dant la vita de joegn dla Val Badia che fej mujiga moderna zenza se desmentié de sies raijes y tradizions. Da vedei saràl ciamò l portrait de Traudi Messini dl grafich y moler Egon Rusina, sciche ence l documentar de Ingrid Runggaldier sun la linguista y scritoura Frida Piazza.
La terza seira, ai 22 de november podaràn vedei n auter classich: al se trata de „Metropolis“, n film de Fritz Lang dl 1927 arangé da nuef con mujighes de Giorgio Moroder tl 1984. Chest film é jù tla storia dl film sciche prum film de fantascienza y é ruvé con l arangement de Moroder a na popolarité nueva.
La lingia de films se ruva spo via en mercui ai 29 de november con doi films de regissours de Gherdëina: de Peter Mahlknecht l film “Aquanitis”, realisé dl 2006 con la prejenza en chesta seira dl autour enstes. L auter film é de Luis Trenker, per chel che Giorgio Bassani y Pier Paolo Pasolini ova scrit l liber dles scenes, dal titul „Flucht in die Dolomiten“; chest vegnirà mostré te sia verscion tla rejoneda taliana dal titul “Il prigioniero della montagna“.
