En recordanza de Sergio Masarei
Duta la comunité fodoma y l mond dla cultura ladina s’à archité enchestadì per tó comié dal maester Sergio Masarei, vegnù a mancé do na longia malatia. Sergio Masarei fova nasciù dl ’43 tla frazion de Chierz y entratant duta sia vita àl laoré per tegnì vif l ladin ta Fodom.
Do les scoles ta Fodom òvel fat les mesanes a Bornech y spo l Istitut Magistral a Persenon. Al à scomencé a ensegné tl 1963, canche ta Fodom fòvel ciamò scoles tl Vijiné delà: a Ornela, a La Court y a San Jan. Dal 1967 enfin al 1988, ann che al s'en é ju en pension àl ensegné a La Plié. A les does generazions de scolars che al à vedù passé sot a d'el, ti àl trasmetù duta sia vueia y sia pascion de ensegné y trasmete la cultura ladina. La medema pascion che el ova metù tl scomencé via "L Feral ", l prum sfuei ladin da Fodom che ti à spo lascé lerch, dl 1972, a La Usc di Ladins. A cef dla redazion da Fodom per trenta agn, Sergio à fat a na moda che la Usc ruve te n bon terz dles families. L raport plu aut anter i abonés y la popolazion de dutes les vals ladines. Ma tles families él ence ruvé gran pert de si libri, da chi per i mendri y les scoles, a chi de storia, o per se tripé tl temp. Sies memories y sie testament cultural ova lascé da puech tla publicazion, drucheda te does edizions, "Tosat da nnier". Pont de riferiment per duc chi che volova savei valch de cultura ladina da Fodom, al à fat pèrt de diejenes de comiscions y de grups de laour per la Generela, i Istituc Culturai. Aconsiadour dl’Union di Ladins da Fodom enfin dai prums agn, àl porté la ousc fodoma foravia te sentedes y pro congresc, tres referac de aut valour cultural. Al ova ence metù su la sezion da Fodom di donadours dl sanch che al à spo porté inant per feter trenta agn desche secreter. Duc recorda Sergio desche na persona severa, prezija, ma che savova da se daurí fora dant a chi che ti damanova n consei. Con el él tomé demez una na seva dla cultura ladina. Al resta si scric y si laours, l entusiasm y l idealism, fonz segur olàche ai podarà se empoié y jì inant chi che encuei é clamés a porté inant la cultura ladina te duc si aspec. (ls)
Persones: medaia de reconesciment per Sergio Masarei
