benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Simpose dl Moviment Politich Ladins a Colfosch
scrit ai 03 October 2006 da les 19:19:02 da noeles

Politica

 

Les rejons de na politica autonoma

La Court Costituzionala à confermé doi iadesc chesta rejon - Endò na publicazion te doi idioms: desmazé dinés che podessa gní adorés miec a ben dl ladin - I todesc de Sudtirol scraiova "Volk in Not" con 1000 outes deplù, ai ladins ne ti conzédei nia

Simpose dla Lista Ladins en sabeda a Calfosch - simpose y dí de formazion politica. Al é gnù envié esponenc dl Moviment Politich Ladins, ma ence ghesc' esterns per fé referac, dé impulsc, fé analises. Carlo Willeit à auzé fora l debujegn de n moviment politich autonom di Ladins, per che n grup etnich entier ne side nia fant de n auter grup. La Court Costituzionala a Roma à confermé chesta rejon doi iadesc, à recordé Willeit.

Willeit Carlo (a mandreta): la Court Costituzionala ti à dé rejon al Moviment Politich Ladin en cont dla lege litala.

Mateo Taibon (a man ciancia): i ladins é n popul manacé. L ladin vegn rejoné tres piec, ajache al ne vegn nia ensegné endretura tles scoles. 

 



      Georg Moroder, aconsiadour de comun de Urtijei, à conté dles dificoltés che i "Ladins" enconta ti conseis de comun, con na maioranza che proa de i tegnì fora tant inant ch'ala va. Sc'an dij valch normalmenter, ne te métei nia averda, sc'an va ite endere con manieres plu energiches, spo díjei: Cie fajeise pa n tel gran spetacul, i podeis ben l dí normalmenter.


      Gnù traté él ence la chestion sce l ladin sie n popul manacé o nia dal reladour Mateo Taibon. An à volù ti proibí ala Lia per i popui manacés da se impegné ence per i ladins. N politich dla SVP volova na tel limitazion dl'ativité, y ence sun n cert foliet che ti à l senn ai ladins y é portaousc dla denigrazion sistematica él gnù ataché chesta lia. I ladins é n popul manacé aja che sia carateristica culturala prinzipala é al pericul: l lingaz. Sc'an deura les oredles y aud sciche la jent respon te intervistes, rejona sun streda y te familia (te Gherdeina gonot l todesch), spo él cler che l ladin é manacé. Can che i todesc fova cotant manco manacés fòvel ben "Volk in Not" - i ladins ne podess mai dì nia.


cristina de grandi - ladinCristina de Grandi á mané ite n referat sun l'importanza dles unions culturales. A chestes volessa la politica dla maioranza ti proibí da tó posizion sun la politica. Ma al é demé unions "a-partitiches" - ma nia a-politiches, ajache les chestions culturales á dagnora ence na raisc politica. Na proibizion da tó posizion sun chestions che reverda l destin de lingaz y de cultura ladina n'é nia azetabla. Chela de volei ti proibì posizions politiches a defendura dl ladin é n'aspirazion totalitara, á dit n prejent. Segn de chest é ence l tentatif da desfé l Moviment Politich Ladins tres na legia litala aposta y sun mesura; y segn de chest é ence la criminalisazion di ladins, che vegn metus fora sciche de gran delincuenc can che ai se damana les rejons plu fondamentales che vigni mendranza al mond se damana.


      Luigi Chiocchetti, assessour regional a les mendranzes, à auzé fora che sia prejenza pro l di de formazion di "Ladins" ti gnirà dessegur da valch pert trata dant. Al à spo rejoné dles normes de sconanza di ladins y á ence auzé fora sciche l president dla provinzia de Trent, Lorenzo Dellai, à encorajé i ladins de chirí na maiour unité. N tema da el trat ca y spo debatuda dedò é sté chel dla conferenza dai ombolc. Per na conferenza di ombolc ne jível nia debujegn dla lege 482 dl 1999, à dit Chiocchetti. Sun chest argoment él gnù debatù cotant dedò. Carlo Willeit à sotrissé che i ombolc é demé emissars dl partí de maioranza y n'á nia la legitimazion dl litadour. No ti conseis de comun, no sun i programs dles lites él valch che reverde i contac interladins. Al é porí demé n'operaziun por scluje fora la Union Generela.
      Gnù rejoné él ence dl lingaz unifiché, dl debujegn de n lingaz unifiché y dl fat che chi che é contra l lingaz unifiché ne l fej nia per tegní alaut l'idiom de valeda, ma per sostituí l ladin con l todesch. Enscì á na persona conté co che ala se sta te Gherdeina con l ladin: Chesta persona dla Val Badia é gnuda envieda a tegní n referat via en Gherdeina: per todesch ti él gnù dit, ciuldí che i gherdeines ne vuel nia capí l'idiom dl'autra valeda.

     Gnù sotrissé él da Lois Trebo che al é sen endò gnù fora na publicazion te doi idioms - chest vuel dí desmazé scioldi che podessa gní touc ca per d'autres mesures a ben dl ladin. Debatù él ence gnù dla scola "ladina" - che n'é deguna scola ladina, sciche n partezipant à sotrissé: chest terminus é propaganda. La scola dles valedes ladines é todesch-taliana. Empruma á l partí fat dles dutes per mete su scoles porì todesces tles valedes ladines, á dit n partezipant, dedò endere se tòlei l mirit sc'al é empò valch de ladin laite y la met enfinamai fora sciche scola ladina. Ence l'ultim liber dé fora dal assessorat a la cultura ladina á chesta propaganda tl titul. Degugn n'é ruvés adalerch dla SVP: la tatica é chela de dagnora, chela da ignoré i ladins, da i emarginé, á dit n partezipant. Y da i criminalisé, à dit n auter. Defat, da agn án na campagna de denigrazion y criminalisazion.

 

 Lege litala: les does muses dla SVP

 Sentenza dla Court Costituzionala sun la lege litala tla provinzia de Bulsan (1998)

 

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Simpose dl Moviment Politich Ladins a Colfosch (ponc: 1)
da EDellago ai 05 October 2006 da les 17:00:32
(Infos sun l utilisadour | Ti mané n messaje privat)
Per chel che reverda l ntervent de Luigi Chiocchetti, pudessun pa savei l inuem dla persona badiota nvieda te Gherdeina a tení n referat y l inuem dla persona de Gherdeina che ti ova dit che l muessa rujené per tudesch, prei bel?


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc