benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladin dolomitan – ladin standard: retrospetiva y prospetives - III. pert
scrit ai 28 September 2006 da les 22:01:41 da noeles

Ladin Standard

 

L ladin dolomitan: propostes de svilup

Lignola de articui linguistics metus adum dal prof. Dr. Vittorio Dell'Aquila - va inant te deplù pertes - III - fonetica

Azenc - Desche i on dit dant, mess n sistem de scritura ester saurì de lieje y scrive per chi che sà y rejona l lingaz duc i dis. Donca la notazion grafica di azenc tonics mess ester limiteda demé ai caji olache sia mancianza podessa reduje la clareza dles formes y crié confujion anter paroles desferentes y, tl cajo de n lingaz de mendranza, ne méssela nia ester en contrast con l sistem de azenc di lingac dominanc: per l locutour de n lingaz romanich é i azenc na sort de "jonta", gonot secondara, al vocal sun chel che an l scriv y ne va mai sun n consonant. Deplù, tl raion olache l talian é lingaz de referiment, vegn i azenc dorés per scrive i dialec, che ne à nia na tradizion scrita, per ti mostré a chi che ne i rejona nia coche l dialet mess vegnì pronunzié.

Vittorio Dell'Aquila, autour di articui.



Per l ladin, che vuel ester n lingaz ence scrit y con na popolazion ladina bona de rejoné siei idioms, é la notazion doreda dal ladin dolomitan, baseda prinzipalmenter sun chela dl talian, otimala y saurida da emparé. La unica critica che an pò fé scemai é chela de avei lascé demez l azent ti plurai di partizips con y : formes sciche *vegnùs per vegnus, plur. de vegnù o *vestìs per vestis, plur. de vestì, ence sce ales ne essa foneticamenter nia debujegn de n azent grafich, fajessa sia declinazion plu regolara.

Consonanc sibilanc y palatai
      Anter les opzions proponudes y doredes ti tesć ladins tradizionai per la realisazion grafica dl consonant sibilant palatal sourt [ʃ], é chela aproveda tles regoles dla Comiscion per la unificazion dla grafia dl 1987[1] y encuei en doura per l ladin standard y per duc i idioms ofiziai de valeda - c.v.d. /sc/ dant vocal palatal o te final de parola, /sci/ dant vocal velar y /s/ dant consonant - dessegur la plu azetabla da pert dla popolazion, alfabetiseda per talian o per talian y todesch, ence sce ala ne é nia scempla no linguisticamenter coerenta. Les autres propostes, dutes analisedes da Schmid tla Wegleitung, é endere, per rejons desferentes, da lascé fora[2]. S con haček - /š/ -, soluzion bele adoteda per l fascian tla pruma perioda de revival etnich ti agn '60, o dal ladin de Anpezo, ma de derivazion "classica" ladina tl ciamp dla lessicografia y dla politica linguistica ativa[3], é foresta a la tradizion scritoria dl talian, dl todesch y de duc i lingac romanics.
      L'opzion a la todescia /sch/ fossa steda plu coerenta ma essa messù comporté na revijion totala dl sistem de scritura di consonanc palatai e velars - tla maioranza dles grafies tradizionales ladines, sun l model dl talian, h fej velar y nia palatal, l c y l g da denant. La soluzion plu coerenta y saurida anter les cater, de scrive [ʃ] a l'ingleisa con /sh/, teoricamenter preferida ence da Schmid[4], é ence chesta plutost foresta a la tradizion ladina - ence sce ala é steda doreda da desvalifs autours ladins, dal Kalender ladin dl 1915[5] sciche proposta de grafia unitara panladina, tl dizionar badiot dl Pizzinini[6], y per l fascian anter i agn '80 y '90 - y essa ence chesta metù dant la chestion de [ʃ] preconsonantich.
      Manco problematica é la realisazion grafica dla oposizion sourt - sonour tl sibilant dental /S/: l sistem adoté dal ladin é l medem di majeri lingac europeans, sciche l todesch, l franzous, l'ingleis o l talian aldò dla pronunzia setentrionala, con n adatament ladin (ma nia forest te d’autri lingac) per la posizion preconsonantica. Al se trata de n sistem incoerent ma razional y dl dut natural per la jent alfabetiseda per talian o todesch: /s/ reprejenteia [s] tla posizion iniziala, postconsonantica y finala, [z] anter doi vocai, [ʃ] dant consonant sourt y [ʒ] dant consonant sonour; /ss/ semper [s] sourt; /ś/ l son sonour te posizion iniziala te cater o cinch paroles sciche śal y śen. Na alternativa plu fonetica y coerenta, sciche chela en pert en doura tl ampezan, olache /s/ é semper sourt [s], ence a l'intervocalich, /ś/ semper [z] sonour, y /š/ semper [ʃ] - te posizion prevocalica o preconsonantica - , é da dejaconsié sibe per sies dificoltés de letura sibe per la gran doura de diacritics: mesa 'messa' vegnirà plu saurì veduda sciche ['meza] che sciche ['mɛsa] enscì coche ['ʧaza], ['ʃtua] y ['faʃa] i vegnirà scrit te na maniera plu o manco irefletuda, per jent alfabetiseda per talian, sciche ciasa, stua y Fascia y nia sciche ciaśa, štua y Faša.
      Na autra bona soluzion pragmatica, che per sia bassa frecuenza - an la abina demé ti plurai di mascolins per -t y ti composć prefis + verb - ne influenzeia nia la strutura generala dl lingaz, é chela de scrive sciche /ć/ l son [ʧ] dapò [ʃ], donca /sć(i)/, per l decerne dal diagram /sc/ [ʃ]: desćiarié da des + ciarié o tesć, plur. de test.
      Tla Wegleitung ti dedicheia Schmid trei plates a la discuscion de chesta chestion[7]: dantaldut criticheiel l'adozion de n digram /sć/ percieche al é «non attuabile soprattutto con la normale tastiera italiana e contraddice una regola fondamentale che vale per tutte le altre lingue neolatine: uso di accenti soltanto sulle vocali, mai sulle consonanti. Inoltre, in Badia e Marebbe ć non designa il fonema [ʧ], bensì il caratteristico [c] "retoromanzo"». Dapò féjel does propostes desferentes: la pruma per [ʃʧ] te posizion finala - c.v.d. ti plurai -, che «pare decisamente preferibile, tanto piu che è stata considerata, spontaneamente, da molti Ladini e non Ladini, la soluzione migliore e più semplice, e che fino a non molto tempo fa era abbastanza diffusa, perlomeno in Val Gardena. Tale grafia presenta il vantaggio, al pari di stg (e shc)[8], di poter essere realizzata senza l'aiuto di segni aggiuntivi […] e di non creare problemi in prospettiva fonetica. […] Il piccolo svantaggio dato dal fatto che le forme plurali di sostantivi in -st necessitino una regola particolare […] è di poco conto rispetto ai numerosi vantaggi». L'autra proposta reverda demé [ʃʧ] tla posizion iniziala o interna: «Nel caso del composto l’impiego del trattino d’unione non è affatto fuori luogo e certamente preferibile all’inserimento di una -t -, la quale, in questi casi, potrebbe addirittura disturbare. […] Ecco perché consigliamo di scrivere s-c invece di stc in posizione iniziale ed interna. Esempi: s-ciavé, des-ciargé ecc., così come ris-cé (eventualmente ristcé, rishcé, rijcé?)[9]».
 
 


[1] Documënt final dla Comisciun por l’Unificaziun dla Grafia adressè ales autoritês dla cultura y dla scora, ales istituziuns y uniuns culturales y ales aministraziuns pùbliches. Union Generela di Ladins dla Dolomites, 1986.
[2] Schmid 1994 [2000], p. 18.
[3] Per na vijion generala dles grafies storiches ladines, cf. Kattenbusch 1994.
[4] «In base all’evidente maggioranza ed interpretando il desiderio della maggior parte dei ladini ci siamo decisi, almeno provvisoriamente, per la grafia sc[i]. Con ciò non disconosciamo che il grafema (sh), impiegato fino a poco tempo fa in Val di Fassa, rappresenta in teoria la miglior soluzione e eviterebbe certi gravi problemi» Schmid 1994 [2000], p. 18.
[5] Kalënder 1915.
[6] Pizzinini 1966.
[7] Schmid 1994 [2000], p. 19-21.
[8] Autres propostes descorudes fora da Schmid tl medem capitul (Schmid 1994 [2000], p. 21 y p. 20).
[9] Grafia atuala "sćavé", "desćiarié", "risćé".
 
 

 


 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 4.2
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.366 seconc