Nani Pellegrini, president nuef dl Istitut Ladin "Cesa de Jan"

La Ladinia da vedei: les tofles dant i paisc y dant les viles ladines de Fodom, Col y Ampez é sen dlonch per ladin dantfora

de Lorenzo Soratroi

Col de Santa Lizia. Coche an se spetova, Nani Pellegrini é gnù nominé enchestadì da l'assemblea di sozes president nuef dl Istitut Cultural Ladin Cesa de Jan. Al tol su la luegia dl prof. Vito Pallabazzer, president dl istitut enfin da sia fondazion dant doi agn che à dé ju l'enciaria per gauja di trueps laours olàche al é bele empegné. Al prof. Pallabazzer ti é jus i rengraziamenc di sozes per la colaborazion y tl medem temp ti él gnù reconesciù l'enciaria de president onorar dl istitut.

      Nani Pellegrini, da Fodom, é laureé te scienzes naturales y per trueps agn àl laoré pro la Comiscion dla Comunité Europea olàche al ova de gran enciaries tl ciamp dla archirida scientifica. Da tres enteressé y lié a la cultura ladina y a sia val de Fodom, él sté ence bele president dla Federazion di Ladins daite dal Venet y dal 2003 al 2005 president dl'Union Generela di Ladins dles Dolomites. Do agn de laour per enjigné ca dut, àl envié via en colaborazion con l'Union di Ladins da Fodom de chela che al é ence vizepresident, la scola de mujiga per mete su na banda de joegn ta Fodom, banda che do apeina doi agn da sia fondazion s'à bele dé fora con n valgunes esibizions. Con la banda él nasciù ence l'assoziazion che la porta inant y che à desche president tres Nani. Da nia desmentié sia produzion leterara che va dal ciamp dla mujiga a chel scientifich. En la medema seira s'àl abiné ence l Consei de Aministrazion dl Istitut.

      Tla senteda él gnù dezidù de envié via la publicazion periodica nueva dl Istitut che ti vegnirà maneda fora a la popolazion di trei comuns ladins storics. D'autri projec bele tl laour é chi de druché fora n valgunes publicazions per ladin per chi mendri, la prejentazion de november dl secont numer dla morona de libri dl Istitut y cursc nuefs de ladin via per l auton y l'aisciuda. L Istitut preveid ence de finì via l laour de mete su les tabeles con i inoms ti doi lingac entourn les stredes dl Comun de Cortina d'Ampez. Al resta ciamò da saré ite l iter burocratich y les tabeles vegnirà spo metudes ju dal personal dependent dl Comun de Ampez.

 

 Istitut Ladin Cesa de Jan: plans y projec

 Istitut Ladin Cesa de Jan: curs de lingaz aministratif

 Prejentazion dl vocabular dl ladin-fodom / talian-todesch

 Vocabular ladin-fodom: Relazion dl dr. Giovanni Mischì
 La pruma publicazion dl Istitut Ladin Cesa de Jan

 Col de Santa Lizia: Istitut Ladin Cesa de Jan

 Enaudazion dl Istitut Ladin Cesa de Jan a Col Santa Lizia

 Istitut Cultural Ladon: an ponta sun l ladin standard

 Istitut Ladin Ciasa de Jan a Col de Santa Lizia

 N terz Istitut Cultural Ladin