Viade a Tischlbong y Zahre tl Friul
"Co se sté saurí te scola" fova l tema
La Comunanza Ladina de Bulsan organiseia endò n viade cultural da d'auton de doi dis, sabeda 30 de setember y domenia 1 de otober, chest iade per jì a vijité les does ijoles linguistiches germanofones de Tischlbong/Timau (situé damprò al jouf de Monte Croce Carnico/Mont Cros Cjargnel/Plöckenpass) y de Zahre/Sauris (situé tla Val Lumiei soura l paisc de Dimpec/Ampezzo dl Friul). En sabeda, marena a Timau y dedò vijiteien l museum storich-etnich dla pruma vera mondiala che é damprò al restaurant.
L paisc de Zahre tla Val Lumiei.
Plu tert jonse a Zui/Zuglio (8 km soura Tumiec/Tolmezzo) a fé na vijita viseda al conesciù museum zivich “Iulium Carnicum” olà che an pò vedei reperc che reverda la storia dla Cergna dal Mesolitich inant. Da seira ruvonse tla val Lumiei pro l Alberch Restorant panormaich “Morgenleit” situé amez l paisc de Dörf/Sauris dessot, olà che i ston a ceina y a dormì. L dì do, domenia, jonse da les undesc a scuté pro la Messa tla gliejia situeda n puech soura l restorant y dedò podonse tò contat con les autorités dl Comun de Sauris (Gomande van der Zahre) y fè na vijita al paisc. Dò marena jonse a vijité l Zenter Etnografich de Plozn/Sauris dessoura (Haus van der Zahre).
L priesc per tó pert a chest viade é de 70,00 euro per i sozes dla Comunanza y si familiars y 85.00 per duc i autri (la marena en domenia, 1 de otober, é da paié extra).
A chest viade, an peia via dant la senta dla Comunanza via Roen 6 da les 8.00, ései enviés de cuer duc i ladins y aderenc; chi che vuel tò pert é priés de se anunzié al numer de telefon 0471-952197 de Ivan Lezuo.
Program: Sabeda, an peia via da les 8, tres la val de Puster y chela de Lander/Höhlenstein ruvan a Carbonin olàche an fej paussa. Dedò inant enfin al lech de Misurina, spo Plodn/Sappada y da les 12.30 rùven a Tischlbong/Timau. Spo inant desche descrit dessoura. Arciaseda a Bulsan da les 20.00
