benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Survey Ladins: convegn a Trent-Vich
scrit ai 16 September 2006 da les 17:03:59 da noeles

Ladin Standard

 

Les valedes ladines sot ai rais X

dl "Survey Ladins" - Sen àn fosch sun blanch dac per valuté miec la situazion linguistica - La politica y les istituzions dess tó les dretes dezijions

de Domenico Volcan

Al é sté trei dis de debatiment, de aprofondiment,  ma tamben y dantadut saràl n pont da pié via tl davegní di ladins dolomitans per vardé inant sia cultura y  sie lingaz. I trei dis dl convegn "Survey Ladins - la situazion linguistica di ladins dles Dolomites" à scomencé en mercui da denant tl palaz dla Provinzia a Trent y é ju inant en vender y en sabeda tla gran sala dl Museo Ladin te Fascia. Trei dis de gran emportanza sibe per la cualité dles relazions portedes dant che per l nonze di reladours che à tout pert.

La lista dles priorités per la Ladinia conéscen sen miec, dantfora na politica linguistica unitara per dut l raion ladin.



      "Survey Ladins, la situazion linguistica di Ladins dla Dolomites" é n projet che é pié via dalonc tl temp, tl 1998 canche an à dezidú de fé chest stude sun endrez di Istituc ladins dles valedes, dl'assoziazion Heilmann, dla Union Generela di Ladins dles Dolomites, dl Zenter plurilinguistich de Bruxelles sot al coordinament dl "Centre des Etudes linguistiques pour L'Europe". Ti doi dis de convegn a Vich él gnù porté dant n grumon de dac. An pò dì che les valedes ladines - da Moena a Cortina, passan per Badia y Gherdeina, Col y Fodom - é gnudes metudes sot ai rais X: l convegn  à metù sun meisa i aspec de majera emportanza di studes. Valgamia trueps reladours à rejoné entratant chest convegn y an pò dí - a pert valch desvalivanzes de vedudes - che duc à sotrissé sia emportanza, ti dán n gran valour al stude sun la situazion di Ladins dles Dolomites per tó dezijions.
 
    Vittorio Dell'Aquila, linguist y coordinadour de chesta archirida, liej positivamenter dut l laour fat te chisc ultims agn y ti dà bendebot de emportanza a dut cant cie é vegnù abiné adum per conesce miec la situazion reala di ladins dolomitics. Dell'Aquila: "L ladin desche lingaz y desche sentiment de partegnuda é ciamò valgamia fons y perchel ne é la situazion dessegur nia ciamò daldut grieva y foscia. L stude à metù en cler oláche al bat plu sterch l "cuer ladin",  p.ej. tla Val Badia, a Selva y a Mazin y olàche al é plu debel: Urtijei é plu ladina-todescia. Les periferies desche Cortina d'Ampez y Moena se fej ert a tegnì su la rejoneda." Dai studes végnel fora ence clermenter che la tripartizion politica anter Trent, Bulsan y Belun é n fatour dassen negatif che vegn fora dlonch. Ma l ladin é n lingaz vif che sent chestes desvalivanzes da val a val, da paisc a paisc, y nia enultima anter todesc y talians. 
 
 
 
     
     L prof. Gabriele Iannàccaro, professour univesitar de linguistica y tamben coordinadour de chest stude dij che "finalmenter onse n stude general a livel linguistich, soziologich, antropologich y geografich sun la Ladinia Dolomitana y da chilò, con duc chisc dac, pòn pié via con tó dezijions per l davegnì, metan dant na politica linguistica unitara".  "Al se trata de dac d'utl per les istituzions, per les scoles y per duta la comunanza en general. L ladin é dutaorela bendebot enraijé y demé i ladins pò stravardé chest patrimone. Bele da mete man atira pòn fé zeche per cialé inant con plu fidenza. Zenza ti tó a vigni valeda sies carateristiches déssen svilupé inant zenza se entardivé n sistem de scrive valif per duc i ladins. Al é de gran emportanza che i ladins ne encrouje nia i brac, ne fajan nia o ciamò piec che ai " vive sun i aurers", desche an dij per talia. Al va debujegn de truep debatiment, de propostes y dantadut de na maiour colaborazion anter les valedes. Chest me pèr la cossa plu emportanta", sotlinieia Iannaccaro.
     L Convegn de Vich pieta na regoeta emportanta de studes, de enrescides y de valutazions per podei tó dezijions a ben de lingaz y cultura di ladins. Do chisc dis à istituzions y istituc zeche deplù tles mans per pensé cie che an pò pié a mans y  fé praticamenter y ai ne podarà nia plu tré fora vertoles.
 
 
 
 
 
 
 
 
 
 
Chisc é stés i reladours entratant l Convegn:

Gaetano Berruto: Situazions soziolinguistiches y sconanza di lingac de mendranza. Conscidrazions aldò la Survey Ladins;
Augusto Carli:
Glosses soura la Survey Ladins;
 Håkan Casares Berg:
Galizia y Ladinia: na comparazion soziolinguistica;
Nadia Chiocchetti, Vittorio Dell'Aquila, Luciana Detomas, Carlo Zoli:
Les ativités de enrescida y de planificazion tles valedes;
Jeroen Darquennes:
Corpus planning y mendranzes linguistiches: na reflescion de linguistica de contat sun l ejempl dl ladin;
Elena Dell'Agnese:
L pont dl geografer politich;
Gabriele Iannàccaro:
Bases metodologiches dla Survey Ladins;
Vincenzo Matera: Ideologies linguistiches y negoziazions identitaries. L mudament de codesc anter egemonies y marginalité;
Luciana Palla:
Enrescida soziolinguistica tles valedes ladines: conscidrazions dal pont de veduda de n storich;
Sabrina Rasom:
Idioms ladins: dac linguistics y soziolinguistics a confront;
Marcella Schmidt:
Survey Ladins: l pont de veduda dl geograf cultural;
Alessandro Vietti:
Domins y contesc' de doura ti repertores linguistics complesc: tentatifs per na modelisazion statistica;
Glyn Williams:
Analisa dles reis comunicatives y limitazions dla doura dl lingaz;
Wolfgang Wölck: La Survey Ladins: na valutazion critica.

 

 Plata internet dl Survey Ladins con orars, program y reladours  



 
Liams emparentés
· Deplú sun l tema Ladin Standard
· Chier te noeles


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 5
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.515 seconc