benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladinia: n grum de chestions davertes, ma degugn obietifs
scrit ai 14 September 2006 da les 19:09:27 da noeles

Politica

 

Al va debujegn de avei obietifs medems te duta la Ladinia

... cie funzion arà pa l organism de coordinament metù su dai ombolc?

de Riccardo Zanoner - vizepresident dla Union Generela

Zanoner RiccardoI volesse pié via con chest scrit da la letra dl signour Leonardo Cocciardi, ostier y maester de schi de Moena (foliet Trentino, sabeda 02.09.2006) y dal fuech simbolich di Scizers de Fascia a recordanza dl tratat De Gasperi–Gruber y dla despartizion di ladins per mete dant valch de mies conscidrazions.



      I vue prové de mete a confront chestes does scomenciadives per sie significat che personalmenter me sàl de vedei ite: da una na pert paleseia l signour Cocciardi critiches envers nost model sozioeconomich che i nes on dé y che aldò de sia minonga  à porté nostes montes a deventé na sort de “disneyland dolomitich”; da l’autra l grup di scizers che à volù sotlinié  y recordé l spirit di ladins dl Sela dant da sessanta agn, canche al fova gnù sotescrit l tratat De Gasperi–Gruber.    

  Chisc doi entendimenc me fej pensé y me fej damané d'entournvia ciun che é encuei l status sozial, economich, cultural, l sentiment de identité y de partegnuda dla jent ladina. Dl 1946 mirova les aspirazions di ladins dantdadut a l’unité teritoriala, al reconesciment politich de sia identité, de sie lengaz y de sia cultura, a n’autonomia bona de ti respone ai bujegns soziai y economics de chestes nostes pueres valedes da mont, a n’aministrazion che fossa bona de porté inant l svilup turistich dles Dolomites acioche la jent de chestes valedes ae l muet de se mioré y de avei vantajes y benefizes.
 
      Te dant a dut chest me damani sce encuei i proponimenc souradic pò ester ciamò atuai, o miec sce an pò i tò endò cà y i atualisé con se damané cie che i on fat realmenter te chisc sessanta agn respet ai entendimenc da enlaouta?
 
      Dessegur che te chisc agn nosta comunanza à fat de biei varesc inant: i on abù n gran y fort svilup turistich, l’economia te nostes valedes encuei é sterscia, les Dolomites é deventedes una dles maioures zones turistiches de dutes les Alpes y ence per cie che reverda l reconesciment cultural-identitar de mendranza linguistica, enceben che con certes desferenzes, podonse dì che i ladins é stés reconescius y ai à si derc, sibe tles valedes che pò gode dl’autonomia che ence olache l’autonomia ne é, olache purampò él ruvé adalerch la lege statala 482/99.
 
      Aboncont someiel encuei che la jent ladina sie do a vive na sajon nueva, ala vuel se mete dant domandes nueves. Al pèr che al é do a se mueve fora na vijion critica nueva, na maiour coscienza di limic dl model sozioeconomich che i nes on dé: plu avisa someiel che nostes comunanzes se damane sce fosc te chisc agn onse “vaghé demassa”, sce i son jus sourafora, sce cie che enier podova significhé svilup y progres ne  nes conduje encuei ben nia devers de na sort de “regres”. Al someia che la jent dles Dolomites ti ciale al sistem economich atual con na certa critica y ence na certa insoferenza, an sent la tema de vedei jì endò nost muet de ester, i son do fosc a perde y a nes arlontané dal raport y dal liam con nost teritore che zacan fova fondamental y emportantiscim y che dutaorela encuei raprejenteia la ressoursa primara dal pont de veduda economich de nost benester. I vue dì anter l’auter che chisc aspec nes vegn metus dant ence da nosc ghesc’, rodunt i turisc’ veid te nosta sozieté jì a perde cerc valours liés a l’ambient, a la cultura y al sentiment de partegnuda.
 
      Te dant da dut chest donca a mie vedei les critiches, les minonghes, la scomenciadives y les propostes che vegn inant te nostes valedes cognessa vegnì comentedes y nia gnì lascedes te n cianton, gnì ridicolisedes y desmentiedes: alencontra creii che encuei messéssen mete dant na ocajion nueva de confront, n moment de debata y de aprofondiment per chirì de entene i fins, la valuta y l significat s-ciantif dles idees che ciutia fora chilò y enló. A chest revert vedessi de gran utl ruvé a mete en pé na “Meisa torona”  daverta al debatiment y al confront, sibe a livel de val che interladin, olache al podessa vegnì tout su les problematiches y les propostes che reverda nost raion y nostes comunanzes; na meisa de laour che podessa nasce da chela comiscion nueva metuda adum dai cater ombolc ladins che raprejenteia dutes les valedes. De chest vers pensi per ejempl che an podessa descore fora adum la chestion dl trafich y dla mobilté te nostes valedes, dla proposta dla Provinzia de Bulsan de arferé i auti su per i joufs metan su n ticket, i pense a chi placac che é vegnus metus fora te Gherdeina olache ti vegn dit ai ghesc’ “ammirate la nostra terra ma non acquistatela”, i pense al manejament tl davegnì de ressourses naturales desche l’ega y l teritore, i pense a la letra dl ostier da Moena Leonardo Cocciardi olache al dij clermenter tant negatif che ala é la gran cumpeida de lec te Fascia (beleche 60.000) y de coche al vegn desfruté, do sia minonga nia dalvers, les montes y i creps che someia na sort de model “Disneyland”.
 
      Personalmenter creii che te chisc prums agn de chest milené nuef sonse do a vive i resultac y i efec de chel che é vegnù fat y produt ti ultims cincanta agn, sibe en positif che en negatif, y al é plu che giust che nosta sozieté se metessa dant domandes, che ala posse avei na vijion nueva, ence critica, de cie che al é vegnù fat metan dantfora ence chel che ne va nia, i limic o cie che pò comporté efec de desvantaje.
 
      Da me enfora, aldò dl ejempl dl 1946, jìssel debujegn de daurì na sajon politica nueva per i ladins, n manifest nuef interladin con la capazité de abiné adum aspetadives, domandes, pensiers, analises, a scomencé dal mond zivil y sozial de nostes comunanzes, enfin a ruvé a les aministrazions y a les istituzions, acioche an posse abiné adum i bujegns di ladins dl doimile dal pont de veduda sozial, economich, cultural y identitar.
 
      I creie ence che al posse ester de utl, apede corajious, ruvé a laoré fora n program con l obietif de daurì na sajon nueva anter i ladins fata de proponimenc nuefs y de prospetives nueves bones de nes fè laoré fora deberieda linies politiches y programatiches nueves ence de termen lonch, da sen a cinch, diesc, vint agn, a na moda da podei avei obietifs medems deberieda per l davegnì.
 
      Aldò de chest, l’endesfida politica da mete a jì, ence de gré a nosta autonomia de valuta y autoritoula, fòssel ora de ruvé a planifiché, manejé y te valch caje ence comedé la prospetiva evolutiva de nostes valedes te n cheder unitar y coordiné, bon de nes fé jì inant per seghité a mantegnì y a arseguré ence tl davegnì l benester sozial, cultural, identitar, economich y ambiental de nosta jent ladina dles Dolomites.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Ladinia: n grum de chestions davertes, ma degugn obietifs (ponc: 1)
da Jepele ai 16 September 2006 da les 08:38:55
(Infos sun l utilisadour | Ti mané n messaje privat)
Sce i scizeri de Fascia la miena veramenter senzier devers de chestions ladines, meti n GRANDISCIM PONT DE DOMANDA? Ai se à lascé tré ite da la propaganda todescia dl "Schützenbund" con fé fuech y e.i. zenza ne àn mai audí valch.
Ai scizeri tla Val Badia o te Gherdeina, che ne à nia da fé con chi da zacan con si spirit, me pèrel che al ti sae plu bel de se vestí mondures, de marcé, de sclopeté valch bot en les gran festes... de fé dut per todesch, scí ai é enfinamai promotours de na ona nueva de todeschisazion, che veid tl passé na situazion "ideala", sceben che i ladins ne fova mai gnus reconescius sot al Tirol o sot a la Austria da enlaouta. Ai fova ence sot a Tirol despartis su aministrativamenter, valeda per valeda per i tegní ju y per i glotí miec. Ai fova sotmetus sot al vedl Tirol a na politica agressiva de germanisazion che volova enfinamai ti scrive dant de adoré l todesch te gliejia, dut cosses documentedes fosch sun blanch. Valch de ladin tólon encuei demé ca canche ala ne va nia autramenter .... Scizeri tles valedes ladines, nemisc di ladins? A chesta domanda méssen ciamò respone.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.373 seconc