benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ladin Standard: II. pert - Porta sareda per l ladin standard?
scrit ai 11 February 2003 da les 10:34:45 da feir

Ladin Standard

 

I badioc capesc miec LS che gherdeina

de Lois Trebo

Sun l lingaz ladin standard él vegnù scrit truep y chi che à volù, à podù se informé a fonz. Nia a duc ne i pléjel, davia che ai ne veid nia ite sia funzion o an ne vuel nia la capì y emplù ne se dài nia ju empera. Na pert vuel nes batolé dant che l LS dess ester de dann ai idioms de valeda, ma chestes é ciacoles zenza fonz. Degugn ne fossa per l LS, sce al fossa contra i idioms locai, degun studié ne rejona de chest, no les 4 istituzions che l porta. Chi che é contra l LS ne adora nience sie idiom local, é n gran pert persones che ne rejona nience ladin te familia, ma l à da temp taché sun na brocia y perchel é sies critiches zenza fondamenta. Rodunt con l LS giatarà i idioms plu forza, ai vegnirà arichis de paroles nueves y se sviluparà inant per na maioura adoranza scrita locala.

Sun l retrat: L Consei provinzial da Bulsan y sies ativités presentés ai ladins te ladin standard




Duc sà che i Istituc Ladins MdR y de Fascia ova dl 1988 enciarié l prof. H.Schmid da Turic da laoré fora na sort de lingaz ladin unitar che podessa jì ben per dutes les cinch valedes ladines dles Dolomites. Chest laour dl prof. Schmid é spo vegnù dé fora dai doi Istituc Culturai dal 1998 sot al titul " Wegleitung für den Aufbau einer gemeinsamen Schriftsprache der Dolomitenladiner" che fossa per ladin " Diretives per crié n lingaz de scritura comuna per i ladins dles Dolomites". Da fé n tel laour se vedòven cherdés y obliés do che l lingaz ladin fova vegnù reconesciù dal stat l ann 1989 " lingaz ofizial dles aministrazions publiches". Bele dal 1994 fòvel nasciù l projet Spell ( Servisc de planificazion y elaborazion dl lingaz ladin) y i portadours de chest projet é dutaorela: la Union Generela, i doi Istituc Culturai y l Istitut Pedagogich Ladin. Chestes 4 istituzions se cruzia y se festidiea di scioldi y dl personal che an à y che dessa laoré sun chest projet.

La funzion de l Spell:
Les finamires che an volova y vuel arjonje con laoré fora l LS fova y é chestes:
  • se sparagné l luxus da finanzié y adoré tl medem temp trei idioms ofiziai per la medema funzion;
  • na spidiceda di idioms conduj a n endebeliment de vigni idiom, deache al mancia l personal cualifiché per adaté vigni idiom ales esigenzes da encuei;
  • i ciampanii fossa da lascé perde;
  • laoré fora na koiné con les carateristiches comunes de dutes les valedes ladines a na maniera che vigni valeda se identificheie con l ladin standard;
  • dé fora un n lingaz ladin de scritura che duc capesc;
  • l ladin standard desche lingaz unifiché dess ofrì na garanzia per la conservazion y l svilup di idioms locai enstesc;
  • laoré fora, renforzé, promueve l ladin standard per arjonje l obietif de na politica culturala ladina soula che i dae a la popolazion ladina plu peis, plu crdibelté y na identité interladina a se sentì na soula familia ladina;
  • l ladin unifiché dess ester per duc i ladins n fatour de integrazion, de unificazion, de autoidentificazion;
  • duc i ladins dess podei se sentì da ciasa te chest lingaz unitar zenza messei lascé da na pert sie idiom; vigni ladin pò pronunzié l lingaz unifiché aldò dles carateristiches de sie idiom local;
  • l lingaz ladin standard dess ester n lingaz tet che tol ite les formes carateristiches de vigni idiom ladin, n lingaz pont danter i idioms de valeda, n lingaz scrit y nia rejoné.

Raspan adum dutes les forzes, do nia de piceres stritaries y critiches à l Spell te chisc agn fat n bel y gran laour che al à podù i mete dant ala popolazion sies creatures :

  • al à dé fora la Gramatica dl Ladin Standard y
  • l Dizionar dl Ladin Standard, laours dret stimés y respetés da la scienza y da trueps ladins.

Chestes does publicazions che an giata ti Istituc Ladins desmostra cie laours scientifics che personal ladin é bon da fé sce al i vegn metù dant da laoré sun n ciamp nuef apeina braiscé. Con chisc laours é valgugn studiés ladins vegnus esperc te n ciamp che ne fova autró mai vegnù roncé. Al é demé da speré che chisc laours posse jì inant sot la direzion dal dr. Erwin Valentini de Badia che laora da 30 agn pro la Comiscion dla Union Europea a Luxemburg sun l ciamp dla linguistica europea y à fat l laour da diretour dl Spell con gran empegn y idealism. Les 4 istituzions à deliberé da fé inant con l Spell y an spera che l contrat nuef posse tost vegnì firmé y che persones competentes y interessedes a chest ciamp posse laoré con pesc. Les istituzions ne starà nia demé sun de beles paroles. Con l laour Spell vegn nost lingaz ladin y con el i idioms locai modernisés, ma al vuel ester na majera y mioura colaborazion danter les istituzions culturales y politiches de dutes les valedes ladines, sce i laours dessa porté fruc, vegnì aprijés y spo adorés. L LS àn podù lieje plu iadesc te articui vegnus publichés tl foliet ladin; scialdi duc é a una da confermé che al é saurì da l capì, che al sona dut auter che forest, ma scialdi da ciasa. I badioc capesc l LS plu saurì che i idioms dles autres valedes y chest dij dut. Da crié l LS à i esperc tegní cont dl prinzip de maioranza y dla frecuenza dles paroles ladines ti singui idioms, dla trasparenza y dla originalité. Dessegur ne ti ài nia fat a scusa a duc, ma chela ne va pù nia. Emportant él che l LS ae les carateristiches de nosc idioms sie tla forma che tles paroles y chest pòn odei tl vocabolar nuef. Tl vocabolar dl LS él dlongia la parola unificheda ence i idioms de val per mostré su desche an à fat da crié l LS. Al LS n'él deguna alternativa, davia che i ne podaron nia cis giut jì inant con la adoranza ofiziala de 2- 3 idioms ladins. Les istituzions politiches dijarà tost - chest nes costa de massa, dé fora l medem test ofizial per vigni valeda separatamenter. L idiom local vegnirà adoré inant zenza perde fonz, ma l LS pò vegnì adoré olache al regneia sen demé l talian y l todesch y chest reverda i ciamps dla economia, dla scienza, dla tecnica, dla aministrazion. L LS é na proposta, na pruma sporta, al é n lingaz de scritura y nia rejoné.


 
Liams emparentés
· Deplú sun l tema Ladin Standard
· Chier te feir


L articul plu liet te chest tema Ladin Standard:
Dal latin al ladin: storia dla evoluzion dl lingaz ladin


Valutazion dl articul
Cumpeida mesana de oujes: 3.90
Oujes: 11


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.362 seconc