benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

60 agn Contrat Degasperi: i ladins ne à net nia da festejé
scrit ai 11 September 2006 da les 19:27:09 da noeles

Storia

 

Contrat Degasperi-Gruber dl 1946

Scialdi entorta la touta de posizion de Mussner, dut sun la lingia de Degasperi per cie che reverda la chestion ladina

I dis passés él gnù recordé i 60 agn dl Contrat de Paris. Plates speziales é gnudes publichedes per la ocajion recordan i fac storics con valch interpretazions. Dapert di ladins àn podù lieje la minonga dl assessour Florian Mussner, de Georg Mischì, de Hugo Valentin y d'autri. Les minonghes va endalauter: valch un auza fora la iniziativa de Ampez l ann 1945 (Zent Ladina Dolomites), entratant che Mussner ne la nomineia nience.

Degasperi-Gruber: acordanza soura i cefs di ladins. Bele sot a l'Austria fova i ladins talians, donca zenza rejons particolares.

60 agn contrat de Paris con i ladins manajés y adorés da strument: la sconanza internazionala y la parité de derc sun la cherta almanco à arjont i ladins empermò con la sentenza n. 356/98 dla Court Costituzionala dl 1998 contra la volenté politica de stat-region y provinzia.



      Scialdi entort l titul dl scrit de Mussner: "I ladini, prima tutti fuori, poi tutti dentro lo statuto", ence sce al rejona demé di ladins tla provinzia de Bulsan. Nience recordé i ladins da souramont y i fascians, é dessegur l frut de sia lingia politica y dantadut de sie mandat desche assessour che pò demé traté realtés provinziales. Per Degasperi fova duc i ladins, ence chi tla provinzia de Bulsan talians. La firma dl tratat fova ence gnuda a se l dé ajache la Austria y la SVP à renunzié ai comuns ladins de souramont y de Fascia, ensce sce rodunt chisc se à fat audí l plu con manifestazions. De chest vers é Mussner dutaorela sun la lingia de Degasperi, almanco i ladins fora dla provinzia de Bulsan é y resta talians. Al ti plej sie folclor, ma politicamenter ne còntei per el nia y ai ne dess mai pensé de ruvé ciamò pro Bulsan. Mussner é n gherdeina y la SVP de Gherdeina la à tres penseda a chesta moda. Ciamò dant da puech à dé da entene n ombolt de Gherdeina che Fodom, Ampez y Fascia é miec che stae olàche ai é y che ai ne dess nia pretene de giaté n toch de "nosta tourta". Pensiers de auta politica.
      Hugo Valentin recorda che i ladins ne é nia gnus nominés tl test dl contrat de Paris, ma de ei él gnù rejoné souradut per merit dla Austria y di raprejentanc dla SVP, partí che ova apeina n ann de vita. Che l contrat de Paris sie a la basa dla autonomia de Sudtirol y de sie statut, chest é fora de discuscion. Che autonomia y statut ae na tel emportanza per i ladins tla provinzia de Bulsan mess empermò gní demostré. Tl prum statut dl 1948 gniva i ladins apeina nominés. L gran saut per i ladins suzed tres l secont statut de autonomia (pachet) dl 1972. L secont statut é l frut dl dialogh democratich. Tla democrazia, tla bravura de n valgugn esponenc politics da trames les pertes, da chela todescia y da chela taliana. Davia che i ladins tla provinzia de Bulsan fajova pert de chesta autonomia messòvei podei gode di medems derc di talians y di todesc. Ma cie fadia y cie pazienza ruvé a chest travert. An dess se recordé che dut depen dal sacrifize di ladins, da la plaia dla divijion di ladins.
    
     L contrat de Paris é vegnù a se l dé tres la despartizion di ladins che Mussner confermeia deplen. Ampez, tant atif tl 1945per resté unis a duc i ladins, la à deda su, pensan plu gen a la economia y tres chesta pèrdela ence sia identité. La medema storia ti tocarà ence ai autri ladins, ajache da soui, valeda per valeda, él imposcibel podei se mantegnì. Ence i "gran ladins" tla provinzia de Bulsan che viv ti gran zentri: Bulsan, Maran, Persenon, Bornech, s'en é bele jus. I joegn deventa talians o todesc. I rumanc dla Svizra cresc ajache ai é unis y che ai à sie teritore. Ence per ei é la economia y la prejenza todescia n pericul, ma ei à bele sie sfuei da vigni dí, ai à sie lingaz scrit unitar, l Rumanc Rumanc, per indiché sia unité linguistica. Te chest vers é Mussner sclut ju completamenter aladò de sia lingia politica che reconesc demé i ladins tla provinzia de Bulsan. I rumanc à n radio y na televijion dassen svilupés y al vegn ence rejoné de politica y nia demé de folclor, turism y sport.

Sce te picera stua él ence gnú rejoné di ladins pro l contrat Dagasperi Gruber dl 1946 à ben puecia emportanza, ajache tl contrat enstes ne ései endut ne nia gnus conscidrés.Clermenter à entramidoi i sciacheri azeté la teoria dl ladin-dialet neolatin talian che à bele daidé giustifiché la anescion dl Trentin Südtirol do la Pruma Vera. Che la teoria fova faleda desmostra bele doi agn dedò l prum statut de autonomia oláche ala ne jiva nia da mete sot a un n ciapel i ladins con i talians o con i todesc. No perchel che an ti essa pa dé plu lerch ai ladins. La figura dl terz grup tla autonomia à empermò metú man da gní plan plan a lum con l secont statut dl 1971 y se à svilupé tres la scola, l proporz y la cumpeida dla jent ti agn 80 y con l lingaz ofizial y les raprejentanzes y ghiranzes politiches y giuridiches di agn 90 y 2000, con les reformes costituzionales dl "terz statut".

      Te dut chest prozes é i ladins restés endò y te na posizion dependenta per cie che reverda la sconanza dla mendranza y dl grup linguistich, nia demé per gauja dla mancianza de volenté da pert dl stat y tamben da pert dla Region y dles Provinzies autonomes (dutes les normes de atuazion é gnudes sciacaredes fora y Region y Provinzies à enstesses fat n grum de leges zenza conscidré endretura i ladins), ma ence per gauja dl picé original dl contrat Degasperi Gruber che ne à nia tegnú cont di ladins. Empermò la Court Costituzionala ti à dé dl 1998 (sentenza sun la lege litala de Sudtirol n. 356/98) - 52 agn do l contrat de Paris- plu valivanza y segurté a la sconanza di ladins, dijan che ai à l dert da sté adum, da se raprejenté enstesc con les garanzies internazionales che la mendranza todescia y i autri grups à tl Trentin Südtirol. Ma co se stala mo mai realmenter con nostes segurtés do 60 agn dal contrat de Paris? La unité di ladins é sun la cherta, tla realté é la despartizion dal 1919 gnuda renforzeda da les autonomies democratiches. I ladins de vigni provinzia y region à sia sconanza, miour achilò, plu scleta danlò, ma cie che conta, vignun é encadré te n sistem politich -aministratif y sozial-cultural desvalif y ben nia a la pèr dla maioranza taliana y todescia. L lingaz ladin à na lerch scì o no dl 10-20% tla scola y formazion, tles relazions publiches y ti mass- media.

      La autoraprejentanza politica y aministrativa é combatuda de vigni vers, dantadut da pert dles provinzies che conzentreia dut l podei y les finanzes publiches. (Sce i ladins essa abú sia dreta raprejentanza politica ne essa i ombolc nia renunzié dl 1964 a n certl lital ladin, dl 1988 a na miour sconanza dl lingaz ofizial, dl 2000 a de mioures garanzies tl statut de autonomia). Dla raprejentanza pro signoria y de na proporzionala plu daverta per i ladins ne réjonen nience. Te chesta situazion é l maiour pericul, la endormia, la passivité di ladins enstesc sun l viade de na miour sconanza de sia unité y identité. Da fé festa per recordé i 60 agn dal contrat Degasperi-Gruber ne à i ladins deguna rejon, sce ai ne vuel nia ti fé festa a chi che i à tegnú ju 60 agn a la longia.  (c.w.)


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.376 seconc