benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Urtijei: l comun scod ICI sun l vert entourn ciasa
scrit ai 11 September 2006 da les 18:07:46 da noeles

Gherdeina

 

L comun de Urtijei scod ICI sun "cubatura teorica"

... y deida enscì indiretamenter la speculazion edilizia che an vuel fermé

Ultimamenter  él vegnù publiché deplù articui sun l foliet Alto Adige pervia dl fenomen “Speculazion edilizia a Urtijei y te Gherdeina en general.” Da pert dl Ombolt de Urtijei y de S. Cristina él ence vegnù tout posizion sun l argoment. Jent anonima,  ma nience tant anonima de Urtijei, à metù encantourn jolantins che é  stés la gauja dles polemiches sun les zaites. L ombolt de Urtijei Moroder Ewald dij che al n’é nia saurì a fermé la speculazion, ma che el fej ben dut cie che se lascia fé.

A Urtijei végnel ence raté sun l vert entourn ciasa via la couta ICI.



     For da nuef tòlel ca l mesc de Peza che el dij de avei salvé da la speculazion. Chest é n fat singolar che sarà ben dret, ma n’é dessegur nia l meso per fermé la speculazion, i comuns ne po dessegur nia compré su dutes les ciases vedles o i teraces da fabriché per ne i lascé nia jì te mans forestes. Cie po pa  fé i  comuns concretamenter per saré ite n puech la speculazion?

      Dantaldut n’él nia da fé paié la ICI sun la cubatura teorica che un à ciamò a desposizion sun sie terac olache el à sia pruma ciasa. Chest terac che un à entourn ciasa via é da calcolé na pertinenza urbanistica dla ciasa che é bele. I savon che sce un à n toch de grunt da fabriché  che ne taca nia pro ciasa méssel paié la ICI, ma sce al se trata dl terac entourn ciasa via, poester ciamò con valch servitù a favour de vejins o de terzes persones (azes a la ciasa di vejins, distanzes da les autres ciases o situazions urbanistiches che ne permet nia de fabriché) ne dess l comun nia se damané l 5 x1000 de ICI sun valours che va  da 258 a 361 € al m²  aldò olache al é l terac (zona residenziala A, B, o C ). Chesta é na burta maniera de ti tò i scioldi ai zitadins, al ne vegn nia duré che un à ciamò n puech de vert entourn ciasa y a chesta maniera ne féjen nia auter che sforzé i zitadins a does cosses:
   a) a fabriché fora duta la cubatura  a desposizion  sacrifican dut l vert entourn ciasa via;
   b) a vene l terac che é ciamò a desposizion a valch forest  per ne messei nia paié vigni ann  trueps scioldi al comun.
      Perchel él na gran ipocrisia chela che i partis SVP/ Lista Urtijei  perdica encantourn. Sce ei é senziers con se enstesc méssei vedei ite che fajan enscì ne féjen nia auter che mené soura ciamò deplù la spirala dla speculazion edilizia te nosc luesc. Trueps comuns de nosta provinzia ne se enfidassa nience tl some de  fé paié si zitadins ICI sun chisc terac. Una na cossa é ben clera, per talian dìjen dret ben “an ne pò nia avei la bot plena y la femena cioca“. Al é cler che l comun mess mefo ciafié con n puech de manco scioldi, ma cie é pa miec? Avei n grum de scioldi a desposizion y se lamenté che al vegn venù a talians o avei n puech  de manco scioldi te cassa y avei te  30/40 agn ciamò n puech de vert te nosc luech per nosc mutons i nevous?

Moroder Georg,  conseier tl Comun de Urtijei

 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.433 seconc