benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Val Badia:
scrit ai 10 August 2006 da les 14:01:30 da noeles

Cultura

"MISSION M.A.X." – n musical te deplù lingac per mutons y joegn

Do da meisc de preparazion y entratant edemes de laour con mutons y joegn éla finalmenter tant inant de prejenté l projet musical che l Servisc ai Joegn à metù a jì adum con la direzion raionala de scola ladina Al Plan de Mareo, con l Südtiroler Sängerbund y en colaborazion con l Istitut Cultural Ladin "Micurà de Rü".

Mission M.A.X.L musical dal titul "Mission M.A.X." vegnirà raprejenté en sabeda, ai 19 d’agost da les 19.00 y en domenia, ai 20 d’agost da les 15.00 y da les 19.00 tl salf manifestazions a San Martin de Tor. Protagonisc’ sarà mutons y joegn dla Val Badia.

Foto entratant les proes.



Bele dant da n ann él nasciù l’idea da mete a jì n projet musical daldut nuef per la Val Badia: sot a la istruzion de persones competentes dess mutons y mutans, joegn y joenes dla valeda fora per l’isté emparé ite n musical per podei spo ence l prejenté a n publich plu ampl – tegnan cont che l travert dl projet é l viade enstes y l svilup di partezipanc. Se dedican a n passatemp de na certa valuta ti dess vegnì daurì ai joegn les coltrines dl mond dl teater musical d’aorela curta olache ei pò ence desmostré y formé su talenc de chest vers: ei pò cianté, soné, joblené, balé – y emplù empàrei a conesce i ciamps desvalifs che auda pro na te produzion. Enscì pòi lascé ledia sia creativité pastelnan la scenografia, costums, placac, se dan ju con la sminca o emparé a conesce la complessité dla tecnica sibe dl ton sciche dles lums.

Mission M.A.X.Sciche coordinadour dl projet él vegnù giaté André Comploi da Al Plan che à studié musicologia y teatrologia y s’à denant dé ju con mutons y joegn pro projec tl ciamp dla mujiga. El é responsabel per l’organisazion y à ensegné ite i toc musicai che al à ence scrit enstes. Pro l leading team auda spo Barbara Rottensteiner da Algund che studia teatrologia y pedagogia y se dà bele da agn ju con la pedagogia teatrala, anter l auter tl « Zenter Pedagogich Teatral » da Persenon. Ela à scrit l toch rodunt per chesta ocajion, é la rejista y s’à pensé fora – en pert con les mutans partezipantes – les coreografies. La joena artista Ursula Tavella da La Val é responsabla per la grafica, à conzepì y pastelné con i mutons la scenografia, i costums y les recuisites.

L toch enstes é vegnù scrit te de plu lingac vegnus partis su tles scenes desvalives: todesch, ladin, ingleis y talian. Al se trata de n iade fantastich de doi joegn y de does joenes (« Mission M.A.X. ») sun chel che l protagonist Max davagna segurté de sé enstes y creta te se enstes superan de vigni sort de proes te posc’ desvalifs de nosta tera – dit sot al moto « crei te té! ».

I 25 mutons y mutans di comuns da S. Martin, da La Val y da Al Plan s’enconforta da prejenté a pici y gragn, a jent da chilò y foradecà cie che ai à elaboré tratant les cater edemes dl projet. La band y l’orchestra che i acompagnarà instrumentalmenter é metuda adum da musizisc’ joegn de duta la Val Badia (anter chisc ence Jean Daniel Granruaz) che sonarà duc volontariamenter. Les raprejentazions sarà en sabeda, ai 19 d’agost 2006 da les 19.00 y en domenia, ai 20 d’agost 2006 da les 15.00 y da les 19.00 tl salf manifestazions a San Martin de Tor. L’entreda é debant – na bona man é samben benveduda. (MMag. André Comploi, ls:if)


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 4.71
Oujes: 21


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


tema colié / temesc coliés

Manifestazions

Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.472 seconc