Ticket: ciuldì pàien pa les coutes?
scrit ai 10 February 2003 da les 18:50:26 da noeles |
|
L’introduzion dl Ticket ne deida nia smendrì les speises - protesta dla lista LADINS
 Bele canche l ticket è vegnù metù su dant zirca mez ann ova la Lista LADINS protesté y osservè che chesta mesura è sozialmenter ingiusta y che sies entredes è per l bilanz provinzial sciche na gota sun na pera ciauda. Sun n bilanz de 4,5 miliards de Euro desmostra sen i conc dles Aziendes Sanitares che les entredes dl ticket fej fora puech y nia, ma per la jent tocheda éles empò bendebot de grovaria.
La Lista LADINS recorda perchel che l’introduzion dl ticket voluda da la Jonta provinziala, en particolar dal President Durnwalder, n’à deguna giustificazion. Sce ala va bele debujegn de limité les speises publiches, fòssel ben naouta n grum d’ autres ocajions che tirass dant. Sparagné ite da valch pert 15 milions de Euro (chest végnel ca. ite dal ticket) ne messessa per na provinzia tan rica sciche la nosta ben n’ester degun problem. Al é perchel dassen da desplajei ch’al vegn endò n iade perié pro cassa rodunt cheles persones y categories de zitadins che à enscì y autramenter bele n grum de speises per la sanité. Al n’è ence tres deplù che se damana ciuldì che an paia les coutes, sce an mess spo empò ciamò se paié de sia gofa cerc servisc.
|
| |
Cumpeida mesana de oujes: 3.66
Oujes: 3
|
|
