benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Tarifes comunales: priesc di comuns n pue truep desvalifs
scrit ai 22 July 2006 da les 20:23:03 da noeles

Aministrazion

 

Coutes comunales: olà pàien pa demanco, olà deplù?

I comuns calcoleia enscì i cosc' per i servisc sciche ega da beive, eghes pazes, scolina, refudam y d'auter

de Monica Deiaco-Graefe

Aladò de n stude publiché a la fin de jugn dal Istitut per la promozion dl laour „AFI-IPL" arata l comun de Badia l import plu bas per cie che reverda la soma dles tarifes per l’ega da beive, les eghes pazes y l refudam. L’import plu aut ghira l comun de San Martin de Tor en confront ai autri comuns dles valedes ladines Val Badia y Gherdeina y chesta soma é enfinamai plu auta dl valour mesan provinzial. Les families paia endere per na muta o n mut che frecuenteia na scolina l manco tl comun de San Martin y l plu a St. Cristina. La couta "ICI" plu auta paia i proprietars de bens imobiliars tl comun de Corvara y l manco chi dl comun de La Val.



Vive te un o l’auter comun dles valedes ladines de Sudtirol á n cost desvalif. An podessa pensé che l cioment messessa avei dlonch l medem cost, o che al fossa dlonch da paié la medema couta sun i bens imobiliars per na ciasa che é grana unfat. Ma enscí ne éla nia. I comuns arata tarifes y coutes desvalives. Da capì él chest, sce al vá debujegn de condutes longes per l’ega da beive y sce chest ben tant prezious ne n’é te valch raion d'inrer da ciafé y mess ester perchel condut adalerch da dalonc permez a les ciases. Plu rie él endere da splighé sce les fontanes é damprò y l cost é empò aut. Les eghes pazes mess scialdi dlonch gní menedes tles sareneres y empò él chilò priesc truep desferenziés. Te chest caje él n valgugn aministradours de comun che ti dá gen la colpa ai cosć tant auc che les sareneres arata y che á da gní paiés.

"La cualité y la cuantité di servisc pités da pert di comuns de Sudtirol é auta", enscí met man la relazion de n confront sun les tarifes y les coutes aratedes da pert di comuns a si abitanc. L fin dl stude, metù adum y publiché dal "AFI-IPL" - l Istitut per la promozion dl laour", é de mete a confront les tarifes per l’ega da beive, eghes pazes y refudam, ma ence l contribut damané ai zitadins per corí les speises dles scolines, la couta comunala sun i bens imobiliars "ICI y l’enjonta sun la couta sun l davagn "IRPEF".

"Nostes tarifes é realistiches", dij l ombolt da San Martin de Tor, olache i aministradours comunai arata l import plu aut per cie che reverda la soma totala dles tarifes per l’ega da beive, les eghes pazes y l refudam en confront ai autri comuns dles valedes ladines de Sudtirol. I dac é contegnus tl stude dl Istitut per la promozion dl laour „AFI-IPL", che confronteia les tarifes di comuns. Tl comun de San Martin él na chestion de strutura, dij l Ombolt: "Sce i nes confronton chilò con l comun de La Val che á valgugn cenc de abitanc demanco spo podonse conscidré che la souraspersa de nost comun é dopla tant grana, les reis dles fognatures é granes, cheles dles eghes da beive é granes y i cosć de manutenzion é da nos cotan maiours. Sce i confronton i comuns turisticamenter ben svilupés, olache al é de gran cubatures tl zenter, sciche Corvara, Badia o Al Plan, enlò rúvel adum de gran consums de ega y enscì de eghes pazes. Danlò él i ostiers o les aziendes comerziales y artejanales che paia na gran pert y enscì é i comuns datant da tegní les coutes plu basses."

L turism n’á degun influs sun la tarifa dles eghes pazes, él scrit tl stude en chestion y: "al contrar dla minonga generala, él meso da constaté che les speises gaujedes dal turism vegn aratedes completamenter al gaujadour (hotiei, pensions o autri eserzizes che laora con sciors). Ence per cie che reverda l cioment (refudam) n’á i autours dl stude podù constaté deguna relazion anter turism y aument di priesc per i utenc privac. "Ti comuns con truep turism", él scrit tla relazion dl stude, "él da constaté n aument significant dles jutedes. Ma al é interessant constaté che la tarifa ne aumenteia nia per les ciases privates y che l aument dles speises ti vegn araté ai eserzizes turistics". Aladò di conc fac dai autours dl stude n’él spo degun influs dl turism o de autres aziendes sun les tarifes per l cioment dles ciases privates. Al contrar: te valgugn comuns con truepes aziendes àn podù constatè na reduzion dl cost per les tarifes dl refudam.

CONSUM tl ann 2005

Ega da beive

Eghes pazes

refudam

Soma

Orden

 

tarifa por 200 m³ tarifa/m³ (numer d'orden)

tarifa per 200 m³ tarifa/m³ (numer d'orden)

Tariffa per 1200 litri + 4 persones + 80 m² de spersa (numer d'orden)

 

numer d’orden tla classifica di 116 comuns

San Martin de Tor

52,00 €

212,00 €

94,00 €

358,00 €

87

 

0,258 € (42)

1,060 € (92)

(86)

 

St. Cristina

44,00 €

160,00 €

126,00 €

330,00 €

68

 

0,221 € (35)

0,798 € (44)

(101)

 

Urtijei

56,00 €

180,00 €

92,00 €

328,00 €

67

 

0,278 € (48)

0.899 € (62)

(82)

 

Corvara

67,00 €

148,00 €

106,00 €

321,00 €

60

 

0,340 € (67)

0,740 € (33)

(96)

 

La Val

40,00 €

152,00 €

81,00 €

273,00 €

27

 

0,200 € (31)

0,760 € (38)

(68)

 

Selva

21,00 €

170,00 €

**70 €

261,00 €

22

 

0,105 € (8)

0,850 € (59)

(43)

 

Badia

66,00 €

107,00 €

42,00 €

215,00 €

4

 

0,329 € (65)

0,535 € (4)

(5)

 

Al Plan de Mareo

*

218,00 €

45,00 €

 
 

1,088 € (96)

(8)

 

Valour mesan 116 comuns de Sudtirol

64,00 €

176,00 €

84,00 €

324,00 €

 

* consorc privac ** la tarifa vegn calcoleda aladò di metri cuadrać (80 m²) plu na pert variabla

Grafica: Monica Deiaco-Graefe - dac: „Afi-Ipl"

Les zifres dles tarifes per les eghes pazes y l cioment é autes a San Martin de Tor y ti la stica enfinamai al valour mesan provinzial calcolé fora. "La ousc che fej fora truep é les eghes pazes", dij l’Ombolt Dejaco, "tl Alta Badia - i comuns de Corvara y Badia - él n consorz dles eghes pazes con n implant che á na gestion separeda. Perchel esi bugn da tigní i cosć plu basc. Nos son tachés ite pro la sarenera de "Tobl" y i ne on nia na gran poscibelté de nes mueve. Dainlò él i cosć efetifs che é y nos messon paié cie che al é da paié. Les tarifes dla sarenera de "Tobl" é valgamia autes."

Les eghes pazes dl comun de La Val ruva samben ence tla sarenera de Tobl y messessa perchel avei apresciapuech i cosć che l comun de San Martin á, ma l ombolt de San Martin elencheia n valgunes gaujes a cie moda che chest ne é nia enscì: "L comun de La Val ne n’á da les pertes fora feter nia. Enlò él ćiamò dutes les condutes da fé y enscí végnel out fora cotant de manco eghes pazes. Nos endere on les condutes fates da Börz ju, da Seres o Fornela ju, da Jú ju o da Mirí ju. Da nos él bele dut taché ite. Al podessa ester che nos on ćiamò n valgunes eghes blances che ruva pro cheles pazes. Chilò podéssen ćiamò mioré."

95.000 m³ de eghes pazes vegn da pert di utenc dl comun de San Martin ma al ne ruva fora tla sarenera de "Tobl" zirca 160.000 m³, l 60 percent deplù. Aladò dla tabela d’auril dl 2006 dla sarenera de "Tobl" á l comun de San Martin mené fora 5,6 litri al secont de eghes pazes, per la La Val él gnù mesuré 3,2 litri al secont y Al Plan á n dat de 11,8 litri al secont. Per les scolines, da l’autra pert, ti arata l comun de San Martin a les families le priesc plu bas di comuns ladins. Y chest é dessegur ence n dat important y dandadut positif per les families.

Autonomia fiscala di comuns

Dal 2001 á i comuns n’autonomia fiscala. Chesta competenza de dezijion o ence dí che i comuns á plu responsablté ti confronc di zitadins. I comuns á a desposizion partides de entredes da coutes, assegnazions da pert de enc publics y da entredes per servisc, sciche: ega da beive, eghes pazes y refudam. La gran pert dles entredes di comuns vegn indere da pert dla Provinzia de Balsan. I mesi destinés ai comuns vegn calcolés aladò de na cuota per vigni abitant. Tl 2005 él gnù conzedù a vigni comun con enfin a 10 mile abitanć n import de 424 € a persona. Per chest ann él prevedú n import de 434 € a cef.

D'inrer se rend i zitadins cont che tles tarifes aratedes él dovia de gran cosć de investizions y de laours de manutenzion. Ma l’autoura dl stude, Isabel Teuffenbach, aconsieia ai aministradours di comuns de pensè a longia veduda y de se pensé fora conzeć creatifs per l davegní. "L fin dess ester", enscí él scrit tl stude, "de sparagné con i mesi materiai a desposizion y de pité empò trueps servisc de cualité tegnan cont dles entredes basses dles families y dles persones che á debujegn”.

Ega da beive

En conformité con la lege mess l comun corì l 90 percent dles speises per l’ega da beive, les eghes pazes y le refudam cun les entredes dles tarifes aratedes ai abitanć. L consum efetif dla ega da beive vegn mesuré con compedadours aposta. Per les ćiases zenza compedadours da mesuré végnel araté n consum de 70 m³ per persona. N valgugn comuns de Sudtirol á prevedù n arbas dl cost dl ega da beive per les ciases che adora puecia ega y che deida enscì a sparagné chest ben. Na ezezion é chiló l comun de Braies, olache al ne vegn araté nia per l consum de ega da beive.

Ti comuns de Corvara y de Badia costa l’ega da beive l plu en confront ai autri comuns dles does valedes ladines. truep de manco, manco de n terz, costa chest ben tant prezious ai abitanc de Selva. Ti autri comuns ladins costa l’ega plu dl dopl che tl comun de Selva. Degun dat ne n’él tl stude per cie che reverda l cost dla ega da beive tl comun de Al Plan de Mareo, ajache enlò él consorc privac che arata l priesc ai abitanc dl comun.

Eghes pazes

La tarifa dles eghes pazes vegn calcoleda en basa a la soma de doi imporc: les speises dla canalisazion y cheles dla sarenera. 30 % dla tarifa fej fora i cosć per les dejoutes y la purgazion dles eghes pazes fej fora l 70 %. Les tarifes aratedes dai comuns de Al Plan de Mareo y de San Martin de Tor de plu de 1 n Euro per m³ é bendebot plu autes dl valour mesan provinzial de 0,88 € per m³. A mez priesc - en confront di doi comuns badioć - é Badia, che ghira n cost de 0,53 per m³ y arata enscì l priesc plu bas di comuns ladins de Sudtirol.

Refudam

Dal 2001 encá ne onse nia plu na couta per l cioment che é gnuda touta ju tres l decret "Ronchi". Denant fòvel dlonch na couta pausciala y gniva calcoleda aladò dla souraspersa. Sen onse scialdi dlonch na tarifa y chesta é componuda aladò dl prinzip dl gaujament: con na pert fissa per la desmendrida dl cioment y na pert variabla che vegn calcoleda aladò dla cuantité dl cioment. L comun mess corì almanco l 90 percent di cosć de investiment y dles speises d’azienda. I comuns á per lege la poscibilité de conzede reduzions.

I comuns de Badia y Al Plan de Mareo vegn elenchés tl stude anter i nuef comuns de Sudtirol che arata l manco. Badia ti la stica a duc i comuns ladins y arata a si abitanć l mez dl priesc dl comun de La Val, manco dl mez en confront ai comuns de Corvara, San Martin de Tor y Urtijei, y avisa n terz de cie che i zitadins de St. Cristina á da paiè per la medema cuantité. Te sies comuns de Sudtirol, anter chisc l comun de Selva, vegn ciamò na pert dla tarifa calcoleda aladò di metri cuadrać.

CIOMENT Tarifes 2005

tarifa per 1200 litri

Fis per 4 persones

tarifa per 80m²

Cosć variabli

cuantité minima preveduda per 4 persones en litri

Soma per 4 persones per ann

St. Cristina

70,80 €

54,76 €

   

960

125,56 €

Corvara

57,12 €

48,80 €

   

1.200

105,92 €

San Martin de Tor

72,00 €

21,60 €

   

680

93,60 €

Urtijei

43,44 €

48,48 €

   

720

91,92 €

La Val

61,08 €

19,67 €

   

720

80,75 €

Selva

 

38,00 €

32,02 €

720

70,02 €

Al Plan de Mareo

29,81 €

15,68 €

   

1.440

45,49 €

Badia

42,00 €

     

720

42,00 €

Valour mesan prov. (116 comuns)

 

83,70 €

Grafica: Monica Deiaco-Graefe, dac: „Afi/Ipl"

Ma na gran sperduda podessa avei i abitanc de duc i comuns dles valedes ladines de Sudtirol dal ann 2009 inant: canche ai cialará l cont da paié per l refudam, podessa chest ester trei enfin a cater iadesc maiour respet a encuei. Chest, davia che la Provinzia de Bulsan, plu avisa l’Ofize competent per l’utilisazion dl refudam, á prevedù che te n valgugn agn gnirá dut l refudam, de vigni comun, mané a Bulsan tl implant da burjé nuef che gnirá realisé tost. Cie che romagn, l cender, messará spo gnì endò mené zeruch tles desćiaries. Spo él da sperè che al ne sie nia demé aumenc tl davegní dl consumadour, sciche ence l aument dl trafich per trasportè encerch cioment fora per nostes valedes.

Scolina

Per la scolina á la Jonta provinziala prevedù na tarifa mascima de 75 €. I comuns stabilesc l’amonta dla tarifa per corì les speises per la cuega/l cuech, l personal che puzeneia, per l mantegniment di edifizes y i laours de manutenzion. La Provinzia ti alogheia vigni ann n import ai comuns y emplù contribuć per la compra de mobiliar, enjigns y patuc da fé bleita. L valour mesan provinzial dla tarifa per la scolina é de 48,90 €.

SCOLINA

2005/2006 - cosć per vigni muta/mut enfin a domesdí

2° mut

3° mut

San Martin de Tor

42 €

37,00 €

32 €

La Val

45 €

39,50 €

 

Al Plan de Mareo

54 €

49,00 €

38 €

Badia

55 €

46,50 €

44 €

Corvara

55 €

40,00 €

 

Selva

55 €

50,00 €

 

Urtijei

59 €

54,00 €

 

St. Cristina

65 €

55,00 €

 

Valur mesan provinzial

49€

   

Grafica: Monica Deiaco-Graefe - dac: „Afi-Ipl"

Grafica tabela „ICI": Monica Deiaco-Graefe, dać: „Afi-Ipl"

L comun de San Martin de Tor ti arata a les families 42 € per muta/mut che frecuenteia la scolina y á enscì l priesc plu bas dles valedes ladines. L cost plu aut él tles scolines de St. Cristina, olache l comun ghira 65 € por vigni muta o mut.

"ICI"

Dal 1993 inant pò i comuns apliché na couta sun i bens imobiliars, l "ICI". 13 comuns de Sudtirol ne arata deguna couta "ICI". Aladò dl ejempl tout cá per calcolé fora la couta "ICI" (pruma ciasa, valour catastal de 800 y categoria catastala A/2 - abitazion privata) ne végnel te 39 comuns de Sudtirol paié deguna "ICI" sun la pruma ciasa o abitazion prinzipala. Anter duc chisc comuns n’él deguna aministrazion comunala dles valedes ladines.

„ICI" 2005

I comuns pó calcolè anter 4 y 7 promile

Reduzion preveduda per la pruma ciasa

Import da paié aladò dl ejempl: "pruma ciasa", categoria catastala A/2 (abitazion privata) - valour catastal de 800

Corvara

5,0

210,00 €

210,00 €

Al Plan de Mareo

4,9

258,20 €

153,00 €

Badia

4,5

258,00 €

120,00 €

Selva

4,5

258,00 €

120,00 €

St. Cristina

4,5

258,00 €

120,00 €

Urtijei

4,0

232,40 €

104,00 €

San Martin de Tor

4,0

258,00 €

78,00 €

La Val

4,0

300,00 €

36,00 €

Balsan

4,0

258,00 €

78,00 €

Bornech

5,1

361,00 €

67,00 €

Grafica: Monica Deiaco-Graefe, dac: „Afi-Ipl"


 
Liams emparentés
· Deplú sun l tema Aministrazion
· Chier te noeles


L articul plu liet te chest tema Aministrazion:
Dal Ofize chestions linguistiches: does verscions ladines dl Statut de autonomia


Valutazion dl articul
Cumpeida mesana de oujes: 4.85
Oujes: 7


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc