benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Fascia: Moncion, la plu bela vila fasciana
scrit ai 11 July 2006 da les 19:14:42 da noeles

Fascia

 

Moncion festejeia la Segra de Sant'Ana

La gliejioula dla vila fasciana porta l medieje 1603 - Da 12 agn encà végnel fat segra - 22 y 23 de messel 2006

Moncion é una dles plu beles viles de Fascia: sia posizion desche sun n balcon ti dà ciamò plu fascinazion y l dret liam a la storia y a la cultura ladina de Fascia. N pice paisc de Fascia che ne vuel nia desmentié sia storia y sies tradizions y belavisa per chest végnel endrezé via da 12 agn encà la Segra de Sant'Ana, patrona de Moncion. Samben che sun Moncion él dagnora vegnù festejé Sant'Ana ma da 12 agn encà, per endrez de n grup de sentadins, végnel endrezé na segra con n rich program che vuel ester ence n moment de fradaia anter ghesc' y jent dl post.



      Moncion à na storia bendebot longia y vedlora: l document plu vedl dl paisc porta l medieje 1341 canche al vegniva rejoné de stritaries per les guires (les rejons) de pascul te Grepa y Ciamol anter i sentadins de Vich, Costa y Valongia da una na pert  contra chi de Delba, Ciampedel, Fontanac, Mazin y Moncion da l'autra pert. Moncion fova una dles trei "vejinanzes" che formova la regola de Pera che a sia outa fova metuda adum da sies lueghes de abitazion: Pera, Piaz, Rualp, Moncion Ronch y Sojal. Anter i personajes plu renomés de Moncion méssen dessegur recordé don Ziprian Zanet nasciù tl 1598 y ordené preve tl 1628 a Persenon dal vescul fascian Daniele Zen. Tl jì di temps à ence Moncion mudé sia economia y sie vive per ruvé a ester encueicondi n paisc enjigné ite per l turism ma tl temp medem temp n paisc che ne vuel nia se desmentié de sia storia y de sies tradizions. 
      La Segra de Sant'Ana sa Moncion pontarà via en sabeda, ai 22 de messel da mesdì con de bones speises y ceifs da zacan, da la una domesdì gniràl daurì i vedli tablés da na outa con na bela espoisizion de erc y mestiers da zacan, da les set da seira saràl da vedei n spetacul di "Schuplattler de Ciampedel" y da seira saràl da audì la mujiga da saut di Pazedins.  En domenia, 23 de messel, festa grana con la santa messa da les 11.00 tla gliejia de Sant'Ana y domesdì via gniràl porté dant i saluc dles autorités; da les cinch domesdì conzert dla Mujiga de Poza de Fascia: n bel moment de festa y de legreza lié a les tradizions fascianes y a la storia de Moncion y de sia gliejioula de Sant'Ana consacreda tl 1603 y ruveda enfin a encuei desche testemone de valours de fé y de liam anter la comunanza. Al é na ocajion per descuerje n toch de storia de Fascia y la Segra de Sant'Ana dà l muet de la conesce a na maniera plajoula. Per vedei miec l program pòn ence ti dé na odleda al sit www.sagradamuncion.3000.itDomenico Volcan.


 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 4
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.436 seconc