Chest ultim temp é sté per l consei dla ULG scialdi busient y empegnatif. Fora dles sentedes de normala aministrazion en él ence gnù laprò n grum de autres straordinares. Truepes autorités é gnudes te chestes ultimes edemes a conscidré l'ativité dla ULG, anter chisc l president dl Consei dla Provinzia Riccardo Dello Sbarba, l assessour dla Region per les mendranzes Luigi Chiocchetti, l assessour provinzial Florian Mussner, i ombolc dla valeda y l president dla Generela Michil Costa. Te deplù sentedes él gnù analisé la situazion dl Consei dl Museum.

 La Lista Ladins de valeda à abù n'enconteda con l consei dla ULG per rejoné dl davegnì dla Cesa di Ladins. 

      Do che l prof. Karlheinz Mureda à dé ju do belau 20 agn sia enciaria sciche raprejentant dla ULG tl consei dl Museum, y do che ence Ewald Karbon à lascé su si empegn tl Museum, fòvel sen gran ora de chirì doi inoms nuefs che raprejenteia la Union di Ladins de Gherdeina tl consei aministratif dl Museum de Gherdeina. La fortuna à volù che al é ruvé a lum doi candidac de gran savei. Al se trata de Marie Theres Thaler y de dr. Herwig Prinoth tramedoi de Urtijei. La joena Marie Theres é tl laour de fin‚ i studes tl ciamp dla storia dl'Ert y perchel scialdi adateda tl conzet museal nuef che l consei joen se à tout dant de mete en pe. Herwig Prinoth à studié geologia y se dà ju da trueps agn con la paleontologia y archelogia. Dessegur é ence el de gran utl per complet‚ con savei y profescionalité chesta sparta interessanta che tol ite na bela pert tl Museum de Gherdeina.

      La Lista Ladins de valeda à abù n'enconteda con l consei dla ULG per rejoné dl davegnì dla Cesa di Ladins. Tla enconteda con l president Heinrich Demetz deberieda con l Carlo Willeit y Georg Moroder él gnù sclarì la situazion sun l projet nuef de restruturazion y de ampliament dla Cesa. La cossa, coche an sà, se tira oramai alongia y é defin encompra y envadadleda. La Lista Ladins à fat la proposta de porté dant ti comuns dla valeda na mozion per daidé do ence a inom di comuns y chirì da la man publica dl luech ma ence da la Region y da Roma i finanziamenc. Al é bel canche ence i movimenc politics veid ite la emportanza dla Union y sà da apriejé sia ativité y se fej inant per l davegnì de na istituzion o de n fabricat dret d'utl.

     Do la gran enconteda di jornalisc' ladins a Coira tla Svizra él tomé la proposta da pert dl president dla ULG Egon Vinatzer, de mete en pe n criter nuef dla Ladiniatour. Al se trata de na raida de conzerc che ne vegnirà nia plu demé fata tla Ladinia dolomitana, ma che se daurirà a n publich y raion ciamò plu lerch. Vedù dantfora él de despartì su i conzerc: un ti Grijons tla Svizra, un tla Ladinia Dolomitica, un tl Friul y un bonamenter ence tl Agordin. Al podarà fé pera trei grups o ciantautours per raion. Chisc vegnirà chiris fora da les comiscions dl post. La ciantia ladina vegnirà enscì conesciuda y giatarà emportanza a livel internazional. La proposta é gnuda touta su positivamenter.