benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Intervista al regist ampezan Franco Vecchiato: la Pruma Vera
scrit ai 04 July 2006 da les 20:56:25 da noeles

Cultura

 

Recordé per ne desmentié nia

Intervista al regist ampezan, Franco Vecchiato, che à metù adum n documentar sun la Pruma Vera Mondiala tl raion de Ampez

Intervista de Monica Deiaco-Graefe

Franco vecchiatoFranco Vecchiato, regist, é nasciù a Cortina d'Ampez tl ann 1949. Al à studié a l'université de Padova olache al s'à diplomé enjinier eletronich. Franco Vecchiato à metù man sia formazion profescionala sciche operadour cinematografich y s'à spo dediché a la fotografia y a la rejia. Al é dozent de cursc per la produzion de films "curc" y de fotografia. Sies fotografies é gnudes metudes fora te galaries d'ert talianes emportantes. Franco Vecchiato comunicheia tres sies operes emportantes de realtés culturales, soziales, imprenditoriales. L regist é gnù zeruch dant da puech per abité endò a Cortina do trenta agn che al é sté demez.


 



Tragedies soportades con de gran sacrifizes, stories de vitimes, sciche ence fac y avenimenc suzedus entratant les does Veres mondiales vegn recordés ultimamenter te films, documentars, esposizions, libri, articui. Raions y localités olache saudés á combatù y museums che mostra esponac ciafa ti ultims temps tres de plu vijitadours. A Franco Vecchiato, regist de Cortina, ti onse fat n valgunes domandes perciuldì che la jent comemoreia con chest interes nosta storia.

Al é da constaté n gran interes per fac suzedus tratant la Pruma Vera Mondiala. Ciuldì ti végnel pa, do Vosta minonga, dé aldidancuei tant de
emportanza a chesta perioda tant tragica de nosta storia?
   Franco Vecchiato:
"Al é n dejider dret sentí che vegn a lum dal daite dles persones, al é l dejider per la vita. La persona da encuei, indezija, melsegura, chier l significat dla vita olache al l'à perdù. La pruma vera mondiala à amarscé l scomenciament de n mudament intensif tl'anima dles persones. Al é sciche jì zeruch a les raijes, a na provegnenza olache al é meso avei truepes testemonianzes scrites, fotografìes, films, stories. N fat che ne fova enlaouta mai suzedù denant."


Ence soura la Seconda Vera Mondiala végnel mostré y rejoné deplù. Él meso che al sie la spana de temp passeda che porte pro a volei capí cie che al é suzedù enlaouta?
   Franco Vecchiato:
"L temp deida a madurí, a ciafé n destach, enscì per podei osservé miec cie che al é suzedù zenza l pericul de gnì assalis da forzes o emozions pesoces y nia da controlé da pert dles persones enstesses. Al é sciche conscidré na contreda da dalonc: al é meso de brancé do tamben ai aspec negatifs che ence do chi positifs. An pò tó la dezijion de tegní valch o ence de l lascé via, davia che an á bele fat n'esperienza."

Co se desfarenzieia pa n tentatif de avejinament a fac suzedus dant tant de temp de na persona che realmenter á vivù na situazion de conflit sciche na vera mondiala y na persona che studia fac storics, che vuel demé s'insformé o enfinamai capí cie che al é suzedù?
   Franco Vecchiato:
"La desfarenzia esisteia sce an s'avejineia ai avenimenc demé tres l cervel y zenza sentiment. Sce an met da pert les barieres o i pregiudizes dl pensé él per vigni cossa che an enconta emportant de fé esperienza per la capí. Al ne jova nia studié enziclopedies per capí cie che na vera é, valch iade él ence assé contemplé na fotografia de n mus imobil de n saudé o de na ela, o cialé sciche na contreda é mudeda y audì. La conescenza é chestion de n aiet (atim). Per vignun él na cossa personala."


Jòvel comemoré la storia sciche meso contra na repetizion de n conflit y per mantegnì la pesc anter i popui?
   Franco Vecchiato:
"Al jova sce al vegn fat tla dreta maniera. N conflit sciche la I. o la II. Vera Mondiala á ativé energies dret stersces che degugn á sapù da governé. Evoché vuel dí cherdé, vuel dí zelebré. Al é miec lascé la cronica sterila dles cosses che conduj demé a na gran ferida. La jent ne vuel nia plu savei de mort, de stories vedles che ne finesc mai. Tres la mort pòn porté a la vita, sciche na gran renasciuda. A la fin vuel la persona ester viva."


Vos eis realisé n documentar soura la I. Vera Mondiala per cie che reverda la tragedia sozeduda a Cortina y vejinanzes. Co á pa reagí la jent do la trasmiscion dl documentar?
   Franco Vecchiato:
"Valgugn, do na pruma stima, é vegnus da mè per me damané do informazions storiches, olache n valgunes scenes é gnudes filmedes, o volova savei olache ai podova ciafé d'autres documentazions. Valgugn d'autri é romagnus zenza paroles do la prejentazion. N bel dì un de chisc m'é gnù permez con uedli plens de leghermes y m'à dit: 'i son nasciù entratant la vera, la seconda. Mia oma ne n'á mai volù me dí chi che mie pere fova, ala é morta zenza dì valch. Ie chire dutaorela mie pere."


I ves eis tout dant de realisé n documentar che conta ence i fac storics suzedus tles autres valedes ladines?
   Franco Vecchiato:
"I son tl laour de cueie adum la documentazion per la realisazion de mie film y al é nezesciar de ciafé ciamò truepes informazions per completé l projet. Dut l laour de racoiuda ciafará na sia posizion te n documentar per la televijion olache al gnirà rejoné truep dla jent ladina y de sia storia, de sies tradizions, na comunité che mantegn valours umans de valuta da partì."

Dret bel dilan dles respostes


 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Intervista al regist ampezan Franco Vecchiato: la Pruma Vera (ponc: 1)
da MateoTaibon ai 04 July 2006 da les 10:06:42
(Infos sun l utilisadour | Ti mané n messaje privat)
bela intervista, Monica.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.420 seconc