Noeles.net - Informazion ladina - Di dla Unité Ladina: recordanza ai 15 de messel a Cianacei

Dì dla Unité Ladina: l program dla Generela per i 15 de messel

RAI Ladina - Ressoluzion dla FUEN y prejentazion dl liber nuef, ELI-vocabular ilustré ladin

Ai 14 de messel dl 1946 ruvova adum sun l Jouf de Sela 3.000 persones per mostré su la volonté de comunanza anter duc i ladins. La Union Generela di Ladins dla Dolomites - UGLD vuel - aldò de si prinzips y sia funzion - auzé fora l’emportanza de chest di per i ladins. A livel istituzional se encontarà, en sabeda ai 15 de messel, dut l Consei dla UGLD per sotrissé ciamó n iade la volonté de comunanza di ladins, de na dreta sconanza per i ladins, dl debujegn de mantegnì nosta rejoneda y cultura ladina sciche l element plu sot de nost ester, desche ai ova fat nosc antenac tl 1946.

Dai 14 ai 16 de messel végnel tegnù a Cianacei la gran festa "Te anter i Tobié", che toca - sciche l diretour dl Istitut Cultural Ladin Fabio Chiocchetti dij - pro la memoria storica de nos ladins, che é n segn dl’anima dla jent che à enridlé nosc raions, na testimonianza dl raport anter natura y cultura.

L envit a duta la jent ladina y a duc chi che à la sensibilté y l interes per la cultura y rejoneda ladina é chela de fé pera pro chesta manifestazion a Cianacei "Te anter i Tobié", olà che al sarà meso de se enconté anter ladins y ence nia ladins, tl spirit de comunanza manifesté ai 14 de messel dl 1946.

I volesse perchel ves envié de cuer a la Enconteda dl Consei dla Union Generela di Ladins dla Dolomites UGLD ai 15 de messel da les 10.30 a les 12.45 tl salf dl stadion da la glacia a Delba - Cianacei. L'enconteda é partida su te does pertes. La pruma pert, olàche al é demé l Consei dla UGLD. Pro l’autra pert, da les 12.00 inant, saràl ence prejenc esponenc istituzionai y raprejentanc di massmedia.

Orden dl di:
1) L 14 de messel 1946. Testemonianzes.
2) La RAI Ladina, n meso de gran emportanza per la jent ladina. La UGLD se damana n ampliament en cont dl raion y en cont di temps de trasmiscion y l’autonomia dla strutura radiotelevisiva ladina.
3) Ressoluzion FUEN.
L'endoneda generala dla FUEN à dé pro la proposta de ressoluzion dla UGLD, olà che al é laite ghiranzes ence bele fates ai 14 de messel 1946, che é l impegn per na sconanza unitara di ladins, per na raprejentanza istituzionala, per l reconesciment dla UGLD, per n sostegn a La Usc di Ladins. Chest é l test dla ressoluzion dla FUEN:

Mesures positives de stravardament, unitares y garantides da la lege per les istituzions ladines de dut l raion ladin dolomitich, despartì te trei provinzies y does regions, con conscidrazion dles mesures de stravardament positives tl cheder dles Provinzies y dles Regions autonomes.
Reprejentanza istituzionala assegureda a livel de Comuns, Provinzies, Regions, Stat y UE.
Slariament dl bi- y dl trilinguism (sciche titul preferenzial y tl paiament).
Reconesciment dla UGLD sciche istituzion de coordinament per chestions dla mendranza te enc locai tamben autonoms che nia autonoms y ti raporc con l Stat (per ejempl sciche prevedù da la lege 482/99).
Ecuiparazion tl’assegnazion de contribuc dl foliet edemanal ofizial dla UGLD "La Usc di Ladins" ai sfueis da vigni di de mendranzes linguistiches.

4) Da les 12.00: touta de posizion en cont dl spirit dl 14 de messel dl 1946, dla Rai Ladina y dla ressoluzion FUEN, y prejentazion dl liber nuef per mutons, dal titul: ELI-Vocabolar ilustré ladin. Prejenza dles autorités y di esponenc di massmedia.

Da les 12.45 conclujion dl’enconteda istituzionala. Dedò:
marena en ocajion dla festa "Te anter i Tobié".

L president Michil Costa

Da desçiarié i files *.pdf:

1905 – 2005: la union dai ladins
Mostra itineranta


Vos ne seis nia loghé ite. [ Loghé ite ]