La Reina dles Dolomites se deleiga d'en gré via
Publicazion nueva sun la retrata dl glacier dles Dolomites, la Marmoleda, de Andrea de Bernardin dl Museum dla Gran Vera sun jouf de Federa
Na publicazion nueva de carater popolar vegn metuda dant dal Museum dla Gran Vera sun jouf de Fedaa sun la Marmoleda. Autour dla publicazion dal titul "Il ritiro del ghiacciaio della Marmolata" é l diretour dl museum de vera, Andrea De Bernardin, bele autour de d'autres publicazions, tres de carater popolar y liedes a la Marmoleda, a la storia dla Gran Vera y al mond dl colezionism.
Tant die podaràn pa ciamò vedei d'isté "La Marmoleda con sie ciapel da neif sunsom", desche na ciantia dij?
N liber per ne desmentié nia na plata de storia che à segné nazions entieres y tamben nosta arpejon ladina. L liber dé fora da les "Edizions Museo de Fedaa", rejona dantaldut dl glacier dla Marmoleda y de sia retrata ti ultims secui. Al é n glacier che à encuei, desche trueps glaciers dles Alpes, de griefs problems de "souravivenza". Ann do ann se deleighel tres deplù; n davegnì che ne é nia massa plajoul per la "Reina dles Dolomites". Duc se aoda samben che l svilup sie miour ti agn che vegn, ence sce duc i studiousc mess registré chest fenomen de retrata da ann a ann. La publicazion é emplenida de fotografies che mostra su avisa la storia dl glacier tres documenc che va en pert zeruch a la fin dl 1800 y che nes dà n paredl cler con la situazion dl glacier encuei. Dagnora tla publicazion végnel tamben rejoné dla storia dla Gran Vera sun la Marmoleda, dla storia dla stua da l'ega costruida ti agn '50, de vita y de persones che à laoré sun la Marmoleda tl ciamp dl turism y dl alpinism. Al é n liber che an liej saurí y che fajará dessegur conesce plu avisa chesta mont reina dles Dolomites. Al é ence n segn dl gran amour che lieia l autour a chesta mont. Al é da recordé che Andrea De Bernardin à bele daurí te chesta sajon 2006 l Museum dla Fedaa y che al é endò a la leta di ghesc´ y di paejans enfin a la fin de setember. L museum à sapù da valorisé dassen la Marmoleda y de porté dant na proposta de aut valour storich y cultural che vegn tres plu apriejeda y conesciuda encantourn. Al é n ejempl pratich de valorisazion dla Marmoleda desche ence l ombolt de Cianacei, Beranrdo Riz, scriv y se aoda tla prejentazion dl liber; n segn de respet per chest gran patrimone natural de nosc raions. Domenico Volcan
