benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Comun General de Fascia
scrit ai 22 June 2006 da les 19:37:06 da noeles

Fascia

 

L Comun General de Fascia mess sen se dé n statut 

L Consei Provinzial de Trent à prové ai 9 de jugn la lege de reforma istituzionala dl Trentin - Al vegnirà tegnù damprovia econtedes con i comuns y con la jent per definì l statut

de dr. Luigi Chiocchetti

L vender, ai 9 de jugn 2006, raprejenteia na data de gran significat per la Provinzia de Trent y n moment de valuta storica per la Val de Fascia: l Consei provinzial à defat aprové la lege de reforma istituzionala dl Trentin y la costituzion dl Comun General de Fascia. A la fondamenta dl implant de reforma él l debujegn de ti reconesce a la jent tles valedes dl Trentin n rodul de protagonist de sie teritore y de sie svilup con la coscienza de n fort spirit identitar local y dla volonté de partezipazion democratica dla jent y dles comunanzes locales a laoré per l Trentin de endoman.

L. Chiocchetti: "La Union Autonomista Ladina à dassen mené do per mete en pe l Comun General de Fascia".



Plu apede a la jent      
      N auter element emportant dla reforma é l debujegn, che ne daussa nia plu vegnì sperlongé, de na "destruturazion" dla Provinzia: chesta ne ruva nia plu do a gestì dutes les competenzes che ala tegn tles mans. Chestes  ti vegn donca dedes ju a les comunanzes locales che, ajache ales é plu apede a la jent y pò interpreté miec i debujegns y les aspetadives.

N model volù con determinazion da la Union Autonomista Ladina     
      Te chest cheder giata sia lerch la costituzion dl Comun General de Fascia: na comunanza de val daldut particolara che spizola fora da les autres comunanzes de val tl Trentin. Na desferenza che giata sies rejons tla storia milenara de Fascia carateriseda da raijes culturales, etniches y linguistiches sies che à formé tl temp na comunanza desvaliva da cheles autres y che encueicondì vegn stravardeda; l’autonomia dl Trentin enstessa à sie fondament, apede che te passa mile agn de storia de autogovern, ence tla prejenza dla mendranza linguistica ladina, y ence te cheles de lingaz mochen y zimber.
Rodunt per chesta sia storia desvaliva é l model de autogovern vedù dantfora per Fascia, y al ne podova nia ester autramenter, desvalif da les autres comunanzes. Chest model particolar de autogovern y de autoaministrazion de sie teritore é vegnù volù con determinazion da l’Union Autonomista Ladina (UAL). Al é vegnú sostegnù da me personalmenter con gran convinzion y al é vegnù sourantout da la Jonta provinziala y atira metù ite tl dessegn de lege de reforma istituzionala aprové enstadì dal Consei Provinzial.
 
L miour articul de dut l dessegn de lege
      L’emportanza de chesta normativa é vegnuda fora ence endana la debatuda plutost longia y significativa sauteda fora anter les forzes politiches che ti à fat dí al Prof. Scaglia, Preside dla Facolté de Soziologia, che l’articul de lege che preveid l Comun General de Fascia é l miour de dut l dessegn de lege de reforma istituzionala. Dut chest desmostra che la comunanza de mendranza ladina ne raprejenteia per l’autonomia trentina nia n problem, ma bendebot de ressoursa.
Al se trata de recostituí chela vedlora comunité de Fascia (sie prum statut porta l medieje 1451) che fova carateriseda da na forma de autogovern dret efetiva y che ti à permetù a la comunanza ladina de Fascia de svilupé n liam identitar y de partegnuda dret fon envers sie teritore y che à daidé tegní en pe tl jí di agn sia storia, sie lingaz, sia cultura, sies usanzes y sies tradizions.
 
Duc canc mess se sentì pert de chest projet
     Tres la reforma istituzionala vegn nosta comunanza clameda a cueie su na gran ocajion: l muet de mete a jí n model "sun mesura" de autogovern de sie teritore. I creie che duc canc mess se sentí pert de chest projet: i aministradours publics, les desvalives forzes economiches y soziales, les assoziazions culturales y de volontariat y dutes les esprescions dla sozieté. Duc canc messonse nes dé ju con chest gran projet da porté inant y da gestí con coscienza y responsabelté deberieda, adoran al miour nostes ressourses per n svilup dla val condividù y che se embasta l am de cialé inant tl davegní. N clam, donca, acioche duc canc se dae ju per chest projet. Per chest fin vegniràl metù a jí defata scontredes, debatudes y radunanzes publiches acioche duc canc posse porté dant sie contribut per daidé fé nasce l Comun General de Fascia.
 

      Al é dret emportant sclarí cerc aspec per entene miec l’emportanza dl Comun General de Fascia.  La Provinzia darà ju n clap de sies competenzes y ti les sourandarà ai comuns: donca cerc podeis al moment tles mans dla Provinzia ti vegnirà sourandés ai comuns che podarà s’empervalei de chestes competenzes  tres les comunanzes de val; al se trata de competenzes y de podeis che ne ti vegn nia sourandés tres delega da la provinzia desche al suzedova enfin a encueicondì pro i comprensores (tres la delega, depierpul che la titolarité dl podei restova tles mans dla Provinzia). Chest vuel dí che certes dezijions, nia burocratiches ma politiches, vegnirà toutes da sen inant da nosta comunanza; al se trata apontin de na zeduda de podeis dal zenter a les valedes, per porté les dezijions sun l teritore y  fé a na moda che i zitadins posse ester protagonisc’ de sie davegní tres les comunités de val, te nost caje l Comun General de Fascia.

 
Les competenzes
     Dutes les materies plu emportantes y de interes per la comunité locala sarà prerogatives de chela comunanza, p.ej. assistenza y benefizenza publica, urbanistica, espropriazions per laours de interes local, programazion economica locala, azions y ativités de interes local revardentes la agricoltura, i bosc, la apicoltura, l artejanat, l svilup dl raion a la mont, les fieres y i marcés, l comerz, l turism, i laours y i entervenc de protezion zivila y les calamités publiches, l trasport local, i servisc publics de interes local desche condutes da l’ega da beive y les dejoutes dl’ega paza, les sarenares, l zicle dl refudam, l volontariat y e.i.
Al Comun general de Fascia ti podaràl vegní sourandé ence d'autres competenzes respet a cheles prevedudes per les autres comunanzes de val.
 
Competenzes spezifiches "ladines"
      A poura nia saràl competenza dl Comun General de Fascia l stravardament y la sconanza dl patrimone storich, artistich y popolar local; usanzes y tradizions locales y istituzions culturales; manifestazions y ativités artistiches, culturales y educatives; l stravardament, la promozion y la defendura dla rejoneda ladina; la toponomastica.
L Comun General de Fascia vegnirà clamé ite a dé ju sie arat obligator en cont di dessegns de lege de scomenciadiva dla Jonta provinziala che reverda la popolazion ladina; l Comun general messarà dé ju sie consens en cont de provedimenc de carater general che reverda la comunanza ladina; al pò ence mete dant projec per na lege provinziala tles materies che ti speta per competenza.
 
L Comun General pò definì autonomamenter si organs
     Na emportanza strategica y fondamentala ti spetarà dessegur al Statut dl Comun General de Fascia. Y defat anter i ponc plu significatifs che testimonieia la gran autonomia che ti vegn reconesciuda a la Val de Fasciam che reclameia a recordanza la vedla formula de autogovern dla comunanza ladina, él dessegur l muet de podei se dé en plena autonomia n sie Statut. Chest vuel dí che Fascia à la plena liberté de definì i organs da se dé per l govern dla comunité y de discipliné sies atribuzions, sclut ite l’autonomia per cie che reverda l sistem de litazion di raprejentanc ti organs.
L Statut dl Comun general de Fascia vegnirà,  do la aprovazion da pert de duc i Comuns dla Val,  dé pro zenza mudamenc tres lege provinziala. Al se trata de n reconesciment dret emportant y significatif, ajache l Consei Provinzial, titolar dla competenza legislativa dla Provinzia de Trent, spartesc per la pruma outa chesta competenza, a poura nia chela plu emportanta y significativa de nosta Autonomia, con n organism local (l Comun General de Fascia) che raprejenteia na Comunanza de mendranza.

      Per scluje ju, la spezifizité storica, culturala y linguistica de Fascia arà enscí l muet de podei se dé n model de autogovern con na gran autonomia per la Val che posse ti arseguré n svilup sozial y economich tres n sistem de normes bon de valorisé i elemenc spezifics y carateristics dla popolazion ladina y che posse stravardé ence sia identité. L Comun general de Fascia deventa donca na ocajion per sperimenté tl Trentin na forma de defendura dles mendranzes che pò deventé n model de referiment nia demé per la Talia ma ence per i autri Stac dl’Europa. Ence per chest ne dess la Val de Fascia nia se arjumé via chesta gran ocajion storica.

 
Na endesfida
      L Comun General raprejenteia zenzauter na "endesfida" per jì sourafora i ciampanii y les spartizions, tla convinzion che l’unité renforzeia y pò mioré les poscibeltés y les azions. La reforma istituzionala apeina aproveda nes envieia donca a laoré duc canc deberieda per renforzé l’unité dla Val: aldò de coche chesta vegnirà metuda en ester podaronse nes costruí nosautri ladins enstesc nost davegní, tl spirit de esaltazion dles comunanzes locales y tla logica de n sistem istituzional de "autonomia a scialins" olache al vegn dé ju da pert dla Provinzia autonoma pertes significatives de sovranité.

Trent, ai 20 de jugn 2006

 Luigi Chiocchetti, Conseier ladin


 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.415 seconc