benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Rumantsch Grischun te scola sen realté
scrit ai 20 June 2006 da les 19:49:42 da noeles

Grijon

 

Dal 2007 Rumantsch Grischun te n grum de scoles

L prozes ne é nia plu da tegnì su, degugn ne vuel plu jí endó zeruch al spidiciament te idioms  - Endò n vare plu damprò a l'unificazion de lingaz ti Grijons per podei souravive

Ti Grijons ésen dant a edemes dezijives per cie che reverda la introduzion dl Rumantsch Grischun (RG) te scola. Cotant de paisc y de consorzes scolastics tolarà chisc dis la dezijion sce ai é a una de mete man l ann de scola 2007/2008 con l'introduzion dl RG. La Val Müstair é steda la pioniera. Bele en l ann passé à dutes sies vejinanzes azeté de ester pionieres. D'autri paisc gnirà pro.



      I abitanc dla VAl Müstair ova metù na condizion per ester pioniers: che al fossa almanco na autra scola y te na autra region che fossa a una de ester pioniera te chest vers, per ne ester nia i soui a fé l'esperienza. La condizion é bele dant man. L paisc da Lantsch à tout na dezijion clera: 58 oujes pro y una decontra. Ence Lantsch sarà pionier. Damprò ence la dezijion de Brinzouls che fej pert dl medem consorze scolastich. An arata enscì che almanco trei zentri: la Val Müstair, Lantsch y Brinzouls metarà man dessegur con l RG te scola l ann 2007/2008. Ence Sur (19:6) y Mon (14:1) à lascé al savei de ester interessés a la "varianta pionier". Ciamò chest isté tolará duc i paisc dl Sursès y dla Val Alvra na dezijion sun la chestion. Ivo Berther, che à la enciaria de ti sté do a les domandes che reverda la chestion, ne vuel nia rejoné dantfora dles dezijions di autri paisc per ne les influenzé nia, ma al se dij dassen otimist. "Les vejinanzes che à bele tout la dezijion l à fat a na maniera convenciuda y clera. Anter duc i paisc che tolarà proscimamenter la dezijion él cler che la cossa mess jí dal comun enfora.

Soponta finanziara

      L interes vegn perauter sostegnù con n bel pugn de zucher. I paisc o i consorzes scolastics che é a una de sperimenté la "varianta da pionier", metan man ativamenter con l RG te scola, giatarà da 2000 a 3000 francs y chest per cater agn. Zenzauter bendebot de soponta finanziara che deida deslié problems. Al é perauter da dí che al ne cleca nia de tó la dezijion en l auter ann per la "varianta pionier" y volei mete man bele de agost con l RG te scola. "Chi che vuel mete man dl 2007 mess tó la dezijion bele dant les vacanzes da d'isté 2006. En tant de temp adóren scemplamenter per la formazion di maestri y dles maestres", dij Ivo Berther. Per cie che reverda la "varianta pionier" él temp enfin al ann de scola 2010/2011 per tó na dezijion. Con l ann 2011/12 met man la varianta standard. Y enfin a chesta data gniràl garantì na soponta finanziara, ence sce Berther ne sà nia da dí te ciuna mesura. Chi che vuel ciamò sté pro i vedli idioms tl ensegnament y cialé pro sciche la cossa se brodoleia, é lede de l fé. "Nosta situazion é confortabla", dij Berther, "i mesi atuai d'istruzion é bogn y ai pò garantí la cualité dla scola per na generazion."
      Al plu tert l ann 2015/16 jirá en doura la varianta "consolidazion". L RG sarà ofizialmenter te scola y al tomarà demez i sostegns finanziars da pert dl Cianton che à daidé la sperimentazion per i prums 9 agn.
      Tla Surselva à desmostré interes per l model pionier enfin a sen les scoles de Laax y de Falera. Ivo Berther é bele ju a informé y orienté ence enlò les autorités politiches, i conseis de scola y les persones ensegnantes sun l conzet dl RG te scola. Tant inant che l projet é enlò madur ne àl nia volù dí. Arnold CAthomas, president dl Consei de scola da Laax à confermé che an á sun l program de informé plu avisa la populazion. Plu inant é l projet "Rumantsch Grischun en scola" a Trin. Hans Telli, l ombolt de Tirn à dit: "Dantadut messonse nos avei enstesc la convinzion dl utl dla cossa. Oramai él feter 30 agn che an rejona dla chestion RG. Al é ora de dé n vare inant ence demé bele per l aspet finanziar che sta dovia y che à sia emportanza. (Erwin Caduff)


 
Liams emparentés
· Deplú sun l tema Grijon
· Chier te noeles


L articul plu liet te chest tema Grijon:
Da la Quotidiana: buna acceptanza dal RG


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.400 seconc