benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Consei de Comun de Urtijei: la chestion dl stadion dla glacia
scrit ai 16 June 2006 da les 17:43:19 da noeles

Gherdeina

 

Dal consei de comun de Urtijei: ex-stadion dla glacia dé via a privac

Deda pro na mozion di Ladins sun la toponomastica sun Mont de Seuc

En mertesc, ai 13 de jugn, él sté na senteda de Consei de Comun a Urtijei pro chela che al fova da fé fora n valgugn argumenc enteressanc y de gran emportanza. Al pont 2 se à la lista Ladins damané che dut l consei de comun vegne trat ite pera a laoré fora da nuef l P.U C. (plan regoladour) che va dal 24 /11/ 2007 enfin a 24/11/2017. Chest é en pert gnù azeté, al gnirà cherdé ite l consei vigni iade che l grup de laour che à bele tout su l laour, rata che al sibe debujegn.
Georg Moroder: dant de dé via l dert éssen ben messù vedei almanco n projet de mascima



      Al pont 4 fòvel la mozion di Ladins sun la toponomastica. Chest é zeche dret de zite y che pò porté a stritoc anter i italians y i todesc, ma nos ladins messon cialé che al vegne respeté la toponomastica Ladina dlonch y for, enscila sun Mont de Seuc olache la proposta de Durnwalder se à desmentié l ladin, nosta proposta é gnuda azeteda con 20 oujes a una.
      Al pont 8 se tratòvel de tré de revers la delibera dl consei de mei 2004 con chela che l Comun de Urtijei ti ova metù i polizais al servisc dla Comunité Salten-Sciliër. Do che Ciastel se ova trat de revers ne fòvel propi nia plu da podei giustifiché l sté inant pro Mölten, Jenesien, Fiè, Karneid (Cornei), Deutschnofen y e.i. Souraprò ti à i polizais costé al Comun de Urtijei per l an 2005 ben 38.000 € deplù che nia l ann 2004. Ma chest vegn scuté via. Duc i 20 conseiers é stés a una, enscila él ence finé la chestion di polizais che fajova servisc a Urtijei zenza avei i papiers a post (trilinguism). Per la fin de agost sarà i polizais endò pro sie vedl patron y ai ne furnarà nia plu fora ti luesc che i on scrit chilò dessoura.
      Al pont 10 fòvel da zede la rejon che la comun à  via dal ex -stadion da la glacia (dert de souraspersa) ca 8.000 m² per ca 70 agn a doi privac de Urtijei y de Selva. Chisc doi vuel fé na garage per 15 corieres y na garage per ca 190 auti, souravia fajéssei na plaza da la glacia che dant o do messessa gnì curida, tribunes per ca 2000 persones y locai per la ativité de hockey. La idea ti savova a duc bona, ma al fova ence n valgugn che ova plutost mel de venter a dé pro enscì debota a valch da de tel.
Un de chisc dal mel de venter fova ence ie y ciamò doi conseiers (un per grup). Do mia minonga é chest ju truep massa debota, i conseiers de comun ne ova nia i elemenc tla man per podei giudiché obietivamenter duc i aspec dl problem, entant la senteda nes él gnù metù sun meisa n contrat preliminar, massa n grum de aspec é ciamò da sclarì dant che an tol na tel dezijion tant pesocia, dantaldut éi ie dit che an mess fé n puent nuef prest do l tunel de Petlin a na maniera che les corieres y i auti posse furné permez zenza problemes, dut cie che va debujegn per n bon funzionament de n stadion per i proscims 50 agn ne é nia gnus metus en discuscion, chi fej pa, y co végnel pa fat l tet n di o l auter?
      Dant de dé via l dert éssen ben messù vedei almanco n projet de mascima con tet y dut, ma al é gnù dit che an mess fé debota dut cant, al é gnù perfin dit da la jonta de Comun che per chest invern podéssel bele ester la glacia. Da me fora dúrel almanco n bon ann enfin a che chisc à dutes les lizenzes a post. Al se trata de fé:
- n bonarat geologich che sarà te chest post plutost muelia
- L ufize per i gas entossienc (amoniaca) mess dé sia autorisazion y i savon tant encompri che chisc sà da ester,
- la comiscion per l meldefuech
- la comiscion sanitara provinziala
- la comiscion da fabriché de Ciastel y e.i.
-a la fin él spo ciamò l Comité tecnich provinzial che mess dì de sci a dut l projet.
.
Chestes é demé n valgunes dles comiscions che me toma ite bel debota. Ciamò n iade: la idea nes plajova dessegur, ma chilò àn abù, da me enfora, massa na gran prescia a se dé via dut, perchel ne sonsi nia sté bon de di de sci a chest pont.
I volesse demé ciamò ti recordé a chi che fej l projet de no fé l bech che é bele gnù fat l prum iade can che al é gnù fat l tet, l luminous pòn demé lascé ite da la pert nord, scenò àn l soredl sun la glacia con duc i problems che i on bele abù, dantmesdi da Mont de Sëuc ju y domesdi da Bulacia y Pinei ite
Moroder Georg
conseier de Comun

 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 5
Oujes: 2


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.395 seconc