benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Plovans per n dialogh davert
scrit ai 15 June 2006 da les 19:41:27 da noeles

Desvalives

 

La "ciarestia" de prevesc se fej ence sentì chilò da nos

La iniziativa "Plovans per n dialogh plu davert" - Tla Austria abínen adum firmes

L foliet "Tiroler Sonntag" di 7 de mei 2006 reporta n articul sun na iniziativa de plovans per " na comunité viva y contra l saré pro calonies". Chesta é nasciuda ai 2 d'auril a St.Pölten da pert dl plovan Helmut Schüller, de P. Udo Fischer y d'autri. I dis passés ti ài mené fora a duc i plovans austriacs sia declarazion de fonz con la poscibelté de sotescrive l'adejion a chesta iniziativa y laprò végnel conté su na lignola de d'autres domandes davertes y problems. Entratant i 25 agn passés él tl'Austria la cumpeida di prevesc ju endò dl 25% . Tres deplù plovanies ne pò nia plu saludé n plovan. L iniziadour de chesta iniziativa Mag. Helmut Schüller spliga la situazion y l debujegn dl dialogh.



A cie moda eise pa adum con d'autri plovans envié via chesta iniziativa?
Schüller:
L'iniziativa ne vegn nia fora de n saren. Bele da n pez encà se urta n grup de plovans de Viena y dl'Austria Bassa per rejoné dl svilup pastoral tla Gliejia. Al nes emplesc l cuer con gran festide y con n melcontent cherscent de messei vedei sciche i responsabli se astila defront a la mancianza de prevesc, sun les sciables dles plovanies y di curac. Che i jon ti media empera à deplù gaujes: an volessa ti mostré ai cristians che prevesc se cruzia con ei per l davegnì dles comunités plovanales y che an ne vuel nia ester i ultims che sera pro les calonies. I volessan ence crié na rei de prevesc che à gonot puecia poscibelté da podei se rejoné fora a prodezes sun sia situazion y desçiarié si festidesc. Y a la fin volonse ence arjonje na discuscion daverta con la direzion dla gliejia sun la cura d'animes tl davegnì.

Olà vedeise pa les domandes davertes per l davegnì?
Schüller : Ala se trata de na dezijion de direzion: con ciuna vijion de gliejia jonse pa ti proscims diejens? Nes retironse tres deplù a di ch'an dij da la cura d'animes sourapasseda y conzentronse nosta pastorala sun de maiours raions con azenc miscionars o volonse sciche gliejia ti ester l plu damprò che al é meso a la popolaziun ? Chest vuel dí che i vivon sciche prevesc te plovanies clermenter da vedei da pert dla jent, che i nes tolon dlaorela per sies domandes personales y che i son pert de sia comunité. Souraprò à la plovania ence na dimenjion dret soziala, vàla pu chilò dla comunité eucaristica vivuda vigni dí. I damanon che i vescui mete sies chertes sun meisa.

Ma cie mineise pa chilò plu avisa?
Schüller: Al vegn tres endò dit a revert dla  amiscion de "ei comprovés maridés ( viri probati)" al sazerdoze che chest pò demé vegni deliberé a livel dla Gliejia universala. I vescui dess dì clermenter, sce ai se dá da fé ju a Roma o nia. Al me desplej dassen che l vescul Kapellari à dit nia dadie che al ne s'à y ne se engajassa mai ju a Roma de chest vers. Ma spo dess i vescui ence ti dí a la jent cie che ai vuel fé contra l saré calonies y co che plovanies con tres manco prevesc dess vive endretura sciche comunités religiouses. Laprò él d'aures domandes che sbriscia dantfora da agn: co tratonse pa i divorziés endò maridés, co pa la crisa dl sacrament dla confescion, co pa i laics tla direzion dla plovania o la comunité dla comunion con d'autres gliejies? I sé, chisc n'é degugn tems nuefs, ma al é problems reai. Perchel méssel vegní rejoné persoura y al mess vegnì chirì soluzions adatedes. I savon ence che mudazions adora temp. Ma sciche prevesc y cristians onse ence la rejon de avei n dialogh senzier.

I vedon che al é trueps prevesc che se fej pensiers sun co che la gliejia podessa ji inant miec; ai à l'imprescion che chi da lassù ne se cruze nia massa dla mancianza de prevesc, dles calonies sclutes, dla jent dalonc da la gliejia y di problems di cristians. Ence chilò da nos ti sóflel tla musa a la gliejia n vent  tres plu freit y massa puec veid ite che al fossa ora da ne se fé nia demé pensiers, ma ence da dé varesc concrec per afronté chisc problems tres plu sentis - la mancianza de curac!

De cie che al vegn baudié tla intervista, i medems  problems, vegn ben ence te nosta diozeja tout scialdi a la lesiera. Al pèr che la gliejia ne ae nia plu l coraje de tó posizion defront al svilup te Südtirol y dì cie che ne sta nia ite tl conzet religious di cristians. An à l'imprescion che ala ti feje plutost les beles a la politica che mostra manies lerges canche la gliejia adora valch. I nes recordon les chertes pastorales dl vescul Gargitter che slomenova cie che ne jiva nia ben y mostrova su l dret troi. Encuei vegn dut azeté y scuté via. Co dess pa spo la jent savei cie che é dret o falé?

Lois Trebo


 
Liams emparentés
· Deplú sun l tema Desvalives
· Chier te noeles


L articul plu liet te chest tema Desvalives:
Aiut Alpin Dolomites: sajon da d'isté dant porta


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.609 seconc