La capitolazion dant a la tripartizion y dant al capital

Anter chi che se damana che i joufs dolomitans vegne sarés ence l president dla Consulta Ladina, Helmuth Moroder y l president dla Generela Costa Michil - Na coieneda de duc i ladins

Al é unfat cie vertoles che an tire ca, cie sort de mesures che an tire fora: al en é che laora dassen per che la tripartizion ladina vegne ciamò n iade renforzeda. Saré i joufs dij n valgugn, mete n daz dij i autri. Al é unfat: a entrami i grups ne ti basta la tripartizion dla Ladinia nia. An à stredes, ma cheles dess vegnì saredes.

Helmuth Moroder é anter i promotours de na scluta di joufs entant i meisc da d´isté da les 10.00 a les 16.00.

Anter chi che se damana che i joufs vegne sarés ence Helmuth Moroder che é ence president dla Consulta ladina dl comun de Bulsan. Consulta che tol ite duc i ladins. Sce al vuel s'empegné per che les stredes di joufs vegne saredes, déssel dé les dimiscions sciche president dla Consulta y sc'al vuel romagne president dla Consulta, déssel lascé ester l'enciaria pro la CIPRA. Tant de onesté inteletuala podéssen se damané.

La medema chestion vel ence per Michil Costa, president dla Union Generela, che é chilò te n conflit d'interes: l ostier se damana l contrar de cie che l president dla Generela mess se damané. Ence per el perchel l envit: o che al dà les dimiscions sciche president dla Genere­la o che al se tegn fora da la tematica sciche ostier. Ma che l "president dla Union Generela" sciche i media reporta se damane che les stredes di joufs vegne saredes é pu na coieneda per la Generela y per i ladins. Che l mascim esponent dla Generela se damane che i joufs vegne sarés, é la capitulazion mentala dant a la tripartizion y dant al capital. (pi)