Fodom é capaze de sia mujiga nueva

Conzert enaudal en sabeda ai 10 de jugn 2006 tl Salf di Congresc a Reba

La mujiga da Fodom é entratant na bela realté. Al é sté bendebot de suzes la "cercia" metuda a jì per la fin dl secont ann dl curs de mujiga, che é vegnuda tegnuda en sabeda passeda tl Salf di Congresc a Reba.

La joena mujiga de Fodom.

A scouté su se à fat permez, adum ai genitours y a truepa d'autra jent, ence n mudl de autorités, a scomencé dal capocomun de Fodom, Gianni Pezzei con empera l assessoura a la cultura Teresa Pezzei, l president dla Comunité da Mont  Agordina, Rizieri Ongaro con l assessour Leandro Grones y l assessour al turism dla provinzia de Belun Claudio Costa. Ence l assessour a la cultura ladina dla provinzia de Bulsan Florian Mussner é passé sourafora i joufs y é ruvé ta Fodom sun envit dl president dla mujiga Nani Pellegrini, per tò pert a chesta bela seira de mujiga che segneia l tourné de na tradizion rota via dant agn; chela de na mujiga.

       Tles does paroles dantfora ti él vegnù sport complimenc da duc a chisc joegn, a chi che i meina inant y a siei ensegnanc, adum al encorajament de tegnì bot y de jì inant. Al toca da recordé che n valgugn strumentisc' é bele al secont ann, y d'autri depierpul à empermò scomencé chest invern. Les lezions y les proves vegn tegnudes la sabeda domesdì tl Zenter Dolomiti tla Cesa dla cultura Fodoma a La Plié, despartides su te eserzitazions con l strument,  teoria y soné duc deberieda. Al n'é nia truep, ma al é chel che i ensegnanc ciafieia da fé: Laura Argenta che s'à sourantout entant l'enciaria de derieje la mujiga y Luisa Nalato y Roberto Zanon che vegn su da Alpago per envié via nosc joegn a la mujiga. L livel musical arjont é valgamia bon.

      La seira é pieda via con l'esibizion di solisc y se à sclut ju con set toc sonés duc deberieda. Per la sajon da d'isté à la mujiga bele giaté n valgunes envitazions da jì a soné a S. Maria Maiou a La Plié, en Egort y a Cortina. L president Nani Pellegrini à volù ti sporje n Dievelpaie a duc chi che à sostegnù enfin a sen chest projet: dantfora a la Region Trentin Sudtirol, a la Cassa Raiffeisen dla Val Badia, a la Banca Popolara, senta de La Ila, a la Sit Boè, al Comun de Fodom, a la Union di Ladins y al Cor Fodom che dà ca l salf per les proves, a les fameies  di sonadours y a la scola de mujiga y ai ensegnanc.  ( ls )