benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Renzenjion dl liber dl dr. Lois Craffonara sun la prozescion de Jevun
scrit ai 08 June 2006 da les 21:46:44 da noeles

Storia

 

Prozescion de Jevun: storia y mit

L liber dl dr. Lois Craffonara sarà dret d'utl per derzé certes ipoteses faledes - La prozescion mantegn inant sia valuta desche esprescion de religiosité vivuda emozionalmenter 

En juebia adora ései endò piés via da les 12 plovanies dla Val Badia i pelegrins che và vigni trei agn per trei dis dlon prian y dlon ciantan soura i joufs, tres Funés enfin a sun Jevun tla gliejia dla Santa Crousc. En juebia seira ései ruvés a San Piere de Funés, en venders dantmesdì sarài sun Jevun y do marena darài endò outa devers ciasa. Chesta prozescion vegn rateda particolamenter de valuta, ence i Funesseri y chi da Cluses tol dagnora su i pelegrins decuermenter. Ti ultims agn giata l pelegrinaje ence tres plu ressonanza ti media che ne sà endere nia dagnora co ti jì permez y splighé chesta manifestazion de pietism y de devozion popolara.
 
L autour, dr. Lois Craffonara.
 



      Sun la prozescion él vegnù dé fora dal Museum Ladin Ciastel de Tor n liber scrit dal dr. Lois Craffonara che an pò a poura nia classifiché desche l miour laour enfin a encuei. Al ne é nia n liber de fotografies, enceben che la prozescion vegn documenteda ence tres valch retrac, al ne é deguna letura popolara, ma n liber bendebot ghirent, archirì y formulé con acorteza che và ite te n grum de detais storics y filologics. L autour Lois Craffonara, archiridour finiscim, ne se à nia lascé arvene da les aodanzes entournvia desche tanc de autri che à scrit valch sun chest tema. Tré conclujions en prescia y spligazions scemples y a la bona ne é danz nia farina de sie scrin. Sie liber "Jì en Jeunn - die Wallfahrt der Gadertaler Pfarreien nach Säben" contegn l sotitul "Geschichte und Mythen" (storia y mic).
      Lois Craffonara remona su con cerc mic che vegn contés sun la prozescion y chel clermenter, dantadut sbaujereiel cheles ipoteses sun la prozescion che é vegnudes metudes fora die a la longia desche verités. Craffonara dejentorj les informazions faledes. Al à chirì tres i archifs dles plovanies y dles biblioteches y à analisé n grumon de documenc sibe storicamenter che linguisticamenter: empruma de dut ne é la prozescion nia 1000 agn vedla, ma cotant plu joena tl temp y ala ne é nience vegnuda metuda su per dì dilan dla fede coche al fova vegnù perdiché agn a la longia. La religion cristiana fova religion de stat, valch de auter ne conesciova la jent da enlaouta nience y per valch de tant de normal ne se méten danz nia 3 dis sun troi per jì a pe tant dalonc. I sostegnidours dla ipotesa che al se trate de "na prozescion de rengraziament per la fede" rata che la prozescion sie nasciuda te n temp canche al fova ciamò l vescul sun Jevun, ajache zenza fossa i ladins ben jus via a Persenon. Craffonara se damana con dret ciuldiche la prozescion ne fossa spo plu tert nia gnuda outa devers la senta vescovila nueva de Persenon. Ajache l vescul de Persenon se ova tout empera i osc de Sant Nuin (Ingeniun) - a chel che zachei vuel enfinamai reconduje l inom "Jeunn" - fossa i ladins dla Val Badia jus per secui a la longia con croujes - coscientamenter - pro na fossa vueta, cie che é scemplamenter fora de uega. De tel ipoteses faledes desbuta Craffonara ence tres fac linguistics. L toponim ladin "Jevun" é n emprest dal vedl aut-todesch (Mittel-Hochdeutsch) "Seben". Sce la prozescion fossa veramenter tant vedlora desche n valgugn vuel se tó a dì, ne se essa i ladins dessegur ne nia desmentié la vedla denominazion dal latin "Sabiona". 
 
Fat él ....
      Fat él che la prozescion vegn nomineda l prum iade l ann 1503. Craffonara documenteia dret avisa che catastrofes y ciaresties mess ester stedes les dretes gaujes per jì con croujes sun Jevun, p.ej. la plaia di saioc che à derené ciamps y pres dal 1338 per n valgugn agn endolauter y chel te de gran raions a sud dles Alpes. Na autra gauja pò ester steda la mueria (pest) che an ratova na straufonga de Die. Tres documenc (p.ej. de Cividât dl Friul) végnel descrit tant desdrujentes che les clapedes de saioc fova. I ciamps vegniva rafés ju a rate da schires de saioc. La jent ne ciafiova da fé net nia decontra y al ti parova che al fossa veramenter l scomenciament dla fin dl mond, dla apocalissa. Cie podòven pa fé, auter che prié?
      Craffonara spliga coche al é gnù metù al mond l "mit dla prozescion de rengraziament per la fede":  dai plovans enstesc, plu avisa dal plovan y degan Jan Batista Althon en l ann 1835, ma danz nia per engiané la jent, ma per podei endò tegnì la prozescion che fova vegnuda touta ju y proibida da les autorités. Per diejenes de agn ne fòvel nia plu sté meso de la tegnì (enceben che aboc éla empò vegnuda tegnuda anterite). Te temps te chi che prozescions per prié decà grazies fova proibides, vegnìvel propaghé prozescions per rengrazié dla fede, y chest ne fova nia auter che na tatica di plovans che trueps storics (dantaldut nia i "storics tl temp lede") ne à nia vedù ite o ne à nia volù vedei ite plu tert. L etnologh Hans Grießmair scrivova con rejon dl 1994 che l plovan Jan Batista Althon s'à astilé demé ben enlaouta dl 1835 con afermé che al se tratova de na "prozescion per rengrazié dla fede" per arjonje la conzescion da les autorités de podei endò jí con croujes en Jevun y de ne vegnì nia "con saioc, verms di refs y dla blava" desche rejons. 
      Les origines dla prozescion ne muda endere nia al fat che pro la prozescion de Jevun se tràtel de n jì con croujes singolar y popolar. La prozescion é na desmostrazion de fede y dantadut te temps de unfataria religiousa raprejenteiela n clam emozional fon de religiosité. Lois Craffonara descriv te sie liber n grum de aspec storics, tradizions, fac suzedus, regoles y mudazions soziales che à  a valga moda influí sun la prozescion. Al se trata de n laour bendebot penc che contegn te sies 170 plates ben 508 notes a pé de plata, al é scrit linguisticamenter y conzentualmenter dret avisa y Craffonara ne ti lascia nia lere lerch al letour de tré conclujions ipotetiches. L liber l'àra fosc plu ria de giaté compradours y n publich ampl, ma al sarà zenzauter dret d'utl per publizisc', jornalisc'  y perdicadours a na moda che al ne vegne nia plu conté encantourn liejendes y meses-verités sun la prozescion. 
 
Rezenjion de Mateo Taibon
 

 

 
 Jevun: valch sun la storia
 Passa 1000 pelegrins ladins dla Val Badia é jus en Jevun
 Publicazion nueva sun la prozescion de Jevun
 Museum Ladin Ciastel de Tor: publicazion nueva dl dr. Lois Craffonara sun la prozescion de Jevun
Liams a d'autri articui:
 La Muta da Spinges: 150 agn da sia mort, fac die asconus via - n referat de dr. Lois Craffonara
 

 


 
Liams emparentés
· Deplú sun l tema Storia
· Chier te noeles


L articul plu liet te chest tema Storia:
Relazion dl dr. Mischi Georg en ocajion di 100 Union Ladin


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Renzenjion dl liber dl dr. Lois Craffonara sun la prozescion de Jevun (ponc: 1)
da Jepele ai 10 June 2006 da les 13:14:33
(Infos sun l utilisadour | Ti mané n messaje privat)
Propi na bela rezenjion. Complimenc. L liber de Lois Craffonara nes sarà de vigni vers dret d'utl, da moié che an l'à lascé o fat jí en pension tant adora.



Re: Renzenjion dl liber dl dr. Lois Craffonara sun la prozescion de Jevun (ponc: 1)
da MateoTaibon ai 10 June 2006 da les 19:19:38
(Infos sun l utilisadour | Ti mané n messaje privat)

"hinausgeekelt" dijon por todesch: a L. Craffonara i àn fat la vita y la laur imposcibl, cina che al l'á dada sö. N filologh de so format ne ciafon zenza ingnó de nüsc raiun. Sté él n'operaziun poiltica, na "pulizia ideologica", ia dedô é sté dagnera chi medems fondamentalisc promoturs dl nazionalism todesch ... che compagnia che á ocupé le consei d'istitut por daidé proibì le ladin standard.
Chi che é cuntra l Ladin standard é düc ince cuntra l ladin te scora te na mosöra adeguada, y chel ê ô dí che ai é cuntra le ladin. Ai dij che ai le fej por mantigní la ladin, mo ola al monn mantignon n lingaz con le stlü fora dales scores y dala standardisaziun?

N gran merit dal Museum ladin é chel da i dé ocajiuns a Craffonara da lauré. Insciö vegnel ince evidenzié ci livel che l'Istitut Ladin à segn.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.359 seconc