Ence la gliejia protesteia contra "les usanzes politiches" dla SVP
Riccardo Dello Sbarba ne se à nia enjenedlé dant a la SVP per deventé president dl Consei Provinzial
Che la politica n'à nia les mans massa netes savonse duc, an dij pu che ala é valch de paz. Bele perchel él tant puec che se interesseia de politica. Chest rati ie dret falé, davia che spo fej la politica cie che ala vuel. Per fortuna che al en é ciamò de chi che à l coraje da ti cialé sun i deic a les persones politiches; pro chisc auda ence valch foliet de gliejia sciche l "Katolisches Sonntagsblatt" (KS) da Bulsan.
Bele plu outes à chest foliet critiché valgamia cler la politica dla SVP, enscì ence ai 28 de mei 2006. Plata doi reporta n articul dl redadour Werth titolé "Beschämend!" (da daudé!" Al dij : "Che la politica à mostré les ultimes edemes n teater n pue stramp. Depierpul che nosc politicons é atira dant man da mostré con l deit sun Roma, sce ala va lajù n pue sotissoura, fóssel plu da sciché, sce ai scoassa empruma dant sia porta. La lita dl president y dl vize dl Consei Provinzial é stés ejempli indegns che ti à fat dann al inom dla gran ciasa ( Hohes Haus ) y a la politica en general. L president dl Consei Provinzial vegn mudé ju vigni doi agn y mez anter n talian y n todesch aladò dl statut d'autonomia.
Al fossa ben dret che chel grup etnich, a chel che ala ti toca chesta enciaria se chirissa fora sie candidat. Sce al é da la pert todescia él cler che la SVP met dant sie candidat, ma spo fóssel ence normal che i partis talians se gnissa sun sie candidat. Ma la SVP é dutaorela dla minonga - davia che ala à tl consei la maioranza - de avei " l dert", da lité "sie candidat talian". La soula cossa positiva pro chest teater politich é steda che l president talian nuef Riccardo Dello Sbarba ne s'á nia ejenedlé ju a azeté ghiranzes en pert fora de uega (a Dello Sbarba ti fòvel vegnù metù dant da la SVP n document de cinch ponc da firmé, sce al volova vegnì president: sté soura i partis - mudé ju l regolament dl consei do la volonté dla maioranza - fé dles dutes che les leges aprovedes dal govern passe te consei - s'en desdì da la scola plurilinguala - sconé la declarazion de grup etnich - lascé jí l vize todesch a raprejenté la provinzia soura l Brenner fora). "Dello Sbarba é empò gnù lité president" scriv l KS. Al ova declaré che al se provarà da sté soura i partis, ajache al se sent responsabel envers al Consei Provinzial y nia envers ai partis. L redadour miena che l sgric de trueps a la politica é da capì, canche an veid sciche ala va pro y cie marcés che an prova da envié via. Lois Trebo
