benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Seconda pert dla legislatura regionala: Trent y Bulsan
scrit ai 31 May 2006 da les 20:16:28 da noeles

Politica

 

"L fil cuecen che me acompagneia"

Relazion dl conseier regional Luigi Chiocchetti che sourantol tla seconda pert dla legislatura l assessorat regional a les mendranzes

Chesta é la relazion dl aconsiadour dr. Luigi Chiocchetti porteda dant en gaujion dla sourantouta  de sia enciaria desche assessour regional en gaujion dla daurida dla seconda pert dla legislatura a Bulsan, ai 23 de mei.

"Chesta XIII legislatura é pieda via per cie che reverda la Region, fosc con na maniera de dì nia tant plajoula, sot a na sort de slogan: chel dla enscidita stafeta anter i Presidenc dla Jonta: mesa legislatura con a la presidenza l President dla Jonta provinziala de Bulsan y mesa con l President dla Jonta provinziala de Trent. Al é sté atira desvalifs entervenc, interpretazions y posizions ence dret critiches en cont de chesta impostazion; al é ence vegnù porté dant temes de banalisazion dl'istituzion regionala sourandeda a doi presidenc che essa podù ti dediché empegn y energies a la Region demé "tl temp lede".



Les temes é vegnudes smentides dai fac     
      Emben al me pèr che chestes temes é vegnudes sbaujeredes dai fac. Con chesta impostazion nueva ti àn dé dassen atuazion a la desposizion costituzionala nueva che dij che la Region Trentin-Sudtirol é "metuda adum" da les provinzies autonomes de Trent y de Bulsan. Y chest podova demé ester n gran saut de cualité tl prozes de colaborazion anter les does provinzies ence aldò dl conzet  "Bulsan con Trent y Trent con Bulsan" de chel che al rejonova l President Durnwalder canche al à metù dant l program de govern per la pruma pert dla legislatura.
Y ciamò apede: l trasferiment dles competenzes autonomistiches da la Region a les does provinzies à fat jí deberieda Trent y Bulsan sun n troi nuef con l'empegn de laoré adum devers obietifs mirés y devers sia realisazion, con ti dé na interpretazion desvaliva al rodul che chesta Region é clameda a raprejenté te chest moment storich: plu avisa na "Region condividuda" desche al à dit apontin l President Dellai te sia relazion programatica. I dijove apontin, cheles temes é vegnudes sbaujeredes tres i fac.
Al é vegnù laoré truep te chesta pruma pert dla XIII legislatura. Dejesset leges, anter chestes ence n valgunes de gran emportanza y de significat. I vue recordé anter l'auter la normativa sun la "scurteda" dles indenités ai conseiers regionai. Na normativa sun chela che perauter degugn ne à plu dit truep do sia aprovazion, depierpul che dant  fóvel alencontra gnù trat su n
 enscidit "gran stuep", samben a na moda negativa. Al se trata de na normativa che demé chesta Region à tout su contra tendenzes contrares de autres regions te duta la Talia .
      Na autra normativa dret emportanta é steda chela sun l "pachet familia" y sun la trasformazion dles IPAB. I vue recordé ence la reforma dl  ordenament  di comuns con les mesures outes al fin de inové y de modernisé l laour ti comuns con ti dé na maiour valuta a la posizion dl aministradour y dla strutura tecnica. Y n grum de autres robes laprò. Donca, n grum de laour con chesta impostazion nueva dla Region, truep plu rich de contegnù, souraldut, sce metù en raport a coche ala jiva pro ti temps dant.

 
I me declareie a una con l program dl President Dellai, ma ...
      I me declareie a una con l program de chesta seconda pert dla legislatura metú dant dal President Dellai y i pense che el vae inant sun la medema "lungheza d'ona" aldò de na continuité con la pruma pert de legislatura, sibe tla maniera de interpreté chest rodul nuef dla Region, sibe te sia impostazion programatica. Al é n program che vuel esalté na impostazion de colaborazion anter les does provinzies, na maniera nueva de governé, scomencian dal fat che la region vedla à da vegní tramudeda tres n dialogh nuef plu fort che ciapa sie fondament rodunt tla colaborazion anter les does provinzies autonomes.
Enscí se tòlen
 significativamenter dant d'autri obietifs y mires da arjonje tl spirit de chesta colaborazion istituzionala anter les does provinzies "souraldut per cheles situazions che an pò mete a jí te n cert interes comun", desche al é vegnù dit te sia relazion dal President Dellai.

 
Mudament dl statut de autonomia
      I pense aboncont che al é dret emportant te chesta seconda pert de legislatura de mete en ester n percurs de mudament dl statut de autonomia: chest messarà da me enfora caraterisé dassen i trenta meisc dla legislatura che vegn per adaté l statut a l'evoluzion dl ordenament en doura a livel costituzional, comunitar y internazional. N passaje chest olache anter l'auter la relazion dl President ne ti à nia resservé chela gran lerch deziduda che i me esse perdret aspeté. Donca n envit a mete a jì chesta mudazion che va debujegn con n fort clam de tré ite deplen i conseis dles provinzies y dla region; ma, souraldut, de tré ite les "comunanzes y sies esprescions politiches, economiches, soziales y culturales"; y a chest revert, per nosautri conseiers dl Trentin, végnela a d'ester dret preziousa l'esperienza che i son do a fé con la reforma istituzionala. Enscí sotescrivi en dut y i sostegne con convinzion l pensier che "les istituzions che i on adum jova a puech, sce ales ne renforzeia nia ence nost spirit de partegnuda y la perzezion da pert dla jent de avei i medems interesc".

 
La tematica dles mendranzes
      Enceben che ie son a una, desche dit, con l program metù dant dal President Dellai, ne pòi nia scouté via che la tematica dles mendranzes linguistiches ne é nia vegnuda metuda sun chel scialin che chest argoment se meritassa te n program de legislatura de chesta region; al é vegnù trat ca en curt te na passaja revardenta les normes regolamentares nueves sun i finanziamenc per ti garantí na maiour fazion al manejament di contribuc regionai a ben de enc, de comités y  de assoziazions. Ma fosc volova l President, che à dessegur bendebot de sensibelté per cie che reverda les mendranzes linguistiches desche duc canc sà y aprijeia, se resservé sun chest pont n rajonament plu fon tl moment dla replica desche al é perauter suzedù, a n auter livel, a Roma tl moment de ti dé la creta al govern nuef con a cef Romano Prodi.
Ie pense che les mendranzes linguistiches raprejenteie plutost na ressoursa che n problem y che la comunanza regionala tol d'en gré via tres na majera coscienza de chesta realté. I pense che l president y la jonta regionala nueva messe confermé y renforzé te sies azions chesta coscienza y a chest revert me daréi jù personalmenter con convinzion. Sun l troi dl mudament dl statut de autonomia vuel les mendranzes linguistiches avei, y ales la arà, na luegia fondamentala aldò de chel reconesciment de valivanza de derc y de defendura de sies carateristiches etniches y culturales che ti speta a duc i zitadins, unfat de ciun grup linguistich che ai fej pert, reconferman enscì anter i prinzips fondamentai dl'autonomia regionala l stravardament, la valorisazion y la promozion dles comunanzes linguistiches minoritares. I volesse ence dì zeche, condividan te chest l pensier esponù dal President te sia relazion, per cie che reverda i enc locai che al va debujegn, y i son convenciù de chest, de mete en ester i strumenc adatés, en sintonia y a completament dla reforma mefodret aproveda, per podei ruvé a na despartizion nueva di podeis anter i organs dles aministrazions comunales  y per soscedé fora coche an spera - daite di comuns sénten l debujegn - la discuscion politica tl grem di conseis di comuns.
      I pense  che, do da les normes nueves sun la litazion direta dl  ombolt, l dret confront de idees anter la maioranza y la mendranza feje dret ben, zenza l mortifiché massa. I pense ence che an messessa fé n rajonament  nuef per cie che reverda l'indenité di ombolc sot al profil de na desferenza ingiustificheda anter ombolc "de seria A" y ombolc "de seria B", plu avisa anter ombolc dla Provinzia de Bulsan y ombolc dla Provinzia de Trent.
 
Dolomites: patrimone dla UNESCO y tunel de basa sot al jouf dl Brenner
      Ie son plenamenter a una con l'azion metuda de jí adum da les provinzies de Belun, de Pordenon y de Udin ai fins de podei avei la declarazion dles Dolomites desche "Patrimone Natural dl'Umanité". E chilò, apontin per cheles "responsabeltés prezises en plu" che aldò de chest reconesciment ti vegn aciariedes a cheles comunanzes aciasedes ilò, vàl debujegn che al vegne trat ite tl iter dla candidadura souradita bele da atira les comunanzes tochedes a na moda che chestes ne se troe nia les dezijions "metudes ju dal aut". Al se trata de comunanzes che, alencontra de cie che zachei sostegn, à aboncont porté pro a conservé y a stravardé l raion dolomitan.
Su la medema ona sonsi ence per n auter gran projet: per cie che reverda la realisazion dla gran infrastrutura nueva dl  Eurotunel dl Brenner pensi che per na opera de chesta fateza y valivamenter  ence per dutes les operes de chest livel, méssen- sibe a Trent che a Bulsan - avei l plen consens dles popolazions tochedes. Per cie che me reverda donca plen sostegn a l'intenzion, bele paleseda, de "sostegní dutes les scomenciadives d'utl per informé y per lié ite l'opinion publica regionala sun chest gran investiment".
     La chestion dla partezipazion dla jent y dla minonga publica a les gran dezijions é n "fil cuecen" che acompagneia - desche i pense che al é dret - l'azion de chi che é clamés a governé la Region. Lascian fora d'autri aspec dl program prejenté dal President Dellai, vuei recordé ciamò na outa mie plen sostegn - y i creie veramenter che con encuei se deurel n moment emportant y dezident -  per l projet nuef de na "Region condividuda", d'utl per i obietifs y les finalités de interes comun dles provinzies che la costituesc".

Bulsan, ai 23 de mei 2006.
Dr. Luigi Chiocchetti

 

 

 UAL: n moment de crisa do la desfata de Bepe Detomas
 Intervent dl Conseier Luigi Chiocchetti en cont dl Comun General
 Enconteda anter ICL y raprejentanc istituzionai y politics
 Convenzion provinzia de Trent - Union Generela
 Devers l organism de coordinament 482/99: propostes da Trent
 Relazion dl conseier ladin Luigi Chiocchett al Di di media ladins
 Intervista al vize-president dla Region Luigi Chiocchetti

 

 


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.379 seconc