Degun daz sun i joufs dolomitans n iade

... empruma déssel vegní mioré les stredes te na colaborazion soura i confins fora

La "coltrina de fer" anter les valedes ladines (i joufs a paiament) ne gnirà nia a se l dé sciche l assessour Florian Mussner (SVP) volova realisé con slum: n stude de fatibelté òvel bele tles mans, tamben n plan y votazions de sostegn ti conseis de comun de Selva y de Corvara. Ence la data fova tl aier, a scomencé con l ann 2007 y saré dòvel gní duc i joufs devers souramont (Frera, Fauzares, Ciaulonch y Sela) con stanges y stazions dl daz. Sen ti àn aridlé l troi, chest l resultat de na enconteda de chisc dis anter i presidenc dles provinzies y regions confinantes: Sergio Reolon (Belun), Lorenzo Dellai (Trent) y Luis Durnwalder (Bulsan) con si assessours al trafich y l president dla comiscion europeica dl trafich Paolo Costa. 

 

Mussner contra deplù union anter i ladins: al ne é nia demé contra l ladin standard; al se à ence prové de mete su stanges sun i joufs.

 

Empruma déssel vegní colaboré per mantegní y derturé les stredes soura i joufs y mioré l servisc de trasport publich, spo eventualmenter gní laoré fora n conzet global per dut l raion dolomitan y empermò dedò podaràn rejoné eventualmenter de n daz per transié soura i joufs. L raprejentant dl Venet se embincia denant ence n coliament feroviar che colieie Aunejia tres Cortina a Toblach.

Tl cheder dl trafich arà ti agn che vegn priorité l tunel de basa sot al jouf dl Brenner, enscí Durnwalder. Chest vuel dí che n daz sun i joufs dolomitans ne gnirà nia plu tant atira tout en consciderazion.

Flé a Mussner ti ova enfinamai dé l president dla Generela, M. Costa, che ova afermé te na touta de posizion che i "ladins dova se enconté plu tl spirit che tla enconteda fisica."