Ala bruj dassen la desfata litala, ma an ciala inant 

Senteda generala dantenier, ai 21 de mei, a Poza de Fascia - Fabio Chiocchetti: al vuel ester na aisciuda nueva per se enjigné ca a les lites dl 2008 - Diretif nuef

de Domenico Volcan

Les litazions politiches apeina passedes ne à nia demé mudé a livel nazional l govern, ma per cie che reverda la Val de Fascia ence radicalmenter l raport anter la politica porteda inant da la UAL-Union Autonomista Ladina y i litadours, l raport de tegní adum per mané n raprejentant a Roma. L projet de partí de regoeta per agn tegnù adum da Ezio Anesi enfin a Bepe Detomas encuei, à debujegn, do l resultat dassen desplajoul dles lites parlamentares 2006 te Fascia, de n moment de reflescion, de discuscion y de renovament.

      Ala bruj dessegur dassen l'esclujion de Bepe Detomas al Senat y la mancianza de na raprejentanza politica a Roma. Do chest sclet resultat à la UAL debujegn de giaté sia streda, de reconfermé si valours y si obietifs. Do ti avei mané a dutes les families n document de reflescion se à abiné en sabeda, ai 21 de mei, a Poza n bel grumon de jent de duta la Val de Fascia; n grum de jent en raprejentanza de vigni categoria, de vigni eté y ert (profescion). Chest ne pò che ti fé plajei ai responsabli de la UAL che cialan inant veid che a la fin dles finedes ti interesseiel empò a la jent  l davegnì di ladins, de sia valeda, de sies prospetives economiches, ambientales y culturales. N resson fort che ti darà dessegur l muet a la UAL de cialé inant con na majera fidenza, con n interes plu fon y feruscul devers ai obietifs politics di ladins medems. 

      Trueps é stés i intervenc endana la senteda de Poza, intervenc che à trat ca cotantes chestions nueves y vedles, samben smaioredes do la desfata litala dl candidat Bepe Detomas. L conseier dimiscionar, Luigi Chiocchetti, à daurí la senteda, sotrissan l'emportanza per l moviment poltich fascian de troé sun l teritore, tles istituzions y tl mond dla sozieté zivila duc chi liams che fej viva y sterscia na comunanza: te chest l'emportanza dl Comun General de Fascia che podarà ester bendebot de moment de autonomia y de autogovern. Donca plu davejin a la jent y plu dalonc dai partis per n moviment che à dantadut da ciapé sia streda, si obietifs fons, stersc y segurs. Bepe Detomas, da sia pert, à rejoné de na scasseda che pò ence ti fé ben al moviment per avei n moment de reflescion y de spenta a jì inant con plu clareza y unité. Trueps i intervenc: al é vegnù splighé che ai fascians ne ti àl nia plajù l maridoz con l zenter man ciancia y donca con la lista de Prodi, per chisc fova Detomas l dret om, ma tla coalizion faleda.
      De aut spessour, desche dagnora, l intervent de Fabio Chiocchetti da Moena che à rejoné de n moviment politich che se à sovenz comporté desche i autri, che à entenù la politica desche fin y nia desche strument. Per Fabio Chiocchetti  vàl debujegn de na aisciuda nueva che veid tl 2008 (lites provinziales) n moment de verifica. Al va debujegn che an se enjigne ca a chest apuntament a na vida democratica y zenza deguna prevaricazion de valga sort desche  tl caje dles litazions dl 2003. Enultima él ence sté la litazion dl diretif nuef dla UAL che sarà metù adum enscì per i agn da vegnì:

i chindesc lités  tl diretif:
Anesi Guido,
Liberatore Elio,
Zanoner Riccardo,
Pollam Tone,
Pederiva Giuliano,
Chiocchetti Fabio,
Florian Remo,
Lucia Gross,
Dorich Giancarlo,
Bernard Fortunato,
Franceschetti Riccardo,
Ganz Fabio,
Ghetta Franco y Bernard Leonardo.

Secreter politich resta dutaorela Bepe Detomas ence per via dl maiour numer de stimes giatedes y souraldut ence per via che al ti é vegnù damané da trueps di intervegnus a la senteda de Poza.