Amours y dolours
... n viade fora per les epoches dla mujiga con l dirighent André Comploi y l cor Cantus Iuvenis
Sot a la iniziativa dl "festival joeneza y mujiga la Val" végnel metù a jì en sabeda, ai 3 de jugn, da les 20.30 h, tl salf dles manifestazions "Domene Moling" a La Val, n conzert con l cor "cantus iuvenis" sot a la direzion de André Comploi d'Al Plan. L cor de studenc mescedé dles universités da Viena - anter chisc ence ladins - envieia a tò pert a n viade de aorela curta sot al moto "amours y dolours" fora per les epoches dla mujiga.
L'inom "cantus iuvenis" vegn dal latin y vuel dì "cianté joen". Al se referesc da una na pert a la tradizion culturala y da l'autra pert ai ciantadours joegn, l program fresch y la vita dinamica dl cor. L cor - aciasé tla "Katholische Hochschulgemeinde" de Viena - é vegnù metù su da André Comploi tl 2003 y tol dantdaldut su jent joena che à legreza da cianté deberieda. Les ciantarines y i ciantarins é studentes y studenc de facoltés desvalives dles universités de Viena. I plu o manco caranta membri vegn da deplù stac europeics (Talia, Austria, Germania, Francia .), na gran pert da dut Südtriol - ence cinch ladins é laprò.
L cor "cantus iuvenis" s'à tout dant da ti dé tla medema maniera peis a la vita dl cor (con les proes y i conzerc), a la formazion musicala y samben al bon clima y a la compagnia. L cor cianta regolarmenter messes (p.e. tl "Stephansdom") y abelesc d'autres manifestazions religiouses, ma tegn ence gonot conzerc profans. De auton dl 2004 à l cor tout pert a la competizion di cors de dut l Tirol a Dispruch. Na pert emportanta dla vita dl cor é nia en ultima ence costituida dai viadesc che vegn fac deberieda: dant da doi agn tla Republica Ceca y a Dispruch, l ann passé te Südtirol (tla Val Badia y a Bornech). Per l auton che vegn é "cantus iuvenis" vegnù damané de sourantò la pert dl cor dl'opera "Dido and Aeneas" de Henry Purcell che vegnirà raprejenteda en colaborazion con les universités artistiches da Viena.
L dirighent André Comploi é chersciù su a La Val y a Al Plan de Mareo. Do avei frecuenté les scoles a Neustift y tl Vinzentinum él ju a Viena a studié mujiga sacra, musicologia y teatrologia ch'al à sclut ju chesta sajon con la nota plu auta.
Do n conzert dret plajoul a Oies l ann passé él i organisadours dl "festival joneza y mujiga la val" che à fat meso che l cor posse vegnì en secont iade adalerch tla Val Badia: l conzert che "cantus iuvenis" tegnirà a La Val ai 3 de jugn, da les 20.30 h, sarà l prum tl ziclus dl festival de chest ann y se dedicarà dantaldut al amour - y al dolour che l'acompagneia datrai. Sot a chest moto envieia l cor a tò pert a n viade emozionant fora per les epoches desvalives dla mujiga, dal renasciment al 2eisem secul. Valch matades dl regent dl ann, Mozart, ne manciaràl samben nience! La seira vegnirà scluta ju en compagnia y - ajache an dij che l'amour va tres l magon - con valch de bon da mangé y da beive. L'entreda é debant y duc é dret bel enviés!
