benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Les candidatures per les lites provinziales
scrit ai 08 February 2003 da les 20:23:39 da noeles

Politica

 

Degun sostegn ofizial da la Val Badia per Mussner ciamò

Les lites provinziales ruva tres plu damprò. Pro i partis végnel bele da n pez pastelné pro les listes, samben ence pro la SVP ladina, tant deplù davia che ala pò demé mené te gara 1 n soul candidat. Enseira (07.02.2003) s'àl abiné a La Val l grup SVP dla Val Badia, presidenzié dal "obmann" Franz Complojer, enstes ombolt dl paisc y da Pepi Dejaco, ombolt da San Martin, "vize-ladin SVP", con ambizions de ji sun l parchet politich provinzial. Sun l orden dl di  la candidatura ladina per les lites provinziales de chest auton. Degun sostegn dampertfora  per Mussner l resultat dla seira. L grup recorda che aldò de na vedla regolamentazion interna messessa perdret n candidat dla Val Badia tré dant chest iade, do che 2 candidac gherdeines é tomés tres, Malsiner empruma y Stuflesser dedò. La SVP dla Val Badia se fej ert perel, a pruma odleda, da i dé endò la creta a n candidat gherdeina, ence sce l  candidat proponù da pert de Gherdeina é l assessour  en ciaria Florian Mussner cherdé da foradecà l'ultim ann. Iniò ne él scrit che la cherdeda vele automaticamenter sciche candidat.



Dut tatica o desfidenza, tramesdoes bonamenter. Al é rie se imaginé che l grup dla Val Badia ae n sie candidat da tré fora dles manies, temp per l profilé y che al vegne spo souraprò sostegnù dal grup SVP de Gherdeina. Dut auter che probabel. L grup SVP de Gherdeina veid endere te Mussner sie candidat ofizial davia che al à fat n "bon lëur" sciche assessour, do sia minonga. L'enciaria da assessour giateda tres la cherdeda dess deventé la sburla dezisiva per l mandat democratich con l aiut de duta la strutura viadedò. Cler che el proa de nuzé chesta ocajion. Enscì àn ence scrit te na comunicazion ortieda fora encuei (08.02.2003). Veira él endere ence che al ne é mai vegnù dit che l assessour cherdé dessa ester automaticamenter ence l candidat ladin sun la lista dla SVP. Al vegnirà marciadé ca valch sostegn per chel o chel auter projet a rete con l sostegn politich. L  gran problem per la SVP ladina resta inant chel dl soul candidat sun lista, davia che demé un à la poscibelté de arjonje tant de oujes de preferenza che al va debujegn per n scagn sun la lista SVP. La tema de tomé tres endò é grana.  L assessour Mussner à ence bele fat valgugn faux-pas y se à ence giaté ultimamenter na refleda dal president Durnwalder per sies sponsorisazions.

Autramenter se stala pro la Lista LADINS che pò avei na lista plena de candidac y che god cotant na maioura poscibelté de arjonje l mandat y chest con la lege litala vedla che ela à ence defenù con recurs ala Court Costituzionala. Davia che les posizions de valgunes persones dla SVP tla Val Badia é plu davejines a cheles dla Lista Ladins con cheles che an laoura saurì  a livel comunal y true manco a cheles plu "estremistes" de Gherdeina, se damana valch un ence ciuldì pa nia mete en pé na lista LADINS cun candidac dla SVP, samben na proposta che roda demé inofizialmenter. Ma al fossa zenzauter n at de coraje y de politica democratica, fora da les polemiches di partis.


 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 4.2
Oujes: 5


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Les candidatures per les lites provinziales (ponc: 1)
da Albert ai 08 February 2003 da les 22:30:37
(Infos sun l utilisadour | Ti mané n messaje privat)
Badioc, preibel no ves lascede oje y ghirede l candidat por os ... deache al é bele massa gherdenes porincerch. Sauri da capi che interesc superiurs dl parti pois aconsié n compromis por porté ite so candidat. Mo por l'animaziun dla politica ladina ol ester n badiot che se desmostra dlunch plü daverc y ince plü arjignà a se fà aldi ... n candidat badiot foss ince plü davert a na majera autonomia daite tl parti .... porchel ne molede nia!


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.366 seconc