benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Na festa per n fin de ben
scrit ai 10 May 2006 da les 17:22:39 da noeles

Gherdeina

 

Se devertì, fajan dl ben!

Seconda edizion dla festa sun Mont de Pana  -  La ULG y la scola da rait Monte Pana deberieda per Medicus Comicus y l ADMO

N sté deberieda tla familia o anter compagns, alalergia amesa la bela natura de nostes montes, encertledes da na contreda demarevueia abelida da creps y corida de bosc. L dut acompagné da de beles mujiges y bona vueia. L fin dla manifestazion é per na opera de benefizienza. Do l bon garaté dla manifestazion en l ann passé, se à la Union di Ladins de Gherdeina (ULG) deberieda con la Scola de jì a ciaval Monte Pana, endò enjigné per pité n dì sot al segn dla pesc, dla union, dl devertiment ma dantaldut per fé ence na bona opera.

Entant la festa dl ann passé l gran suzes dla ciantarina de Selva Belsy.
 



      La Union di Ladins de Gherdeina y la Scola de jì a Ciaval Monte Pana, se à metù adum demé per caje. Evi Riffesser, istrutoura y presidenta dla Lia Amatoriala de chi che va a ciaval de Südtirol, Klaus Malsiner, titular dla Scola Monte Pana y Egon Vinatzer president dla ULG, se à bele l ann passé pensé de fé zeche per i plu debli, per i amalés y per la jent soula. Na festa che abina adum la cultura, la mujiga y l bel sport de jì a ciaval. Na festa per les families, o per chi che vuel passé n bel dì te na bona compagnia. Ma dantaldut él na manifestazion penseda y orienteda ence per i pici mutons y mutans. En curt n devertiment per duc, zenza lascé endò degugn. Tl medem temp ciàlen a na maniera scialdi davoleibon, de sensibilisé la popolazion a fé dl ben. « Sci, ence te chisc temps, olache al n’é nia tant saurì da se mete via n puech de sparagns, cialonse empò de mete a jì manifestazions interessantes y de aorela curta, olache  duc i davagns vegn dés inant per n fins ciaritoui. Sibe l ADMO che ence l Medicus Comicus, laora per n bon fin, al é dret che ence nos penson mindicef de daidé les categories plu debles. Al é prest fat da se amalé o da ruvé te ospedal, perchel daidé de chest vers é segn de gran sensibelté. Duc chi che vegnirà a la festa y se mangiarà zeche o se beiv zeche, pò savei che si scioldi ruva tres de bones mans a n bon fin y pò ester content de avei a sia maniera daidé empera.” Enscì Egon Vinatzer, president dla ULG y un di promotours.
      En domenia ai 21 de mei él endò tant inant.  L dì scomencia con na bela Santa Messa lieta dant dal plovan de S.Cristina Sin. Reimund Perathoner, acompagneda dal grup Helios. Daldò, sciche per tradizion vegniràl benedì i ciavai. Ciamò dant marena jolarà ju da Mont de Soura n grup de parapens de Gherdeina y mostrarà su de blotes evoluzions. Al vegnirà ence saludé de plu personalités tl ciamp Politich y dl sport y al ne manciarà nia Miss Sudtirol Stefanie Keller de Urtijei.
      Entant dut l domesdì tegnirà compagnia deplù grups de mujiga y ciantautours. Anter chisc él : I Pazedins, Thomas Perathoner da la Mauta, Samira, i Giangos Oberkrainer, Mark Alexander, Vincent & Fernando, la Grupa Cominais, Walter Mussner y i Skalls. I grups sonarà per l’ocajion debant y chest é segn de gran toleranza y partezipazion. Anterite, rengrazian la Boteiga Monika de Urtijei, vegniràl premié i dessegns che i pici mutons y mutans à fat entant l domesdì en compagnia con i clowns dl Medicus Comicus. Al sarà da davagné de blotes scincundes.
Anter la una domesdì y les 5 da seira végnel metù a la leta l parch da fé damat y al sarà ence meso da fé raides con l ciaval, ponies o con la cales. Al vegnirà ence fat na picera prejentazion dl Nordic Walking. Gran paruda fajarà dessegur les beles performances sportives y artistiches portedes dant da deplù esperc de jì a ciaval.
      Entant la festa saràl meso giaté debant la La Usc di Ladins y per chi che vuel, se lascé scrive ite a la Union di Ladins.
L dì vegnirà prejenté da Martina Rier, ousc bele conesciuda de Radio Gherdeina. «Sce dut chest é meso da realisé y sce an pò garantì n bel contribut a les assoziazions ADMO y Medicus Comicus, spo él da rengrazie i sponsors per i contribuc, anter chisc : La Cassa Raiffeisen de Selva, Aidea design, Malfertheiner – mascins da paur de Ciastel, Bernard Claudio, Toro Seguranz, Maciaconi For Kids, Geier Diffusion, Sperthotel Monte Pana, Radio Gherdeina, La USC di Ladins, Ciauzei Klaus Malsiner de S.Cristina y Spice Light de Klemenz Rigler.
Trueps volontars privac  daidarà pera per garantì segureza, da beive y da mangé per duc. Al vegn ence metù a jì n auto che menarà la jent sun Pana.
“Nost slogan  restarà inant, se devertì fajan dl ben», enscì i trei promotours dla festa: Evi Riffesser, Klaus Malsiner y Egon Vinatzer.

Foto: i trei promotours dla manifestazion de Benefizienza da M.c.Evi Riffesser, Klaus Malsiner y Egon Vinatzer.
 


 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.527 seconc