Implanc portamont de Fascia scluj con bendebot de davagn l 2005
Doi de gran projec sun meisa: coliament nuef anter Ciampac y Belvedere y realisazion de n zenter hotel nuef ta Delba
La Sitc spa de Cianacei, chela sozieté de Fascia che da passa cincanta agn laora tl ciamp di implanc portamont, à tegnù sia senteda anuala che é steda na ocajion per tré n bilanz economich dl 2005 y per descore fora ence d'autri ponc valgamia emportanc che reverda i programs futurs dla sozieté fasciana.
Per cie che reverda l bilanz dl ann 2005 resulteiel n utl de 3,21 milions che é vegnù aprové dai passa sessanta sozes che se à troé a Cianacei. Endana la senteda él gnù porté dant da plu pertes che al fossa dret de ti dé reconesciment ai aministradours per la cualité dl laour fat, y ence y sourladut per la gestion ascorta dl bilanz. Do avei rejoné dl bilanz positif à i sozes rejoné amplamenter dl coliament anter l Ciampac y l Belvedere y dla plaza da parché nueva sot a tera ite Pareda a Cianacei. Per cie che reverda l coliament anter Ciampac y l Belvedere ciala la Sitc con uedl interessé a chest ultim gran investiment, ma duta l'operazion se ghira endere che al vegne sclut dut l coliament di lifc da Bufaure encà.
Ciamò daverta é la chestion dl nuef zenter hotel che tla intenzion dl dr.Sandro Lazzeri dla sozieté Ciampac Contrin cognessa nasce tla gran plaza da parché de Delba. Sun chest argoment él sté gran debatit anter l Comun che vuel manco metri cubics de costruzion aldò dl plan regoladour y la sozieté dl Ciampac che vuel fé chest gran hotel, perauter nia vedù massa de bon uedl dai hoteliers de Delba. Te chest moment de confront y de proa de forza per la Sitc réstel da vedei sce al vegnirà mai fat chest coliament che la sozieté rata fondamental realisé apeina che al é meso sibe per rejons de cosc' che de na mioura proponeta ai skiadours.
Tla pert dles investizions figureiel desche majer projet la realisazion dla plaza da parché a Cianacei ite per Pareda, atualmenter con mingol de problems de carater burocratich anter la Sitc y la frazion de Cianacei, ma con da pert de duc la vueia de giaté na soluzion che posse jì ben y souraldut che posse ti porté a Cianacei chesta lerch da parché. Sce dut jirà do sia streda fajarà la sozieté de Cianacei chest intervent preventivé sun passa 11 milions de euro de speisa y arà l dert sot a tera per amancol 20 -30 agn y l dert soura tera da pert dl'Asuc de Cianacei. An rata che ti meisc che vegn pòssen strenje i temps de realisazion. (Domenco Volcan)
