benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

UAL: n moment de crisa do la desfata de Bepe Detomas
scrit ai 26 April 2006 da les 22:50:35 da noeles

Fascia

 

Lites 2006: empede sie raprejentant á Fascia lité un che laora contra!

L "embaraz" é dret sterch per chi che raprejenteia la Val de Fascia tles istituzions provinziales

dl conseier provinzial dr. Luigi Chiocchetti

La desfata da la litazion de Bepe Detomas al Senat à segné na burta plata per Fascia, per l moviment politich ladin dla UAL y ence per l Trentin. Fascia à preferì, con sia litazion, de ti core do a proponetes plu saurides de stamp economich, de ti jí do a la ousc dl enteres individual y dl stravardament dl tacuin: te na parola, l clam - tres plu fort y encueicondì totalisant - di scioldi y dla richeza da defene a vigni cost y a vigni priesc.



Chest fat é ciamò plu pesoch ajache propi te Fascia àl mancé chel "pugn" de stimes che ti essa permetù a nosta Comunanza de podei avei ciamò na outa n sie raprejentant tl Parlament talian: na ocajion donca che Fascia ne à nia volù tó su renunzian enscí a d'avei un de si fies a defene, svilupé y fé cresce nosta spezifizité y nosta autonomia.

N pugn de stimes che defat à porté demez la poscibelté de s'emprevalei dl'esperienza, dles competenzes y dles capazités de Bepe Detomas desmostredes te chisc diesc agn de laour desche Deputat tl Parlament nazional. N "tratament" che dassen Bepe ne se meritova apontin da pert de chela Comunanza che de grazia a sie empegn y a sia determinazion é chersciuda te chisc agn a livel de degnité tl cheder provinzial, regional y nazional: al basta pensé a la poscibelté de avei n raprejentant de dert de nosta Val tl grem dl Consei provinzial.

Bepe Detomas te chisc agn à desmostré empegn, competenza y determinazion y al à daidé muie - anter l'auter él ence comember dla Comiscion di Dodesc - a fè cresce y svilupé nosta Autonomia, les rejons de nosta spezifizité y les particolarités de nosta mendranza, tant che encueicondì i fascians god di medems derc dles autres valedes ladines de nosta Region.

Fascia à perdù dassen n'ocajion storica. A raprejenté Fascia tl Parlament nazional, al Senat, do da "nosc" Ezio Anesi y Bepe Detomas, ades saràl Giacomo Santini de Forza Italia, n esponent de chel partit che plu che i autri, dl zenter-dreta, se à palesé con l conscidré n privilege nosta Autonomia (chest é gnú dit per ejempl dai Presidenc de Lombardia y Veneto Formigoni y Galan).

Les ressorses economiches y la richeza individuala, elemenc de basa ti programs de Forza Italia, ne pò nia basté per l svilup de nosta comunanza.

L cresce dl'economia zenza apede n svilup dl sentiment de partegnuda, dl'identité, dl spirit de na comunanza de Val, ne pò nia porté lonc.

Alencontra él da mete a jí azions bones de contrasté l'endebliment dles rejons dl tegní adum dla sozieté y dla solidarieté: endebliment che plan plan à ciapé pé ence te Fascia te chisc ultims agn apontin per l'azion de govern porteda inant dal zenter-dreta.

Fascia à preferì, con sia litazion, de ti core do a proponetes plu saurides de stamp economich, de ti jí do a la ousc dl enteres individual y dl stravardament dl tacuin: te na parola, l clam - tres plu fort y encueicondì totalisant - di scioldi y dla richeza da defene a vigni cost y a vigni priesc. Tematiches olache, anter l'auter, n mingol de confujion é gnuda fata ence da pert dla coalizion de zenter-ciancia; confujion che adum ai slogans sauris de Berlusconi semper entournvia chestes tematiches, à descedé na forta atenzion dla Val de Fascia dl Benester.

I messajes falés y sfauzés sun les tematiches dla familia slariés fora via per chisc ultims meisc à ence chisc dessegur daidé, a na vida strumentala, a descedé cruzes tl litadour con l ti dé su a la coalizion de zenter-ciancia intenzions nia veritoules y che ne é pervedudes inió tl program de govern.

Donca à abù la souraventa cheles tematiches y problematiches de stamp nazional che à corì via les chestions y i problemes locai.

Al é gnù metù tedò l sens de partegnuda teritoriala, i valours dl’identité y dla comunanza, l valour dl ben comun: an se à fermé a secodí i enteresc materiai, de curt temp plutost che pensé a n projet de lonch termen out a mete adum n spirit de Val, na politica unitara bona de fé cresce "ensema" duta la Val.

Al se deura enscí n moment de na gran y muie fona reflescion per duta la jent de Fascia y soraldut per l’UAL. L Moviment mess fé autocritica y mess capí olache al à falé tl "comuniché" l projet che é l fondament de sia rejon, aboncont semper con la coscienza che l’aspet identitar é fondamental per n Moviment politich che vuel ester de regoeta, aldelà dles ideologies desche l’UAL vuel apontin ester.

Al sarà fondamental seghité a tegní adum l’idea de fé audí vigni fascian - tolan ite souraldut i joegn - protagonisc' dl davegní dla Val con l porté inant na politica "de Val", bona ence de jí sourafora i confins di singui comuns per ruvé a mete adum na comunanza che tegn adum y che é capazia de sies particolarités.

L faliment dla litazion de Beppe Detomas al Senat é ence na "ciavateda" envers la Provinzia de Trent, in primis l President Lorenzo Dellai y la Maioranza che l sostegn, per dut chel che é gnú fat al ben de Fascia souraldut te chisc ultims diesc agn: an se desmentia muie y massa saurì dl'atenzion istituzionala y economica che nes é gnuda resserveda.

I recorde la lege provinziala, bele souradita, che ti consent a Fascia de avei n raprejentant tl Consei provinzial.

Te dutes les reformes che la Provinzia é do a porté inant ti él gnú resservé na atenzion particolara a la Val de Fascia y sia spezifizié: i pense, per ejempl, a la reforma istituzionala con la previjion dl Comun General de Fascia con autonomia particolara y competenzes y a la reforma dla scola.

An ne pò perauter se desmentié l fort empegn mantegnù dal Govern provinzial, enfin al pont de mete en crisa dut l Esecutif, sun la chestion dl conliament dla Val Jumela.

L fat de se mete da la pert dla coalizion che sostegn Romano Prodi é en coerenza con na continuité de azion politica porteda inant daite de n schierament, l zenter-ciancia, che via per chisc ultims agn ti à consentì al moviment ladin y a duta la Val de Fascia de arjonje resultac dret emportanc y de gran significat per cie che reverda l stravardament, la promozion y l prestige speté da diejenes de agn dai ladins.

Y chest per l'emportanza reconesciuda da la Provinzia a la comunanza ladina veduda desche na richeza per dut l Trentin.

L'"embaraz" politich y istituzional, donca, te chest moment é dret sterch per chi che raprejenteia la Val de Fascia tles Istituzions provinziales.

La candidatura al senat de Bepe Detomas é gnuda voluda y sostegnuda con gran convinzion diretamenter dal President Lorenzo Dellai y da duta la coalizion de zenter-ciancia dl Trentin apontin per l fat de na segura "resposta" de Fascia per sostegnir sie candidat, sie conzitadin per la litazion al Parlament nazional.

Enscì ne éla nia steda.

Fascia à volù se clamé fora da chest apuntament storich, renunzian a ester te Parlament con n sie raprejentant autoreivel y determinà apontin olache, ti cinch egn che vegn, jiràn a mete man per reformé y modernisé nosta spezifizité tres l mudament dl Statut de Autonomia.

Mudament che anter l'auter ne podarà nia fé cont demanco de chela gran richeza dl Trentin che é apontin les mendranzes linguistiches.

Al passarà dessegur truep temp dant che an se prejentassa endò - semper sce ala se reprejentarà - l'ocajion per na picera comunanza desche chela de Fascia de podei avei n sie raprejentant tl Parlament nazional.

Naturalmenter la "desfata" dl candidat al Senat Beppe Detomas, Secreter politich dl Moviment UAL, toca ence l sotescrit, desche esprescion dla UAL, che ne podarà fè nia auter che remete sie mandat tles mans dl Moviment per les deijions che chest volarà tó.

 

 

Ai 20 de auril 2006. Cons. Luigi Chiocchetti


 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 5
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: UAL: n moment de crisa do la desfata de Bepe Detomas (ponc: 1)
da Claudio ai 27 April 2006 da les 16:13:48
(Infos sun l utilisadour | Ti mané n messaje privat)
Interessant relevé les does reazions al resultat lital dles politiches 2006. L Moviment Politich Ladins é content che trueps ne ti à nia dé la ousc a la SVP, unfat sce al fova Forza Italia. Piec éla juda te Fascia olàche per gauja de chest medem trend, anzi cotant maiour (ti dè la ousc a Berlusconi), ne ti la à Bepe Detomas per n peil nia fata.
L problem de basa resta, i ladins chier plu gen patron foradecà o n fant metù su dal gran patron desche F. Mussner, sibe a Bulsan che a Trent se féjen ert de avei creta te na sia forza politica.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.380 seconc