benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Union di Ladins de Gherdeina: personala de Günther Pitscheider
scrit ai 29 March 2006 da les 19:33:20 da noeles

Gherdeina

 

La marevueia tl univers dla natura

L prum iade te Gherdeina, na personala dl artist Günther Pitscheider

Sintonia anter natura y ert. Na ocajion de viajé tles formes plu fantastiches dl legn, mermul, sas y acel. Organisazion Union di Ladins de Gherdëina, do l projet "Vive y sperimenté la vita di per di".- Da en juebia 30 de merz enchin a en mercui, ai 12 de auril tla Cësa di Congresc a Urtijëi.

L artist, Günther Pitscheider, dovia n valgugn de si laours realisés con legn, acel y mermul.

 

 

 

 



      Günther Pitscheider, l artist fantasmagorich de Gherdeina, se à bele davagné n gran inom tres deplù mostres de gran suzes fates tles majeres zités de Südtirol sciche a Maran, Persenon, Bulsan, Sterzing y e. i.. Sia esprescion artistica nueva y esplojiva, ti à fat davagné gran simpaties y interes anter i trueps amanc y intenditours d’ert. Ence la critica spezialiseda da esperc dl ciamp, é steda plu che laudenta y positiva. De plu articulisć y jornalisć ence a livel nazional, à auzé fora Pitscheider sciche na revelazion alternativa de pratiché l’ert ciamò a livel san y nia vincolé che tres operes rafinedes lieia y deleiga adum tres stil y naturaleza l astratism con l figuratif enchin a finé perfinamai al perfezionism. Permò do trueps agn che l artist laoura omlmenter te sie chiet y sot te si studes autodidatics, à el dé pro de prejenté na mostra personala te sia valeda.
      La Union di Ladins de Gherdeina à la onour de prejenté y inauguré la mostra unica de chest vers, na mostra che é tl program dl’ativité culturala dla Lia. Na colezion de operes riches de moviment che lieia l fatour natura con chel artistich a na maniera daldut armoniousa, olache l legn salvare fina con fineza tl sas y gota tl mermul enchin a ruvé tl acel. Nia ne vegn lascé dal artist al caje. Truepa lerch y ledeza ti vegn deda a la creazion y a la creativité dl’oma natura enstessa. Günther laoura tl legn o sas, smilan con sentiment con si scarpiei sciche el essa tema de ti fé dl mel. Con na man ferma comaneda dal cuer y dal sentiment dl moment, nàscel fora di materiai donés da la natura de gran creazions naturalmenter artistiches.

      La majera pert dles operes, spiedleia la dopla pert dla personalité dla jent, dla vita y dl comportament. Esprescions sovenz critiches, ma dutes con finalités ben fondedes. "I ne vue segurdenò pensé de mudé l mond, ma tres mi laours speri de ester bon de mostré su la finzion y la funzion dopla dla persona che sà da mudé sia personalité aldò dla situazion y dla convegnenza", dij l artist. Na miscion ria, ma la rejoneda unica y internazionala dl ert, pò sovenz ti fé daurì i uedli a truepes realtés dantaldut soziales.
I secons y les raijes desliedes de vigni grandeza y forma da giut bele fermes, giata tres Pitscheider, endò vita dàn inant n significat, magari ence educatif. Entant che l sas y l acel deventa sciche per miracul materia ciauda y tendra. Na sia criazion ne nasc nia demé per caje. Günther ti ciala a n tòch de legn o a n sas per meisc y meisc a la longia enchin a che la dreta ispirazion y emozion ti comana a les mans la forma che l’opera dess giaté. Chesta é la streda dreta de respet, omelté y amour per la natura, per l’ert y per la vita.
      L material primar per l completé dles trilogies de Günther, à ti ultims doi agn paussé te locai scurs y freic, ti dan lerch al sas. L artist, te n moment de reflescion, à volù se fermé y dediché n temp determiné propi demé al sas dassoul. "I é emparé à conscidré, a sentì y a vedei l sas sciche na creatura viva, n don dla natura che ne pò nia mancé per completé con armonia l crié. Ie sente tl sas sie flé, la vita, sie ester ciaut, tender y tl medem temp dur, freit y incomper, propi sciche na persona", enscì l artist.
      Günther maduresc n aspet nuef te sie pensier, cuer y spirt artistich. L sas vif, l sas tender. Vigni sas, te vigni forma y grandeza y natura, giata da les fantasies dl artist n corp, n mus y n carater individual.
L temp, entant che Günther à laoré sperimentalmenter y esclujivamenter demé tl y con l sas, él sté bon de arjonje n livel de sintonia con la natura ezezionalmenter gran. Sciche granes é ence les fantasies, figuratives che spiedla de plu sortes de situazions y de sentimenc dl artist. Contenteza, amour, mueia, tema, disperazion y l se sentí protejé. N argoment che l artist auza dagnora endò fora, é la familia y la sozieté, ma ence la individualité dla persona, che vegn acompagneda da emozions desferentes di per di tres duta la vita.
      L artist é defin autodidat y se straverda de copié "L’ert ne à degunes regoles y perchel ne la pòn nience emparé. La veta artistica é n don che un à tl cuer y chesta mess vegnì coltiveda tres la meditazion, esperimentazion y la sinzierté per l respet per i autri y per sé enstesc. La natura y la conzentrazion é l’unica scola per n bon artist. Ie ti lasce te mi laours gran sfuech y ledeza a les formes cheriedes da la natura, mi intervent é pice en confront. La natura dà sia esprescion, ie jonte mie sentiment istintif. L dut adum completeia spo l’opera, zenza l intervent y l’influenza de valch scola o maester o ciechemai ", spliga Günther Pitscheider.
      Endò n iade ne tradesc l artist nia si stimadours. Sies scultures é creazions che giata forma da sentimenc datrai scialdi revoluzionars y critics, ma dagnora con formes delicates y filosofiches y for auzan fora y valorisan la vita. Ciamò mai ne él sté meso de vedei na colezion tant completa y desferenzieda sciche entant chesta mostra.
Ert, natura y persona, n combate per souravive te n’armonia y te n ambient de respet ence anter les persones.


Orar de daurida: vigni di da les 16.00 a les 21.00h
Dai 31.03.2006 - 12.04.2006
Daurida en juebia ai 30 de merz da les 7 da seira tl palaz di Congresc a Urtijei
Organisazion Union di Ladins de Gherdëina
Che tegn les rejonedes él: Ewald Moroder, ombolt de Urtijei, dot.Florian Mussner assessour provinzial y cav. Lino Lavoriero
De gré a la Cassa Raiffeisen de Sëlva y al Comun de Urtijëi
Al sona n grup dla Scola de Mujiga de Gherdeina


 
Liams emparentés
· Deplú sun l tema Gherdeina
· Chier te noeles


L articul plu liet te chest tema Gherdeina:
Na festa per n fin de ben


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.395 seconc