Al fossa sté cotant miec sclarí y contrabate
La ultima edizion dla Plata Ladina fova gnuda retrata
La delegazion meneda da la presidenta dl Consei Provinzial Veronika Stirner-Brantsch é arciaseda. An sà che Michil Costa fova gnù sclut fora, ence sce al ova bele paié l viade de sia gaiofa. L sit noeles.net ova dè la notizia de chesta esclujion do che l caje fova gnù fat publich sun la Tageszeitung.
L articulist/comentadour dl sit ova metù en cler te sie comentar les paroles fora de entapa scrites tla newsletter y ova aconsié la Generela de desciarié Michil Costa, portan dant n valgunes motivazions desche chela che al ti dà enscì rejon ai aversars che conscidreia la Generela da tres tles mans de filo-talians y ti fej bele da passa 50 agn vera con chest argoment y che al deventa enscì plu rie per la Generela de giaté benvolenza y ciuldì pa nia ence scioldi dai todesc.
L articul é gnù fora, ai 19 de merz 2006, al é gnù liet ence da Michil Costa che se à atira metù en contat con l diretour dl Alto Adige, l prian de bloché la publicazion dl articul sun la Plata Ladina dl Alto Adige, che dova gnì fora ai 21 de merz. Dlongia chest articul fòvel ence does toutes de posizion per defene Michil Costa, anter chestes ence chela de Carlo Willeit, ma defront à na zensura de chesta sort à la redazion retrat la Plata en chela edema. Al fossa sté cotant plu dret y democratich, sce Costa essa tout la ocajion de sclarì sie pensier y de contrabate. La cossa resta pa empò demé per l'aria, ajache la gaffe é dantman.
El pò scrive cie che al vuel sun la Usc di Ladins, ajache al é patron, ma ne vuel nience ti lascé la liberté de parola sun d'autri sfueis. An é veramenter dant a na ditatura. L articul sun la Plata di Ladins ne fova nia unfat de chel prevedù sun l Alto Adige, ma cotant plu moderé y limé. Segur che la Generela é te de bones mans: la lita de Costa a president dla Generela fova voluda te vigni vers da la presidenta onorara Hilda Pizzinini y da n valgugn si amisc. Da chilò enfora veiden tant puech sceria che ala fova duta la conzertazion per avei Michil Costa president, voluda souradut per mete fora de juech i candidac da souramont. Te chesta situazion él cler che chesta Generela ne ciafia nia da fé na politica interladina y chest spliga l'unfataria encerch y la tres manco creta che ti vegn deda a la Generela, dantaldut da souramont. Sce al vegn metù man da fé da man dreta y da man ciancia zensures, a taié fora y savaié de nia, ne fajaràn nia de gran varesc inant. Ciuldì ti fajova pa l comentar na tel tema, ajache al fova n envit da l desciarié?
La Generela à abù l gran merit de porté inant ti ultims 15 agn n program y n projet linguistich che à porté al ladin standard, n projet che se merita de gnì tiesciù inant, ajache al é l cuer dla chestion interladina. Sen ne afùstien endere feter plu nia, nience sun la Usc.
Chest articul/comentar ne gnirà nia fora sun l Alto Adige. (uc)
