benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

Ciamò n comentar sun la newsletter
scrit ai 25 March 2006 da les 14:08:45 da noeles

Politica

 

Al fala vigni toleranza per idees desvalives dal "partí"

Ciamò valch consciderazions sun la esclujion de M. Costa dal viade tl'India y sun l clima politich te Sudtirol: prescions - recat - manaces

de Mateo Taibon

Cie figura che nosta classa politica fej: ala é zenza livel. Zenza cherianza, pòn ence enjonté. Y che al fala la cualité de n debatit politich, che al fala vigni toleranza per idees desvalives da cheles dl partì, ne desmostra nia demé chest caje particolar, ma la storia dl do-vera entiera. Culminé é l fenomen tla frasa - storica per sia fauzité ideologica, politica, etica, morala - che Alexander Langer fossa plu pericolous che i fascisc'.


 



       An podessa ence parafrasé chesta criminalisazion de Alex­ander Langer (a valgugn méssen fosc ti recordé che Alexander Langer n'á mai cometù nience l minim at criminal y n’á mai proponù o mazé tres mesures de assimilazion de na mendranza) y dit che la SVP é plu pericolousa che l fascism: l fascism dijova davertamenter che al volova assimilé i ladins. La SVP ne l dji nia, anzi, dij tres l contrar, ma la politica é juda de chest vers: epocala te sie senn nazionalist, te sie fon­damen­talism antiladin, la campagna longia y dura dla SVP per nia lascé permez tles scoles l lingaz ladin. Na parentesa: Vigni assimlazion, vigni fascism ence met man con l’esclujion de n lingaz da les scoles – y entratant che la scola todescia ti agn dla esclujion dal todesch vegn sacraliseda sciche Katakombenschule, vegn chi che se damanova y damana l ladin te scola metus fora sciche criminai, dantfora va l foliet de partì nia ofizial, la Dolomiten – y parentesa scluta.
       Defat, l lingaz ladin n'é nia prejent te na mesura azetabla tles scoles, con l resultat che l lingaz vegn rejoné dassen mel. La Rai ladina documenteia di per di chest status quo dejastrous, y á testimonié l dejaster, l'erojion dl lingaz él rodunt esponenc de chela "partei" che é dagnora juda con dut sie senn y sie despet contra l ladin te scola, tla aministrazion publica, ti media.
       An podessa ence recordé sciche al vegn dagnora metù fora sciche simbol dl mel l fascism; y lascé fora l nazism. Samben, chel totalitarism che á vedù n grum de südtiroleisc todesc (y ladins! nia demé Gherdeina n'à chilò na gran tacia foscia te sia memoria) sciche aiutanc fanatics de na politica criminala, vegn scuté via. L bilanz de doi agn de nazism é true piec de chel de 20 agn de fascism. Ma sun l nazism él gnù metù na coutra de chiet. Tl segn ence de n auter aspet de chesta ideologia nazionalista: volei assimilé i todesc é aldò de chesta ideologia l maiour crimen - nia ne conta chilò volei assimilé i ladins, nia ence desfé la comunité ebraica da Maran, nia ence mené vejins tl KZ. Südtirol n'à mai fat n ejam de coscienza per cie che reverda l nazism.
       Rodunt chesta classa politica fej l gran maester de morala can che ala va di autri. Na classa politica de n livel dret bas, dé dant da la strentura mentala, dal nazionalism todesch ence, da la tendenza da se lascé glorifiché y ester empermalousc per vigni picia critica. Che an vae contra la liberté de opinion de na persona privata, é bele da soul da daudé assé - vedú ence che chesta opinion ne n'à degun contegnù razist, filofascist o nazist (chel endere essa abù esternazions de politics dla SVP, i recordon l „Zigeunerspruch de Atz). Che an tole l'opinion dla persona privata per fé prescion sun na union culturala, á tant plu l tof de assolutism. Sonse pro la „Sippenhaft“ etnich-culturala? È chisc i prums varesc de na purga politica dles unions ladines?
       Tl capitul dla esclujion de Michil Costa dal viade tl’India él ence n auter particolar interessant: D’autres persones à ben podù jì empera. Enscì n imprenditour. O enscì ence – la Tageszeitung da encuei l scriv – l partner dla presidenta dl Consei provinzial. Ben, chel é sia bona rejon (nosta opinion n’é chilò nia valiva a chela dla Tageszeitung). Ma sce na persona ne ti plej nia al partì, pérdel si derc zivils – chesta la conclujion, sciche ence la rejon da fé pert de n viade che el s’à paié de sia gaiofa. N segn dl assolutism.
       Ma la cossa plu da daudé, y plu bassa, nia degna de oms zivilisés, é le contest dla prescion sun la Union Generela (y ence sun la Maratona dles Dolomites). L'auta gastronomia dla Alta Badia envieia a ceina (per la streda dla Val Badia). I politics é oramai duc ruvés adalerch. Con acompagnament. Ai vegn a  ceina - al ne fossa pa persones che davagna puech, ma chilò ti va na critica ence a chi che envieia. Ma al en é ence laprò de chi che á te gaiofa n document privat de un di hotiei che envieia a la ceina. Y chest document privat (la newsletter de Michil Costa) vegn tout ca te chesta medema serada per fé prescion, recaté, proibì liberté d'opinion privata. Y chest zenza minima legitimazion - empruma dess chest partì scoé dant sia porta, remoné demez sie scich ideologich.
       Jí a scroché y tl medem moment la prescion, la manacia contra chel che envieia y sie certl. Chesta la bela cherianza de nosta classa politica. Can che la prepotenza arjonj n livel tant aut y la cherianza n livel tant bas, màncel ence les paroles adeguedes.

 

 
 






 
Liams emparentés
· Deplú sun l tema Politica
· Chier te noeles


L articul plu liet te chest tema Politica:
Südtirol: Karte mit historisch gewachsenen Namen


Valutazion dl articul
Cumpeida mesana de oujes: 3.85
Oujes: 7


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: Ciamò n comentar sun la newsletter (ponc: 1)
da Jancarlo ai 26 March 2006 da les 10:06:51
(Infos sun l utilisadour | Ti mané n messaje privat)
I todesc se fej ert con la democrazia, ence canche al vel les regoles democratiches. Tla majera pert di comuns todesc de Suedtirol (a desvalivanza de chi ladins méssen sotlinié) él dutaorela na "Einheitspartei" (SVP) che cuei adum 90% y passa dles oujes. Chest án avisa ence a livel provinzial, la SVP ne à enfin a ciamò mai messù temei de perde sia posizion de podei. La Lista Ladins ála fracé ju con duc i mesi che ala ova a desposizion.



Re: Ciamò n comentar sun la newsletter (ponc: 1)
da Joepl ai 25 March 2006 da les 18:45:04
(Infos sun l utilisadour | Ti mané n messaje privat)
Mateo, te pos pa la oje ia y ca tan de iadi che te ôs, ma les cosses dites da MC, ince sce al dij che al les à dites sciöche porsona privata, é "fora de entapa" tl moment che al é president de na uniun, sciöche zacai á scrit te n comentar. Ne êl nia avisa el che â n iade scrit n comentar tla USC, ti tiran dant a noeles.net che chesta jent "ne á nia bria de avei diplomazia, de pesé les parores" y i.i. al é ma plü da rí ... Scrîl mo ince segn n comentar y stlaresc y spliga, i creii propi de no, ince el cialarà de scoé sot tepich ite döt.



Re: Ciamò n comentar sun la newsletter (ponc: 1)
da Jepele ai 26 March 2006 da les 10:19:32
(Infos sun l utilisadour | Ti mané n messaje privat)
I sportifs olimpics sudtiroleisc (con medaia) á declaré de ester "doplamenter contenc de ester talians". Ésen ence jus manacé chi? :-) Tant che ie me recorde ti à ence Durnwalder fat festa.



Re: Ciamò n comentar sun la newsletter (ponc: 1)
da Splundi ai 26 March 2006 da les 11:13:52
(Infos sun l utilisadour | Ti mané n messaje privat)
Va bun che la SVP ne n'à nia bria da se ficé ete te gaujes co reverda na porsona privata y che orei cancelé i contribuc ala UG é plü lere en slet ricat co na soluziun inteligenta.
Mo al n'è dessogü nia le cajo da defene MC! La letra ch'al à scrit è tipica por en hotelier - pordenede la parora - "lecacü" da atlò da nos co se veness ince la braia por i foresc. Al messass ester meso da vire na identité ladina zonza entrês se taché ete pa en "big brother" d'en n'atra nazionalité.
Desco ladin dla Val Badia sunse zitadin taliana, mo i ne n'aldi dessogü nia pla naziun talian y ensciö ne n'ài nianca bria da ester "ben felice di essere italiano". Y ci ô pa d`ponsiers "ben felici [...] di poter essere qui." Al sona desche i fossun encontonc da ester gnüs tuc sö tla Talia. Al mo desplej MC, mo nos ladins ne sun dessogü nia mâ ghesc atlò da nos. Nos sun pa dagnora stês atlò. Ci ô pa dì frases desco: "La storia non si può e non si deve cancellare, il mondo va avanti, tornare indietro significherebbe cancellare la memoria"? Da öna na pert ne desson nia cancelé la memoria, mo dal'atra pert ne desson nia ciaré zoruch. Mo memoria chel ô pö dì: punsé zoruch a ci co è sté. Cösta è ben na contradiziun desch'an n'en ciafa nia na secunda.
Al mo desplej mo en tal è en püre president sce al n'è nia bun da raprejenté na identité ladina ledia y independenta!








Re: Ciamò n comentar sun la newsletter (ponc: 1)
da Claudio ai 26 March 2006 da les 12:02:25
(Infos sun l utilisadour | Ti mané n messaje privat)
Brau, propi n bel comentar Splundi! Al ne é nia a l'auteza dla presidenza.



Re: Ciamò n comentar sun la newsletter (ponc: 1)
da MateoTaibon ai 26 March 2006 da les 18:40:53
(Infos sun l utilisadour | Ti mané n messaje privat)
splundi, te pos avëi rajun, bonamonter aste rajun. mo spo messon niade analisé y critiché le turism entier y so stil .... al é pö dlunch le medemo stil, le medemo tonn de sotmisciun defrunt al turist. Iu n'ess nia scrit desche Costa à scrit por ci co reverda chi co po s'an jì, o l'adejiun patetica ala Talia etc. etc. Da firmé endere ci che al dij dla Ladinia co gness partida sö te di stac! I ombolc s'á damané la rajun da partì sö la Ladinia te dui stac, ô dì n tort scialdi peso co la tripartiziun fascista. Y da dodé, veramenter da dodé, can che le scroché y le recaté va emper.

Mo che an sides a öna o nia: Ala familia Costa o sü esponenc messon i conzeder la liberté da dí y scrì ci che ai à scrit te söa newsletter. La reaziun dla SVP é trö peso de ci co é gnü scrit - na reaziun che se damana fondamentalmenter l'aboliziun dla liberté de opiniun.

Porater: ola ea pa les gran protestes dla SVP can che hotì y pensiuns tl Burggrafenamt indicâ che ai orea preibel mâ sciors de lingaz todesch ?!? Olà can che al é gnü envié, da pert de na uniun todescia, n "Kaderführer der Rechtsextremen" sciöche Scrinzi? L nazionalism todesch i va ben bun. Da pert söa é döt conzedü, pai atri nia: dui peisc, döes mosöres.




Re: Ciamò n comentar sun la newsletter (ponc: 1)
da travers ai 26 March 2006 da les 20:54:54
(Infos sun l utilisadour | Ti mané n messaje privat)
L leitmotiv dla politica dla SVP é dagnora sté "deutsch über alles" y i ladins la fueia de fighe per ascogne sies vergognes etnico-ideologiches y per se dé na paruda de gran avocat dles mendranzes, no demé te Sudtirol ma fora per dut l mond.
La SVP à duc i torc che i voleis ma chest ne vuel nia dì che i ladins y en particolar la Generala à dagnora rejon. Ie rati che an ne desse nia minimisé i fai dla presidenza tiran ca i torc dla SVP (o de autri) ma che an desse i giudiché aldò criteres autonoms che é da giaté tla storia y ti fins scric dant tl statut dla Union Generela di Ladins.
Les declarazions n puech cochessie de MC é una na cosa, l vuet programatich, la mancianza de na vijion clera y de na politica (inte)ladina ativa
é colpa dla presidenza dla UGL, unfat tant de torc che à la SVP. Y la soluzion ne é de segur nia de ti tò l microfon a la critica con mesurses de zensura o boicot , ma plutost de se mete duc adum pro na meisa per chirì stredes che posse varenté na "Ladinien in Not".


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.375 seconc