benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

La sajon da d'invern va bel plan a piz
scrit ai 24 March 2006 da les 17:00:30 da noeles

Fascia

 

La jent se damana tres deplù alternatives al schi

Ceines tles uties da mont - jí con les ciaspes - spaziredes - Al vuel endere ester na programazion

La sajon da d'invern é do a finì via te Fascia, desche te dutes les Dolomites. La majera pert di ghesc' é praticamenter demez, trueps albercs à saré, ma la parola fin metaràn empermò entourn Pasca. Al é sté na sajon dassen longia y les dretes zifres dles statistiches dijarà avisa co che ala é juda,  ma l bilanz someia bele sen de ester positif, testemonian che la proposta de schi a livel mondial desche chela dl Superski Dolomites à sia valuta. 
 
 


Donca él l sport dl schi motor zentral de duta l'economia dl turism da d'invern enceben che les statistiches di ultims agn à desmostré n smendriment dla cumpeida di schiadours sibe tla Talia che tl'Europa. A vigni bon cont, sce motifs economics - l schi é un di sports che costa deplù - à condut a chest smendriment, veiden dl auter vers dagnora deplù turism dl Est y donca n marcé nuef che vegn do ca y che cuer da na man ence chela feta de ghesc' todesc che ti ultims diesc agn é tres deplù jus mancia. Ma l fenomen che vegn dant tres deplù é chel de n turism da d'invern che chier propostes nia liedes al schi ma a na vida de alternativa al schi. Per chest él tres deplù jent che se damana raides con les ciaspes, escurscions de dí y de nuet sa mont, ceines ti refuges y enscì inant. Ma aldelà dla moda dla ceina tles uties da mont, con situazions valch iade ence de pericul obietif, é la domanda che vegn do ca avisa chela de podei fé sport da d'invern zenza messei jí con i schi. Che al pleje o nia, chesta é na domanda nueva y a chesta él n turism sterch  con na  paruda generala che mess ti dé respostes, respostes che ne é encueicondì dutaorela nia organiches y souraldut nia liedes a na programazion generala che peia via dai ofizes turistics o da la promozion medema dl turism dolomitan.Che l schi restarà la majera industria ne vegn nia metù en discusion, chel fossa na bela, ma a chest turism nuef che se damana alternatives al schi méssel zenzauter ti gní dé na resposta de cualité y de scomenciadives y de oportunités. Te Fascia él nasciù zeche, al é nasciù valch proposta, enceben che n valgunes ne é nia tl plen respet dles normatives de acompagnament dles persones sa mont. Al é n laour che a da gní fat souraldut da les guides da mont che mess apontin slarié sia profescion y sies competenzes te chest setour. Na parola deplù sun chest argoment zite podessa gní deda ence da la figura nueva dl acompagnadour de "mesa mont" che podarà conduje souraldut d'isté a stroz i ghesc' enfin a sun i 1800 metri. Endana  met a jí la provinzia de Trent  finalmenter i cursc per chesta figura de acompagnadour de mesa mont tres deplú ence te Fascia per la sajon da d'isté, ma ence l'invern se damana alternatives al schi. Chestes alternatives messaràn ciaté tl segn de n turism che pò sporje dlongia a la proposta dl schi ence poscibeltés per chest turism nuef. Ne vedei nia y ne volei nia ti dé n endrez positif é dessegur de dann a duta l'economia dl turism.  La proposta mess gní fata da jent dl setour y nia da chichemai che se inventeia da encuei a endoman n mistier abusivamenter, zenza profescion y zenza cuer, demé per fé scioldi sun l'ona de na domanda de alternativa al schi. (dv)




 
Liams emparentés
· Deplú sun l tema Fascia
· Chier te noeles


L articul plu liet te chest tema Fascia:
Publicazions nueves: biografia sun Tita Piaz


Valutazion dl articul
Cumpeida mesana de oujes: 0
Oujes: 0

Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant
News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.367 seconc