benvegnus Noeles.net - Informazion ladina
Noeles.net
    Vos ne seis nia loghé ite.   [ Loghé ite ]    

L President dla Generela Michil y sies esternazions
scrit ai 18 March 2006 da les 21:39:17 da noeles

Cultura

 

Caje Michil Costa, ma la SVP é true piec

I todesc pò dí dut, contra i autri la ciacia - dut vegn subordiné al nazionalism dla SVP

de Mateo Taibon

La Tageszeitung dl 18/19 de merz te n articul intitulé „Stirners Bauchweh“ a plata 3 reporta l éclat. Na delegazion dl Consei Provinzial de Südtirol fej n viade tla India per enconté l govern tibetan tl esil. Laprò dova ester ence Michil Costa. Ma Costa é gnù sclut fora tl ultim moment da la presidenta dl Consei Provinzial, Veronika Stirner-Brantsch. Enscí la Tageszeitung. Che la presidenta dl Consei Provinzial sie gnuda metuda sot a prescion da colegs de partì, ne ti tol nia la burta saour a chesta azion de esclujion.
 


La Union Generela ne ti plej nia a la SVP, dantadut nia ai estremisc' antiladins dla SVP de Gherdeina – chi che á dagnora tegnú alaut la tripartizion voluda da Mussolini, chi che é dagnora jus con duta la forza contra l ladin te scola. Enscì chiríven na vertola per emarginé la Union Generela. Giateda l’àn te na newsletter dl Hotel La Perla da Corvara, newsletter firmeda da Michil Costa sciche persona privata, nia sciche president dla Generela. Te n stil de denunzia él gnú metú man na ciacia contra Costa per cie che al à scrit tla newsletter. La liberté de opinion vel demé per chi che se damana l’autodeterminazion, ma nia per chi che é decontra. Na proa generala de totalitarism.
Ei pò se damané che le tort fascist dla tripartizion dla Ladinia te trei provinzies vegne aumenteda a despartizion dla Ladinia te doi stac y enscì a la scancelazion dla mendranza ladina. Ei à podú se damané che l lingaz ladin ne vegne nia ensegné te scola, fajan enscí na prolungia dla politica dl "Ventennio", mefun dal auter vers etnich adalerch. Ei pó dí dut. An se recorda dant da n valch agn desche Luis Durnwalder à dit che i sudtiroleisc essa „sofferto come gli Ebrei“. Cie che é na bagatelisazion dl holocaust con 6 milions de persones ebraiches copedes. Olá é pa sté l tentatif dla „Endlösung“ di sudtiroleisc? Y tl medem moment végnel scuté via che i sudtiroleisc é ben stés vitimes dl fascism, ma che an à dl auter vers abù da pert di todesc y ladins n gran entusiasm per l nazism, y n gran aiut per mené a mort persones de chesta provinzia, anter chisc ence persones ebraiches. I sudtiroleisc perchel nia „come gli ebrei“, ma ai á fat pert dl sistem che à metú en opera l holocaust. O nes recordon l „Zigeunerspruch“ de Atz. An se recorda tanc che é sautés su a defene Atz. O l antisemitism di Freiheitliche – ence degun problem. O les posizions estremistes che vegn tres endò fora pro i scizeri, che à ence envié n Otto Scrinzi, n „Kaderführer der Rechtsextremen“, desche l DÖW (Dokumentationsarchiv des Österreichischen Widerstandes a Viena scriv).
Ma Costa é gnú taié fora dal viade tla India. Y Pahl s’á damané conseguenzes per i finanziamenc a la Union Generela. „Pahl soll sich um die Schatten der eigenen Ideologie kümmern“, onse nos scrit tl forum. Y cie à pa dit Pahl tla chestion de chel member dla SVP che se damanova de podei brujé i libri „sciche Hitler?“ Se damané l boicot dla unica organisazion che va soura i confins volus dal fascism fora mostra n spirit che é true piec dles paroles de Costa – paroles sun cheles che nos nes resservon da avei na autra opinion che Costa. Dl auter vers endere é Costa ence sté l’unich – touta fora la Lia per i popui manacés – che à auzé fora che la petizion dla autodeterminazion se damana la despartizion di ladins anter doi stac. Ma chilò métel spo man la zensura.
Pro i contribuc se tràtela de scioldi publics, nia de scioldi privac dla SVP. Ma dut ti vegn subordiné al nazionalism dla SVP, a chesta delouta a man dreta porteda ite dal sourastant Elmar Pichler Rolle. An é usés che dut te chesta provinzia vegn vedù y chrí fora aladò dla lingia dl partì de maioranza. Sen àn fat n vare de cualité. I criters enfinamai per la partezipazion a n viade é la lingia dla SVP. Chest é l troi dl totalitarism. La segnaletica chela de denunzia y de spicolament tles opinions politiches de na persona – opinions nia criminales sciche cheles di neonazisc' o dl pangermanism tant gonot da giaté ence pro unions desvalives dl mond todesch. Sciche valch fej su n teater mat per la petizion dl’autodeterminazion, enscí ti végnel ai autri proibì sia opinion.
I todesc pò dí dut. Contra l rest la ciacia, con stil ence de incuisizion: la newsletter privata de n hotel vegn strumentaliseda per na ciacia contra la Union Generela? Vel la liberté de opinion demé per i todesc o per chi che tol posizion per l nazionalism todesch? Tant de Herrenmenschen-Ideologie él pa chilò laprò?
 
 

 
Liams emparentés
· Deplú sun l tema Cultura
· Chier te noeles


L articul plu liet te chest tema Cultura:
Sotescrivede l Manifest LADINIA 2005!


Valutazion dl articul
Cumpeida mesana de oujes: 2
Oujes: 1


Preibel toledeves dlaorela de valuté chest articul:

ezelent
dret bon
bon
normal
sclet



Empostazions

 Plata da stampé  Plata da stampé

 Ti ortié chest articul a n/a amich/a  Ti ortié chest articul a n/a amich/a


Per l contegnú di comentars é l autour dl medem responsabel

Comentars anonims n'é nia ametus, preibel registredeves denant

Re: L President dla Generela Michil y sies esternazions (ponc: 1)
da Janpire ai 20 March 2006 da les 08:18:14
(Infos sun l utilisadour | Ti mané n messaje privat)
Envié jent a s'en jì sce ala ne se sent nia contenta de ester "taliana" me pér ben n pue na afermazion da "Ventennio" o almanco dla plu "man dreta taliana".



Re: L President dla Generela Michil y sies esternazions (ponc: 1)
da Claudio ai 23 March 2006 da les 17:52:11
(Infos sun l utilisadour | Ti mané n messaje privat)
Ie ne son nience a una con Taibon daldut te sia analisa. Les paroles de Costa ne é nia da mete a chest livel, ma ales é dessegur desplazedes, sce ales vegn dites da na persona che cuer na enciaria bendebot emportanta. An se ova bele anadé liejan l raisplais de Michil (perauter valch newsletter dl Hotel é ence vegnuda publicheda sun la Usc per ladin, ma nia chesta ultima) che al ti fala na vijion clera, che al é poester na persona enteressanta, ezentrica, ma che al met plulere sia persona tl zenter, benvestí con les penes tla tascia dl samare, n "ucel scraient" che va dret ben per la Maratona o per l reclam turistich che viv de tel "shows". L 2005 fova l ann dla recordanza di 100 agn de Union Ladina. An essa podù miné che al essa emparé l decurs storich, ma nia. Persones che minova te n prum moment che essa podù n bon president, storj entratant l nes.


News ©
 
  www.noeles.net



Impressum: Plata on-line publicheda da l'Union Scritours Ladins Agacins - Redazion: Bulsan noeles.info@gmail.com


Implatazion: 0.427 seconc