La lista LADINS damanda che la marches venie retudes
Da permò à zaites scialdi lietes scrit che pra la dumandes de amiscion al ejam de bi- y trilinguism ne n’iel nia plu debujën de mëter marches da bol y, puech do, che chësc vel nce per i atestac. Nia na parola sun coche chësta esenzion ie unida a se l dé, nia na parola sun chi che la à damandeda y nia na parola sun i paiamënc eventualmënter da reter.
La Lista LADINS, te na interogazion data ju ai 02.09.02 al assessëur cumpetënt, fova de chëla che l ne n’ie deguna rejon per se damandé l paiamënt de na tassa. Dan da puech à la LL mo n iede comunicà chësc si pont de ududa. Sën la resposta lapidera, che dal 1. de fauré inant ne adroven nia plu marches da bol. La LADINS sotrissea per l terzo iede che, sce l ne fova nia legitimà pretënder na tassa, muessa chësta unì retuda.
