L zircul d'ert "Valentino Rovisi" de Moena
Al fej conesce les opres dl artist fascian y promuev les conescenzes sun l'ert populara y religiousa ladina
de Domenico Volcan
Tl panorama cultural de Fascia di ultims agn é l zircul "Valentino Rovisi" de Moena un di grups plu feruscoi tl cheder lié a la promozion dla storia y dla cultura de Fascia. Ala é mingol curiousa la storia de chest grup cultural, ma dessegur paiel la mueia de l conesce plu damprò y de l entene miec per via de sie gran amour envers al gran artist moenat nasciù dl 1715 y mort dl 1783. Ma al se dà ence ju con l'ert de Fascia en general.
Na vita, chela dl ladin Valentino Rovisi, bendebot interessanta souraldut per sies gran esprescions de ert. A Aunejia fòvel enfinamai arlef dl gran maester Tiepolo. Valentino Rovisi nes à lascé endò te nost raion ma ence te dut l Venet n mudl de operes.
Belavisa per fé conesce y valorisé chest artist ladin él nasciù dant da cinch agn a Moena l zircul cultural " Valentino Rovisi". Anter i promotours i doi moenac Claudio Vanzo dl Titele y Chiocchetti Evelina dl Maza apascionés de chest gran fi de Fascia y dla Ladinia. Valentino Rovisi fova propi n gran artist: reconesce y fé conesce sia storia y sia ert a sburlé chest grup cultural a contribuì a truepes ativités culturales te Fascia. Da cinch agn encà dà l zircul fora publicazions y met a jí scomenciadives de carater cultural per fé conesce y aprijé l artist. Apede ai libri sun Baissiston y ai catalogs sun Valentino Rovisi y di artisc' de Flem é les nueves di ultims temps dassen liedes a les operes sun l sentiment religious dles valedes Ladines y a la storia di artisc' de Flem y de Fascia. I libri vegnus fora tl 2005 se enjonj al liber nuef che vegnirà fora via per l'aisciuda sun la storia y la cultura dles ancones votives de Fascia: n lurier porté dant dai storics Evelina Chiocchetti y Claudio Vanzo de Moena che desmostra la fona tradizion religiousa de Fascia y de duta la Ladinia. Al sarà dessegur n gran vare inant tla conescenza dla storia culturala y religiousa fasciana.
