Cebit: a mez troi végnel trat n bilanz dret positif

Convergenza tecnologica anter la industria classica dl computer y chela dla eletronica

I afars tla industria dla high-tech va endò suvers. La Cebit, la plu gran mostra entourn al computer, ti dà na "dreta sburla" al setour. An pò bele constaté che les impreises investeia endò deplù tla informatica. Te chisc prums trei dis an podù cumpedé passa 200.000 vijitadours. L rode de afars dl setour dess aumenté chesta outa dl 2,4 prozent a 137 miliardesc de euro.

Per l  2007 se aspéten endere demé n plus de 2 prozent. La CeBIT 2006 é chesta outa carateriseda dal tema dla convergenza tecnologica anter la industria classica dl computer y chela dla eletronica. Chisc doi setours cresc tres plu adum. Aldidancuei ne à n telefonin nia demé plu la funzion de telefon, ma al pò vegnù anuzé desche ofize mobil canche an é sun troi.

N valgugn ponc clef dla Cebit é  la comunicazion tres radio RFID, les novités per l devertiment digital, azesc asvelc a banda lergia, l telefoné tres internet coche ence la telematica tl setour dl trafich. I vijitadours se intereseia dantaldut per les esposizions di gran conzerns con de vigni sort de enjigns per l devertiment. Feter n terz dl vijitadours a la Cebit vegn da foradecà. Informazions plu menudes giàten sun www.cebit.de. (if)