Mussner vuel compré empede daidé
L contribut provinzial per l derturament dla Cesa di Ladins é lié a condizions imposcibles: Mussner y i ombolc se ghira la proprieté per la provinzia
URTIJEI. La senteda revardenta la restruturazion dla Cësa di Ladins a Urtijei é endò juda fora a vuet, degun vare inant, plutost doi varesc endò. Al parova che an podessa speré te n maiour finanziament da pert dla Provinzia, depierpul él bele truep sce al vegn mantegnì l milion de euro empermetù, tegnan cont dles condizions metudes sun meisa dal assessour. Con n tel contribut ne pòn nia restruturé truep.
I ombolc de Gherdeina y l assessour Mussner vuel ti tré dla man na pert dla Cesa a la Union di Ladins de Gherdeina.
En plu é l assessour Mussner y i trei ombolc de Gherdeina a una che l fabricat nuef, souradut chel destiné a tó ite l museum de Gherdeina, ti vegne passé a la Provinzia.
Sun chest pont n’él samben nia a una l Consei dla Union di Ladins de Gherdeina che ne vuel nia demé tegní la proprieté dl material dl museum, ma ence la proprieté dl imobil. Les does posizions é dassen dancialà y al moment ne veiden deguna poscibelté de n compromis. La Cësa á n valour storich, frut dla iniziativa de privac che s’à tout dant de fé valch de concret per salvé la rejoneda de Gherdëina. I fondadours dla Cësa á risié truep ence dal cianton finanziar, fajan debic y enscì inant. L Comun de Urtijëi à daidé pro l tet.
Valch un, per defene la pretenjion dla proprieté dl fabricat da pert dl assessour y di ombolc á formulé chesta domanda: “Viel Geld und kein Mitspracherecht?” (Trueps scioldi y degun dert a la cossa?). A cie moda ne ghira pa nia la Provinzia l dert de controlé la gestion de duc i fabricac privac che ala à daidé finanzié tres si contribuc? Da puech él gnù enaudé a Bulsan l salf teater “Il Cristallo”. Dant da n grumon de jent y a la prejenza de Luis Durnwalder y de trueps assessours provinziai (Cigolla, Gnecchi...) y dl Comun de Bulsan, à l curat dla cura Regina Pacis, don Ulivo, dit cler che l salf é de proprieté dla cura y che chesta à enscì sen doi fiés: la gliejia y l teater. La gestion dl teater “Il Cristallo”, á ciamò dit l curat, é tles mans de n comité lité da la cura. No Durnwalder, no Cigolla, no la Gnecchi (comunista) à damanè che l imobil dl teater passe a la provinzia ence sce l contribut é sté gran. La storia dla pretenjion de Mussner che l finanziament é condizioné al trasferiment dla proprieté dl imobil a la Provinzia é propi l frut dla ostinazion dla Svp ladina y souradut de chela de Gherdeina a ne ti conzede nia valch a chi che la pensa autramenter. La Cësa di Ladins é tles mans de persones che ne ti à bonamenter nia tres dé la ousc a la Svp y perchel éla veduda desche oposizion y la oposizion aladò dla Svp ladina y souradut de Mussner mess gnì tegnuda ju te vigni vers. I ejempli é n grumon: al basta pensé al tratament dla Lista Ladins pro la formazion dles jontes di comuns de Gherdeina: l orden gnù dal “bel” à fat baraté te n iade i candidac che fova bele prevedus. Longia la storia dl senn a la Generela y a d’autres unions.
La Cësa di Ladins de Urtijei é n scagn de vita, de vita culturala. Ala vegn manejeda da persones che crei veramenter tla gauja ladina, che se dà ju dassen con la cultura ladina. Al basta pensé ai teatri, a les conferenzes, al patrimone dla biblioteca, a la bona colaborazion con les autres lies che giata lerch tla Cësa. Empede rengrazié y daidé chestes persones te sia ativité végneles enfinamai tichinedes. La Svp á sia lege: i scioldi dess ti gnì dés a les unions che se dà ju con l folclor, con les escavazions y... con cosses che é en funzion dl turism. Samben mess chestes unions ti asseguré sia ousc a la Svp. La cultura, la rejoneda é demé na vertola, cie che conta é garantí l podei.
Co jÌ inant? Al gnirà cherdé ite l Consei dla Union de Gherdeina, al sarà sentedes con les lies che laora tla Cësa y spo na assemblea generala di sozes y di simpatisanc. “Les condizions de Mussner” dessena, al pèr che al vuele compré empede daidé. (uc)
Cesa di Ladins a Urtijei: 1 n milion de euro é assegurés
- 50 agn Cesa di Ladins: restruturazion
- 50 agn Cesa di Ladins a Urtijei - valch fora dla storia
- 50 agn Cesa di Ladins a Urtijei: Mussner stola
- L projet de engrandiment dla Cesa di Ladins
- Derturazion dla Cesa di Ladins a Urtijei
- Cësa di Ladins: L assessour Mussner tol posizion
Liams a d'autri articui comparus sun noeles.net sun l argoment:
- La Union di Ladins de Gherdeina spliga enscí i fac.
- Al se trata de na despuscion.
- Mussner: "Cesa di Ladins y espropriazion, dut nia veira!"
- Perde la Cesa fossa n auter sclaf de sotmiscion - A cie titul damana pa Konrad Piazza perdonanza?
- Deguna trieva entourn la Cesa di Ladins.
- Willeit brancia do l'erma plu temuda: la votazion do grups etnics.
- La storia dl museum à dutaorela da vegní.
